ހަރަދުތައް ކުޑަކުރަން ސަރުކާރުން ކުރަމުން އަންނަ މަސައްކަތްތަކަށް އެމްއެމްޕީއާރްސީގެ ފުރިހަމަ އެއްބާރުލުން ލިބޭނެ ކަމަށް އެ ކުންފުނީގެ މެނޭޖިން ޑިރެކްޓަރު އިބްރާހީމް ޝިއުރީ ވިދާޅުވެއްޖެ އެވެ.
“އެކްސް”ގައި އެމްއެމްޕީއާރްސީ އެމްޑީއަށް ހާއްސަ ރަސްމީ އެކައުންޓްއިން ކުރި ޓްވީޓެއްގައި އޭނަ ވިދާޅުވީ ދަޢުލަތުގެ ޚަރަދުތައް ކުޑަކުރަން ރައީސް ޑރ. މުޙައްމަދު މުޢިއްޒު އަޅުއްވަން ނިންމެވި ފިޔަވަޅުތަކަށް ފުރިހަމައަށް ތާޢީދުކުރާކަމަށެވެ. އަދި ރައީސްގެ މި ނިންމެވުމަކީ މި ވަގުތު ރާއްޖެއަށް އެންމެ މަންފާ ކުރާނެ ނިންމެވުން ކަމުގައި ދެކިލައްވާކަމަށް ވިދާޅުވެފައިވެއެވެ.
“މި ނިންމެވުން ތަންފީޒްކުރެއްވުމުގައި ސަރުކާރު ހިއްސާވާ ކުންފުންޏެއްގެ ޙައިސިއްޔަތުން އެމްއެމްޕީއާރްސީގެ ފުރިހަމަ އެއްބާރުލުން ލިބޭނެކަމުގެ ޔަގީންކަން ރައީސުލްޖުމްހޫރިއްޔާއަށް އަރުވަން ” ޝިއުރީ ވިދާޅުވި އެވެ.
ޝިއުރީ ވަނީ ރާއްޖެ އިސްތިހާރުކުރުމުގެ މަސްއޫލިއްޔަތު ހަވާލުކުރެވިފައިވާ ކުންފުނީގެ ހައިސިއްޔަތުން، ފަތުރުވެރިކަމުން ރާއްޖެއަށް ލިބޭ އާމްދަނީ އިތުރުކުރުމަށްޓަކައި ކުރެވެންހުރި ހުރިހާ މަސައްކަތެއް ކުރައްވާނެކަމުގެ ޔަގީންކަންވެސް އަރުވާފައެވެ.