ދިއްފުށި ކައުންސިލް ފުޓްސަލް ފިއެސްޓާ 2024ގެ ފިރިހެން ޑިވިޝަންގެ ސެމީ ފައިނަލްގެ ދެވަނަ މެޗުގައި ވާނުވާ އެފްޓީން، ފަސޭހަކަމާއެކު ވާނުވާ ޖޫނިއަރ އަތުން 8-1 އިން މޮޅުވެ، މުބާރާތުގެ ފައިނަލަށް ދަތުރުކޮށްފައެވެ.
މި މެޗު ފެށިގެން އައި ފުރަތަމަ މިނެޓުގައި އެފްޓީގެ ޖާޒީ ނަންބަރު 11، ޒައިން ޒަފަރު ވަނީ ޓީމުގެ ފުރަތަމަ ލަނޑު ޖަހާފައެވެ. އަދި ހަމަ އެ ކުޅުންތެރިޔާ ވަނީ ޓީމުގެ ދެވަނަ ލަނޑުވެސް ކާމިޔާބުކޮށްދީފައެވެ.
މެޗުގެ ފުރަތަމަ ހާފު ނިންމާލާފައިވަނީ އެފްޓީގެ ޖާޒީ ނަންބަރު 6، ޝައިހާން ފާއިޒް ޖަހައިދިން ގޯލާއެކުގައެވެ.
ދެވަނަ ހާފުގެ ފުރަތަމަ މިނެޓުގައި އެފްޓީގެ ޖާޒީ ނަންބަރު 13، އިބްރާހިމް ޝިނާޒު ވަނީ ޓީމުގެ ހަތަރުވަނަ ލަނޑު ޖަހާފައެވެ. އޭގެ ކުޑައިރުކޮޅެއްގެ ތެރޭގައި ޒައިން ޒަފަރު ވަނީ އޭނާގެ ހެޓްރިކް ފުރިހަމަކޮށް، ޓީމުގެ ފަސްވަނަ ލަނޑު ޖަހާފައެވެ. މިއީ މި މުބާރާތުގައި ޒައިން ހެޓްރިކް ހެދި ދެވަނަ މެޗެވެ.
އެފްޓީގެ ހަވަނަ ލަނޑު ޖަހާފައިވަނީ ޝިނާޒްއެވެ. އަދި އެޓީމުގެ ހަތްވަނަ ލަނޑަކީ ޒައިންގެ ހަތަރުވަނަ ލަނޑެވެ. މެޗުގެ އެންމެ ފަހު ލަނޑު ޖަހާފައިވަނީ ޖާޒީ ނަންބަރު 9، އަޙްމަދު މާޒިންއެވެ. އޭނާ މި ލަނޑު ޖަހާފައިވަނީ ގޯލް ކުރިމަތިން ފަސޭހަކަމާއެކު ބެކްހީލްއެއް ޖައްސައިގެންނެވެ.
ނަމަވެސް މެޗު ނިމެން މަދު ސުކުންތުކޮޅަކަށް ވެފައިވަނިކޮށް ސަތޯރާ ޓީމުގެ ނަޖާހު ވަނީ އެ ޓީމަށް ލަނޑެއް ޖަހާދީފައެވެ.
މިރޭ އޮންނަ ފައިނަލް މެޗުގައި ވާނުވާ އެފްޓީ ނުކުންނާނީ ސްޓެލްކޯއާ ދެކޮޅަށެވެ. މީގެއިތުރުން އަންހެން ޑިވިޝަނުން ވާނުވާ ކްއީންސް އާއި ވިކްޓްރީ ވައިޕާސް ވެސް ވަނީ ފައިނަލަށް ދަތުރުކޮށްފައެވެ.
މި ދެ ފައިނަލް މެޗު ކުޅޭނީ މިރޭ ދިއްފުށީ ފުޓްސަލް ދަނޑުގައެވެ.
މި މުބާރާތުގައި އަންހެނުންނާއި ފިރިހެނުންގެ ޑިވިޜަންތައް ހިމެނޭއިރު، ކޮންމެ ޑިވިޜަނެއްގެ ޗެމްޕިއަން ޓީމަށް 30,000 ރުފިޔާގެ ފައިސާގެ އިނާމާއި، ރަނަރަޕް ޓީމަށް 10,000 ރުފިޔާގެ ފައިސާގެ އިނާމް ދިނުމަށް ވަނީ ހަމަޖެހިފައެވެ.