ހައްވާ ނަހުމާ: ދިއްފުށި އެ ދަރިއަކަށްޓަކައި ފަހުރުވެރިވުން ހައްގު ދަރިއެއް!

ކ. ދިއްފުއްޓަށް އުފަން ހައްވާ ނަހުމާގެ ގުރުއާން އެންމެ ފުރަތަމަވެސް އަޑުއަހާލަން ލިބުނީ ދާދިފަހުން ކާނިވަލުގައި ބޭއްވި މުފްތީ މެންކްގެ ދަރުހުންނެވެ. އެ އަޑު ކަންފަތު ޖެހުމާއެކު އެންމެ ފުރަތަމަ ވެސް ހިތަށްއެރީ މާޝާﷲ ހާދަ އަޑުއަހާލަން ފަސޭހަ ރީތި އަޑެކެވެ. އަދި އޭގެ އަނެއްދުވަހު އެރިއިރާއެކު ނަހުމާގެ ކިޔެވުމަށް މީހުން ތައުރީފުކޮށް ފޭސްބުކްއަށް ލާފައި ޕޯސްޓްތައް ފެނުމުން ނަހުމާއަށް ގުޅާލާ ވާހަކަދައްކާލާ ހިތްވެސްވިއެވެ.

ތުއްތުއިރުއްސުރެ ޤުރުއާނަށް ޝައުގުވެރިކަން ހުންނަ ނަހުމާއަށް އެންމެ ފުރަތަމަ މުބާރާތެއްގައި ވާދަކޮށް ވަނަ ހާސިލްކުރަންފެށީ އުމުރުން އެންމެ ހަތް އަހަރުންފެށިގެންނެވެ. އެދުވަހުން ފެށިގެން މިއަދާއި ހަމަޔަށް ނަހުމާވަނީ ޤުރުއާން ދަސްކޮށް މަޙްރަޖުން ކިޔެވުމަށް އެތައް ބުރަ މަސައްކަތެއް ކޮށްފަ އެވެ.

ގުރުއާން އުނގެނެން ފެށީ ކާކު ކައިރިން؟
އެކި އުސްތާޛުންގެ ގާތުން ހުންނާނީ ޤުރުއާން އުނގެނިފައި. އެގޮތުން މަންމަ އާއި ބައްޕައަކީ އަޅުގަނޑުގެ ފުރަތަމަ އެދުރު. ދެން ކުރީގެ ސްކޫލް ޤުރުއާން މިސް (އަޒްހީމާ މިސް) ކައިރިންގްރޭޑް ހަތަރަކާއި ހަމަޔަށް ކިޔެވުމަށްފަހު ރަށުގެ ގުރުއާން ކްލާހަކުން 10ގްރޭޑް އެއް ނިމެންދެން ޕާކިސްތާނު އުސްތާޒެއް ކައިރިން ކިޔެވީ.

މިހާތަނަށް ލިބިފައި ހުރި ކާމިޔާބީތަކަކީ ކޮބާ؟
މިހާރު މި ނިމުނީ ބެޗްލާސް ޑިގްރީ އިން ޤުރުއާން ޓީޗިން. ގާރީ ކޯސް އެޑްވާންސް އާއި ހަމަޔަށް ފުރިހަމަ ކުރިން. ދެން ސްކޫލްގަ އުޅުނު އަތޮޅު މުބާރާތްތަކުގައި ބައިވެރިވެގެން ދެވަނަ ނޫނީ ތިންވަނަ ލިބޭ. އައިބީސީގެ ފަރާތުން ލައިފް ގުރުއާން މުބާރާތް 18އ މަތިން އަދި މުޅި މުބާރާތުން ތިން ވަނަ ލިބުނު. އޮފީސްތަކުގެ ގުރުއާން މުބާރާތުގައި އައިޔޫއެމްގެ ފަރާތުން ބައިވެރިވެގެން އަންހެން ގޮފިން މުޅި މުބާރާތުން އަދި މުޅި މުބާރާތުން އެއްވަނަ ލިބުނު. އަދި އަމިއްލަގޮތުން ވާދަކުރިން ކޮވިޑް ތެރޭގައި މުޅި ރާއްޖެއަށް ހުޅުވާލައިގެން ބޭއްވި ޤުރުއާން ބަލައިގެން ކިޔެވުމުގެ ވާޗުއަލް ޤައުމީ މުބާރާތުގައި ވެސް. އެ މުބާރާތުގައި ބައިވެރިވެ، ޙަދަރް ކޮށް ރާގަށް ކިޔެވުމުގެ ބައިން އަންހެން ގޮފިން ތިން ވަނަ ލިބުނު.

