ހަތަރުވަނަ ސައުތު އޭޝިއަން ޖޫނިއާ އެތުލެޓިކްސް ޗެމްޕިއަންޝިޕުގެ ހަތަރެއް ގުނަ 100 މީޓަރު ރިލޭ އިވެންޓުން ރާއްޖޭގެ އަންހެން އަދި ފިރިހެން ޓީމުން ބްރޯންޒް މެޑެލް ހޯދައިފިއެވެ.
ޗެންނާއީގެ ޖަވާހަރުލާލް ނެހްރޫ ސްޓޭޑިއަމްގައި ކުރިއަށްދިޔަ މި މުބާރާތުގައި ރާއްޖޭގެ ފިރިހެން ޓީމުން ވަނީ 100 މީޓަރު ރިލޭ 41.98 ސިކުންތުން ނިންމާފައެވެ. ރާއްޖޭގެ ރިލޭ ޓީމުގައި ހިމެނުނީ ހުސެއިން ޒީކް ސުއާދާއި، އިބްރާހީމް ނާހިލް ނިޒާރާއި، ޒުއިޒް މުޙައްމަދު ސުއާދު އަދި މުޙައްމަދު މިންހާލް ޝާމިންއެވެ.
ހަަތަރެއް ގުނަ ސަތޭކަ މީޓަރު ފިރިހެން އިވެންޓުން ލޯ މެޑަލް ރާއްޖެއިން ހޯދާފައިވާއިރު، މި އިވެންޓުގެ ރަން މެޑަލް ހޯދާފައިވަނީ ސްރީލަންކާއިންނެވެ. ސްރީލަންކާއިން ރަން މެޑަލް ހޯދާފައިވަނީ 40.28 ސިކުންތުން ރޭސް ނިންމައިގެންނެވެ. އަދި ރިހި މެޑަލް ހޯދާފައިވަނީ އިންޑިއާ އިންނެވެ. އިންޑިއާއިން ރިހި މެޑަލް ހޯދާފައިވަނީ 40.76 ސިކުންތުން ރޭސް ނިންމައިގެންނެވެ.
މި މުބާރާތުގައި އަންހެނުންގެ 100 މީޓަރު ރިލޭ އިވެންޓުން ރާއްޖެ ލޯ މެޑެލް ހޯދާފައިވަނީ 48.04 ސިކުންތުން ރޭސް ނިންމައިގެންނެވެ. މި ޓީމުގައި ހިމެނުނު ދުވުންތެރިންނަކީ ހައްވާ މުޒްނާ ފާއިޒާއި، އަހުނާ ނިޒާރާއި، ޒިވާ މޫސާ ޝަފީއު އަދި މަރިޔަމް ރޫޔާ އަލީއެވެ.
ހަތަރެއް ގުނަ ސަތޭކަ މީޓަރު އަންހެން އިވެންޓުގެ އެއްވަނަ ހޯދާފައިވަނީ އިންޑިއާ އިންނެވެ. އިންޑިއާ ޓީމުން ރޭސް ނިންމާފައިވަނީ 45.08 ސިކުންތުންނެވެ. މި އިވެންޓުގެ ދެ ވަނަ ހޯދާފައިވަނީ ސްރީލަންކާ ޓީމުންނެވެ. ސްރީލަންކާ ޓީމުން ރޭސް ނިންމާފައިވަނީ 46.48 ސިކުންތެވެ.
މި ފަހަރުގެ މުބާރާތުގައި ރާއްޖެއިން ދެ މެޑެލް ހާސިލުކުރިއިރު، މީގެ ކުރިން ބޭއްވި ދެކުނު އޭޝިއާގެ ޖޫނިއާ އެތުލެޓިކްސް ތިން މުބާރާތުގައި ވާދަކޮށް ރާއްޖެއިން ވަނީ ފަސް މެޑެލް ހާސިލުކޮށްފައެވެ. އެއީ ސްރީ ލަންކާ ކޮލަމްބޯގައި 2007 އަދި 2018 ވަނަ އަހަރު ބޭއްވި މުބާރާތްތަކާއި، 2013 ވަނަ އަހަރު އިންޑިއާގެ ރާންޗީގައި ބޭއްވި މުބާރާތުންނެވެ.
ސައުތު އޭޝިއަން ޖޫނިއާ އެތުލެޓިކްސް ޗެމްޕިއަންޝިޕުން ރާއްޖޭގެ އަންހެން އަދި ފިރިހެން ޓީމުން ލޯ މެޑެލް ހޯދުމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މަރުޙަބާ ވިދާޅުވެފަައެވެ.
ސޯޝަލް މީޑިއާގަިއ ކުރެއްވި ޕޯސްޓެއްގައި ރައީސް ވަނީ ދިވެހި ޒުވާނުން ދެއްކި ހުނަރާއި ހިތްވަރަށް ފަޚުރުވެރިވެވަޑައިގަންނަވާ ކަމަށް ވިދާޅުވެ ދިވެހި ޒުވާން ޓީމަށް ސާބަސް ދެއްވާފައެވެ.