ދިއްފުށި ކައުންސިލް ފުޓްސަލް ފިއެސްޓާ 2024 ގެ އަންހެން ޑިވިޝަންގައި މިރޭ ވާނުވާ ކްއީންސް އާއި ކިކިން ކްއީންސް ބައްދަލުކުރި މެޗު 2-2 ގެ ނަތީޖާއަކުން އެއްވަރުވެ، ވާނުވާ ކްއީންސް ފައިނަލަށް ދަތުރުކޮށްފިއެވެ.
މި މެޗުގެ ފުރަތަމަ ލަނޑު ކާމިޔާބުކޮށް ލީޑު ނެގީ ކިކިން ކްއީންސް އިންނެވެ. މި ލަނޑު އެ ޓީމަށް ކާމިޔާބުކޮށްދިނީ ފުރަތަމަ ހާފުގެ 11 ވަނަ މިނެޓުގައި އެ ޓީމުގެ ޖާޒީ ނަމްބަރު 10، އައިމިނަތު އަޒުމީލާއެވެ. ނަމަވެސް، ކިކިން ކްއީންސް އިން ލީޑު ނެގިތާ ދެތިން މިނެޓު ތެރޭގައި ވާނުވާ އިން ވަނީ ފަހަތުން އަރައި ނަތީޖާ ހަމަކޮށްފައެވެ. އެ ޓީމުގެ ފުރަތަމަ ލަނޑު ޖެހީ ޖާޒީ ނަމްބަރު 3، އައިޝަތު އިންޝާ އަލީއެވެ.
މެޗުގެ ދެވަނަ ހާފުގައި ދެ ޓީމުންވެސް އިތުރު ލަނޑު ޖަހާފައެވެ. އެގޮތުން ކިކިން ކްއީންސްގެ ދެވަނަ ލަނޑު ކާމިޔާބުކޮށްފައިވަނީ ވާނުވާގެ ކުޅުންތެރިއެއްގެ އަތުގައި ބޯޅަޖެހުމުގެ ސަބަބުން ލިބުނު ހިލޭ ޖެހުމެއްގައެވެ. މި ލަނޑު އެ ޓީމަށް ކާމިޔާބުކޮށްދިނީ ޖާޒީ ނަމްބަރު 16، އައިމިނަތު ރިސާލާއެވެ.
މެޗުގައި ކިކިން ކްއީންސް އަށް އުއްމީދު އާ ވެފައިވަނިކޮށް، އެ ޓީމުގެ އަޒުމީލާ ކުރި ފައުލްއަކުން އޭނާއަށް ރީނދޫ ކާޑެއް ދައްކާ، ވާނުވާއަށް ޕެނަލްޓީއެއް ދިނެވެ. މި ފުރުސަތުގެ ބޭނުން ހިފައި ވާނުވާގެ ޖާޒީ ނަމްބަރު 6، ފާތިމަތު ޝާލިޔާ ވަނީ ލަނޑެއްޖަހާ ދެވަނަ ފަހަރަށް ފަހަތުން އަރާ ނަތީޖާ ހަމަހަމަކޮށްފައެވެ.
މި މެޗު ނިމިގެން ދިޔައީ ދެ ޓީމަށް އިތުރު ލަނޑެއް ނުޖެހި އެއްވަރުގައި އޮވެގެންނެވެ.
މި މެޗާއެކު ކިކިން ކްއީންސް މުބާރާތުން ވަކިވިއިރު، ވާނުވާ ވަނީ މުބާރާތުގެ ފައިނަލަށް ދަތުރުކޮށްފައެވެ. ފައިނަލުގައި ހުކުރު ދުވަހުގެ ރޭ ވާނުވާ ކްއީންސް ނިކުންނާނީ ވިކްޓްރީ ވައިޕާސް އާއި ދެކޮޅަށެވެ.