ކުރިން ސްކޫލްގެ ފަރާތުންނާއި ގުރުއާން ކްލާހުގެ ފަރާތުަން ހުންނާނެ އަތޮޅު މުބާރާތުގައި ވެސް ބައިވެރިވެގެން ވަނަ ލިބިފަ. ދެން އޭރުވެސް އަތޮޅު މުބާރާތްތަކުގައި ބައިވެރިވެ ވަނަ ހާސިލް ކުރީމަ މީހުން ވަރަށް ހިތްވަރުދޭ. ވަރަށް އުފާވޭ ފުރުސަތު ލިބޭތީވެސް.

ޤުރުއާން އުނގެނުމަށް ބޭނުންކުރާ އުކުޅުތަކަކީ ކޮބާ؟
ވަކި ހާއްސަ އުކުޅެއް ބޭނުމެއް ނުކުރަން. އެކަމަކު އަބަދުވެސް އަކުރުތަކުގެ މަހުރަޖަށް އަދާކޮށް ދޫ ފަސޭހަ ކުރުމަށް މަސައްކަތް ކުރަން. އެހެންވެ ގިނައިން ޤުރުއާން ކިޔަވަނީ. ދެން ވަރަށް ގިނައިން ޤުރުއާން އަޑުއަހަން.

ވަކި ޤާރީއެއްގެ ރާގަށް ކިޔަވަން މަސައްކަތް ކުރަންތޯ؟
ޤުރުއާން ވަކި ރާގަކަށް ކިޔަވަން މަސައްކަތެއް ނުކުރަން. މީދެން ކުޑައިރުގައި އައިސްފަ އިން ރާގު. އެކަމަކު ބައެއް ޓީޗަރުން ބުނޭ ހުސަރީގެ ކިޔެވުމާ ވައްތަރޭ.

އެންމެ އުފާވި ދުވަހަކީ ކޮބައިތޯ؟
އެންމެ އުފާވި ދުވަހަކީ ވާޗުއަލް ޤައުމީ މުބާރާތުން ވަނައެއްގަ ލައްވާލީމަ. އެ މުބާރާތަށް ރާއްޖެއިން ބޭރުންވެސް ވަރަށް ގިނަ މީހުން ބައިވެރިވި. އެހެންވެ އެހާބޮޑު މުބާރާތަކުން ވަނައެއް ލިބުނީމަ ވަރަށް އުފާވި.

ޤުރުއާން އުނގެނުމުގައި ދިމާވި އެންމެ ބޮޑު ގޮންޖެހުންތަކަކީ ކޮބާ؟
ކިޔެވިއިރުގައި ވަރަށް ގޮންޖެހުންތަކާއި ކުރިމަތިލާން ޖެހުނު. ރަށުގައި ގާރީކޯހުގެ ލެވަލް އެކެއް ހެދީ. އޭރު ސްކޫލްގައި ގްރޭޑް 9އެއްގައި ކިޔަވަމުން ގާރީ ކޯސް ހެދީ. މީހުން ފާޑުކިޔުންތައް އޭރު ވަރަށް އަމާޒުވޭ.

ބައެއް މީހުން ބުނޭ ޓީޗަރުން ބުނާގޮތް ހަދައިގެން ކަމަކުނުދާނޭ. އެކަމަކު އަޅުގަނޑު ބުނަން ބޭނުންވަނީ ޓީޗަރ ބުނާގޮތް ހަދާށޭ. ޓީޗަރ ބުނާގޮތް ހަދައިގެންނޭ ކާމިޔާބު ވާނީ.

