އިޖުތިމާޢީ ޚިދުމަތާއި ރަށުގެ ކުރިއެރުމަށް އޮތް ލޯތްބާއެކު، ޒުހުދާ އަބޫބަކުރު ނުކުމެ ހުރީ ހުރާގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީ (ޑަބްލިއު.ޑީ.ސީ) ގެ ގޮނޑިއަށެވެ. އިޖުތިމާޢީ ކަންކަމުގައި ހަރަކާތްތެރި އަންހެނެއްގެ ގޮތުގައި ފާހަގަކުރެވޭ ޒުހުދާގެ އަމާޒަކީ، އޭނާގެ ރަށާއި ރައްޔިތުންގެ ތަރައްޤީއަށް މާނަހުރި ޚިދުމަތްތަކެއް ކޮށްދިނުމެވެ.
ޚިދުމަތުގެ މައްޗަށް ބިނާވެފައިވާ ޝައުޤުވެރިކަމެއް
ޒުހުދާ ހާމަކުރި ގޮތުގައި، އިޖުތިމާޢީ މަސައްކަތްތަކަށް އޭނާގެ ހިތުގައި އޮތް ޝައުޤުވެރިކަމަކީ އަބަދުވެސް އޮންނަ ކަމެކެވެ. ވަރަށް ކުރީއްސުރެ ފެށިގެން، މީހުންގެ މެދުގައި އެކުވެރިކަން އާލާކޮށް، ރަށުގެ ޖުމްލަ ތަރައްޤީއަށް އެހީތެރިވެދޭ ހަރަކާތްތަކުގައި ބައިވެރިވުމަށް އޭނާ އިސްކަންދެއެވެ. އޭނާގެ މި މަސައްކަތުގެ އަސްލަކީ މުޖުތަމަޢަށް ޚިދުމަތްކޮށް، ރައްޔިތުންގެ ދިރިއުޅުން އުޖާލާކުރުމަށް އޮތް އިޚްލާޞްތެރި ނިޔަތެވެ. ވަކި ޚާއްޞަ ކާމިޔާބީއެއް ފާހަގަކުރުމުގެ ބަދަލުގައި، ޒުހުދާ ބާރުއަޅަނީ ރަށުގައި ހިންގޭ ހުރިހާ އިޖުތިމާޢީ ހަރަކާތްތަކެއްގައި އޭނާ ބައިވެރިވާ މިންވަރުގެ މައްޗަށެވެ. އެކި މުނާސަބަތުތަކާއި، އިޖުތިމާޢީ ބައްދަލުވުންތަކާއި، ތަރައްޤީގެ މަސައްކަތްތަކުގައި އަމަލީގޮތުން ބައިވެރިވެ، ބޭނުންޖެހޭ ކޮންމެ ދަނޑިވަޅެއްގައި އެހީތެރިކަން ފޯރުކޮށްދިނުމަކީ އޭނާ ފަޚުރުވެރިވާ ކަމެކެވެ. އޭނާ ގަބޫލުކުރާ ގޮތުގައި ކާމިޔާބީގެ އަސްލަކީ ގުޅިގެން ކުރާ މަސައްކަތެވެ. އެހެން މީހުންނާ އެކު މަސައްކަތްކޮށް، އެކުވެރިކަން ވަރުގަދަކޮށް، އެއްވެސް ހަރަކާތެއް ހުއްޓުނަނުދީ ކުރިއަށް ގެންދިއުމަކީ އޭނާގެ އުސޫލެވެ.
