ދިއްފުށި ކައުންސިލް ފުޓްސަލް ފުޓްސަލް ފިއެސްޓާ 2024ގެ ފިރިހެން ޑިވިޝަންގެ ސެމީ ފައިނަލްގެ ފުރަތަމަ މެޗުގައި ސްޓެލްކޯއިން ސެވަން ސްޓާރ އާ ދެކޮޅަށް ކުޅެ، 8-7 ގެ ނަތީޖާއަކުން މޮޅުވެ މުބާރާތުގެ ފައިނަލަށް ދަތުރުކޮށްފިއެވެ.
މިރޭ ކުޅުނު މި މެޗުގެ ފުރަތަމަ ލަނޑު ކާމިޔާބުކުރީ މެޗުގެ 10 ވަނަ މިނެޓުގައި ސެވަން ސްޓާރ އިން ޖާޒީ ނަންބަރު 3، ހުސެއިން ފަޔާޒެވެ. ސެވަން ސްޓާރގެ ދެވަނަ ލަނޑު އެ ޓީމަށް ހޯދައިދިނީ ޖާޒީ ނަންބަރު 7، ރިލްވާން ރަޝީދެވެ. މި މެޗުގެ ފުރަތަމަ ހާފު ނިމުނީ ސެވަން ސްޓަރގެ ތިންވަނަ ލަނޑާއެކުގައެވެ. މި ލަނޑު ޖެހީ ފުޓްސަލް އަދި ފުޓުބޯޅައިގެ ފާހަގަކޮށްލެވޭ ކުޅުންތެރިއެއް ކަމަށްވާ ޖާޒީ ނަންބަރު 10، އަހުމަދު ރިޒުވާނެވެ.
ސްޓެލްކޯއިން މި މެޗުގެ ފުރަތަމަ ލަނޑު ޖެހީ ދެވަނަ ހާފުގެ ފުރަތަމަ ފަސްވަނަ މިނެޓުގެ ތެރޭގައި އެ ޓީމުގެ ޖާޒީ ނަންބަރު 9، އަލީ ހާފިޒެވެ. ސެވަން ސްޓާރގެ ހަތަރުވަނަ ލަނޑު ޖެހީ ސްޓެލްކޯގެ ޖާޒީ ނަންބަރު 6، އަހުމަދު ފަވާޒު ކުރި ފައުލަކުން ރިޒުވާނަށް ލިބުނު ހިލޭ ޖެހުމެއްގައެވެ. މިއީ މެޗުގައި ރިޒްވާންގެ ދެވަނަ ލަނޑެވެ.
އެހެންނަމަވެސް މާގިނައިރެއް ނުވެ ހާފިޒުވަނީ ސްޓެލްކޯގެ ދެވަނަ ލަނޑު ޖަހާފައެވެ. އޭނާ މި ލަނޑު ޖެހީ ލިބުނު ފްރީ ކިކްއެއް ވަރަށް ރީތިކޮށް ގޯލުގެ ތެރެއަށް ފޮނުވާލައިގެންނެވެ. މެޗުގައި ސްޓެލްކޯއަށް ތިންވަނަ ލަނޑު ޖާޒީ ނަންބަރު 4، ހުސެއިން ރަޝީދު ހޯދައިދިން އިރު، ހަތަރުވަނަ ލަނޑު ހޯދައިދިނީ ހާފިޒުގެ ހެޓްރިކުންނެވެ.
މި މެޗުގައި ސްޓެލްކޯ ޓީމުގެ ފަވާޒަށް ރީނދޫ ކާޑުދައްކާފައިވާއިރު، ރެފްރީ ވަނީ ހަމަ އެ ޓީމުގެ މެނޭޖަރަށްވެސް ރަތް ކާޑެއް ދައްކާ ދަނޑުން ފޮނުވާލާފައެވެ.
މި މެޗުގެ ވަގުތު ހަމަވީ ދެ ޓީމު 4-4 ގެ ނަތީޖާގައި އެއްވަރުވެގެން އޮވެއެވެ. އެހެންކަމުން ރެފްރީ ވަނީ ދެ ޓީމަށްވެސް ޕެނަލްޓީ ޖެހުމަށް ފުރުސަތު ދީފައެވެ.
ޕެނަލްޓީ ޖަހަންދިން ފުރުސަތުގައި ސްޓެލްކޯއިން ދެ ޕެނަލްޓީ ދިފާއުކޮށް، ފަހަތުން އަރާ ވަނީ މުބާރާތުގެ ފައިނަލުން ޖާގަ ކަށަވަރުކޮށްފައެވެ.