އަދި ކޮވިޑް ދުވަސްވަރު އަމިއްލަ ރަށުން ޓީޕީ ފުރިހަމަ ކުރިއިރުވެސް ވަރަށް ގޮންޖެހުންތަކާއި ކުރިމަތިލާން ޖެހުނު. އެހެންނަމަވެސް މީމު އަތޮޅު ތައުލީމީ މަރުކަޒުން އަޅުގަނޑު ޓީޕީ-2 ފުރިހަމަ ކުރިއިރު ލިބުނު ހިތްވަރާއި ސަޕޯޓަށް ހިތުގެ އަޑިން ޝުކުރު އަދާކުރަން. އަޅުގަނޑު ބުނެލާނީ ގޮންޖެހުން ތަކާއެކު ކުރިމަތިލާން ޖެހުނަސް ހިތްވަރާއެކު ކުރިއަށް ދާށޭ.

އެންމެ ދެކެން ބޭނުންވާ ދުވަހަކީ ކޮބައިތޯ؟
.ރާއްޖެއިން ބޭރުގެ މުބާރާތެއްގައި ބައިވެރިވުމުގެ ފުރުސަތު ލިބޭނެ ދުވަހެއް. އަދި އެހެން މީހުންނަށް ޤުރުއާން ކެރިއާއެއްގެ ގޮތަށް އުނގަންނައިދެވޭނެ ދުވަހެއް. މިހާރުވެސް ގޭގައި ކުދިންނަށް ކޮންމެވެސް ވަރަކަށް ކިޔަވައިދެން. އެކަމަކު ބެޗްލާސް ޑިގްރީ އާއި ހަމަޔަށް ކިޔެވިޔަސް ރަށުގައި 2 ޤުރުއާން ޓީޗަރުން ތިބުމުން އަދި އެ ފުރުސަތެއް ނުލިބޭ.

މުފްތީގެ ދަރުސްގައި ކިޔެވުމުގެ ފުރުސަތު ލިބުނީ ކިހިނެތްތޯ؟
އެ ފުރުސަތު އަސްލު ދިނީ އިސްލާމިކް މިނިސްޓްރީން. މިނިސްޓްރީން މެސެޖުކުރީ ހަމަޖެހިފަ އިން ވާހަކަ. އާދެވޭނެތޯ؟ އެ ފުރުސަތު ގެއްލުވާލަން ބޭނުންނުވާތީ ފުރުސަތުގެ ބޭނުން ހިފީ.
އެރޭ ކިޔަވާފައި ވަރަށް ޕޮޒިޓިވް ފީޑްބެކްތަކެއް ލިބުނީ. އެންމެންވެސް ބުނި ވަރަށް ރަނގަޅޭ.

ޤުރުއާން އުނގެނުމާއި ގުޅޭގޮތުން އެއްޗެއް ބުނެލަން ބޭނުންތޯ؟
އަޅުގަނޑު ބުނާނީ ގިނަ ވަގުތު ޤުރުއާނުގެ ތެރޭގައި އުޅޭށޭ. މިހާރު ގިނައިން ފެންނަނީ ކޮންމެ ކުއްޖަކު ވެސް ބަނޑިބަނޑި ލައްވައިގެން ރާގުރާގަށް ކިޔެވޭތޯ އުޅޭތަން. އޭގެ ބަދަލުގައި މަހުރަޖަށް ކިޔެވޭތޯ އަކުރުތައް އަދާކުރެވޭތޯ ބަލާށޭ.

ނަހުމާއަކީ މިހާރު މުޅި ދިއްފުށިވެސް ފަހުރުވެރިވާ ޒުވާނެކެވެ. ޤުރުއާން އުނގެނުމުގައި ނަހުމާ ވެފައިވަނީ ނަމޫނާއަކަށެވެ.