ދިއްފުށި ކައުންސިލުން އިންތިޒާމުކޮށްގެން ބާއްވާ ފުޓްސަލް ފިއެސްޓާ 2024ގެ ފޯރިގަދަ ފައިނަލް މެޗްތައް މިރޭ ކުޅުމަށް ވަނީ ހަމަޖެހިފައެވެ. މި މުބާރާތުގެ އަންހެން އަދި ފިރިހެން ޑިވިޝަންގެ ފައިނަލް މެޗުތައް ކުޅޭނީ ދިއްފުށީ ފުޓްސަލް ދަނޑުގައެވެ.
އަންހެން ޑިވިޝަންގެ ފައިނަލްގައި ވިކްޓްރީ ވައިޕާސް އާއި ވާނުވާ ކްއީންސް ބައްދަލުކުރާއިރު، މި މެޗު ފެށުމަށް ހަމަޖެހިފައިވަނީ މިރޭ 8:15 ގައެވެ. އަދި ފިރިހެން ޑިވިޝަންގެ ފައިނަލްގައި ސްޓެލްކޯ އާއި ވާނުވާ އެފްޓީ ބައްދަލުކުރާއިރު، މި މެޗު ފެށުމަށް ހަމަޖެހިފައިވަނީ މިރޭ 9:15 ގައެވެ.
ފައިނަލަށް ދިޔަ ޓީމުތަކުން ވަނީ މުބާރާތުގައި ވަނީ މޮޅު ކުޅުމެއް ދައްކައި، ގިނަ ގޯލުތަކެއް ޖަހާފައެވެ. ދިއްފުށީ ކައުންސިލުން މުޅިން އަލަށް ބޭއްވި މި މުބާރާތުގައި ޖުމްލަ 9 ޓީމަކުން ވަނީ ބައިވެރިވެފައެވެ. މީގެ ތެރޭގައި ހިމެނެނީ އަންހެން ޑިވިޝަނުން 3 ޓީމާއި ފިރިހެން ޑިވިޝަނުން 6 ޓީމެވެ.
މި މުބާރާތުގައި ކޮންމެ ޑިވިޝަނެއްގެ ޗެމްޕިއަން ޓީމަށް 30,000 ރުފިޔާގެ ފައިސާގެ އިނާމާއި، ރަނަރަޕް ޓީމަށް 10,000 ރުފިޔާގެ ފައިސާގެ އިނާމް ދިނުމަށް ވަނީ ހަމަޖެހިފައެވެ.
މި މެޗުތައް މިރޭ ދިއްފުށީ ކައުންސިލްގެ ފޭސްބުކް ޕޭޖުން ވެސް ލައިވްކުރާނެއެވެ.