ރަށުގެ ތަރައްޤީއަށް އޮތް ތަޞައްވުރު
ޒުހުދާ އެންމެ ބޮޑު އިސްކަމެއް ދެނީ ހަމަހަމަ އަދި އެންމެން ބައިވެރިވާ ތަރައްޤީއަކަށެވެ. އޭނާ ގަބޫލުކުރާ ގޮތުގައި ހަގީގީ ކުރިއެރުމަކީ ހަމައެކަނި އުމްރާނީ ތަރައްޤީއެއް ނޫނެވެ. އެއާއެކު ރައްޔިތުންގެ ދިރިއުޅުމުގެ ފެންވަރު މަތިވެ، ދުޅަހެޔޮކަން އިތުރުވާން ޖެހެއެވެ. އޭނާގެ ތަޞައްވުރަކީ ހުރާގެ ތަރައްޤީއާއެކު ރަށުގެ ރައްޔިތުންނަށް ވެސް ކުރިއެރުން ލިބި، މުޅި މުޖުތަމަޢަށް ފައިދާކުރާނެ ފުރުޞަތުތަކެއް ފަހިވެގެންދިއުމެވެ.
ސަރުކާރާ ގުޅިގެން މަސައްކަތްކުރުން
ޒުހުދާގެ މަސައްކަތުގެ މައިގަނޑު އަސާސަކީ ސަރުކާރާ ގުޅިގެން މަސައްކަތްކުރުމެވެ. އޭނާ ފާހަގަކުރި ގޮތުގައި ޕީޕަލްސް ނޭޝަނަލް ކޮންގްރެސް (ޕީ.އެން.ސީ) އާ ގުޅުމަށް ނިންމީ، ރަށުގެ ތަރައްޤީއަށް އިތުރަށް ހަރުދަނާކޮށް މަސައްކަތްކުރުމުގެ ބޭނުމުގައެވެ. މީގެ އިތުރުން، ހުރާ ދާއިރާގެ މެމްބަރު ޑރ. އަނާރާ ނައީމް ކުރައްވާ މަސައްކަތްޕުޅުތަކާއި ރައްޔިތުންނާ ބާއްވާ ގާތް ގުޅުމަކީ، ޕާޓީއަށް ތާއީދުކޮށް ތަރައްޤީގެ މަސައްކަތްތަކުގައި ބައިވެރިވުމަށް އޭނާއަށް ލިބުނު ވަރަށް ބޮޑު ހިތްވަރެއްކަން ޒުހުދާ ފާހަގަކުރިއެވެ.
ވޯޓުލާ ފަރާތްތަކަށް ދޭ މެސެޖު
ރައްޔިތުންނަށް ދޭ މެސެޖުގައި ޒުހުދާ އެދެނީ، އަމިއްލަ މަޞްލަޙަތަށްވުރެ ބޮޑަށް މުޅި ރަށަށް އެންމެ ފައިދާހުރި ގޮތަކީ ކޮބައިތޯ ވިސްނުމަށެވެ. އެގޮތުން އެކުވެރިކަމާއި، ގުޅިގެން މަސައްކަތްކުރުމާއި، ރައްޔިތުންނަށް އިސްކަންދޭ ތަރައްޤީއަށް އޮތް ވަރުގަދަ އަޒުމާއެކު، ޒުހުދާ އަބޫބަކުރު އުންމީދު ކުރަނީ ހުރާގެ ރައްޔިތުންނަށް ޚިދުމަތްކޮށް، އެންމެންނަށް އުޖާލާ މުސްތަޤުބަލެއް ހޯދައިދިނުމަށެވެ.
“ހުރާގެ ލޮބުވެތި ރައްޔިތުންނަށް އަޅުގަނޑު ދޭން ބޭނުންވާ މެސެޖަކީ ހުރިހާ ބޭފުޅުންވެސް ރަށަށް އެންމެ ފައިދާކުރުވަނިވި ގޮތެއް ޙިޔާރު ކުރަށްވައްޗޭ. ހުރިހާ އެންމެނަށްވެސް ފެންނަ އެންމެ ރަނގަޅު ގޮތަށް ވޯޓު ދެއްވާށޭ. ސަރުކާރާއި ގުޅިގެން ދެވެން އޮތް ހުރިހާ އެއްބާރުލުމެއް ދީގެން އަޅުގަނޑު މަސައްކަތް ކުރާނަން ހަމަ ޔަޤީނުންވެސް..” – ޒުހުދާ