ކުޅުންތެރިންނާއި އޮފިޝަލުންގެ އިންޝުއަރެންސްއަށް ބޭނުންވާ ފައިސާ 2025 ވަނަ އަހަރުގެ ބަޖެޓަށް ވާނީ ހުށަހަޅާފައި ކަމަށް ސްޕޯޓްސް މިނިސްޓަރ ރަފީއު ވިދާޅުވެއްޖެ އެވެ.
މިނިސްޓަރ ރަފީއު މިހެން ވިދާޅުވީ މިއަދު ރައީސް އޮފީހުގައި ބޭއްވުނު ނޫސްވެރިންގެ ބައްދަލުވުމެއްގައެވެ.
މި ބައްދަލުވުމުގައި މިނިސްޓަރ ހާމަކުރެއްވި ގޮތުގައި، ޤައުމީ އެތުލީޓުން، ކުޅުންތެރިންނާއި، އަދި އޮފިޝަލުންގެ މުސާރަ އެއްވަރުކޮށް، އިތުރުކުރުމަށްޓަކައި، މިހާރު މުސާރަ ދޭ އުސޫލު މުރާޖާ ކުރުމުގެ މަސައްކަތް ކުޅިވަރާއި ބެހޭ ޤައުމީ މަޖިލީހުން ދަނީ ކުރަމުންނެވެ.
ކުޅިވަރުގެ މުބާރާތްތަކާ ގުޅޭގޮތުން ވާހަކަދައްކަވަމުން މިނިސްޓަރ ވިދާޅުވީ، މިހާތަނަށް ގާތްގަނޑަކަށް ބައިނަލްއަޤްވާމީ 10 މުބާރާތެއް ރާއްޖޭގައި ވަނީ ބޭއްވިފައި ކަމަށެވެ. އަދި މިހާރު ހިނގަމުންދާ މުބާރާތުގެ އިތުރަށް ބައިނަލްއަޤްވާމީ 6 މުބާރާތެއް ބޭއްވުމަށްވަނީ ހަމަޖެހިފައި ކަމަށްވެސް އެމަނިކުފާނު ހާމަކުރެއްވިއެވެ.
މި ހުރިހާ ކަމަކީވެސް ރާއްޖޭގެ ކުޅިވަރުގެ ދާއިރާ ކުރިއެރުވުމަށާއި، ބައިނަލްއަޤްވާމީ ފެންވަރުގައި ރާއްޖެ ތަމްސީލުކުރާ ކުޅުންތެރިންނާއި އޮފިޝަލުންގެ ޙައްޤުތައް ރައްކާތެރިކުރުމަށް އެޅޭ މުހިންމު ފިޔަވަޅުތަކެއް ކަމަށް މިނިސްޓަރ ފާހަގަކުރެއްވިއެވެ.