ދިއްފުށި ކައުންސިލުން އިންތިޒާމުކޮށްގެން ބޭއްވި “ދިއްފުށި ކައުންސިލް ފުޓްސަލް ފިއެސްޓާ 2024” ގެ އަންހެން ޑިވިޝަންގެ ޗެމްޕިއަންކަން ވާނުވާ ކްއީންސް އިން ހޯދައިފިއެވެ. މި މުބާރާތުގެ ފައިނަލް މެޗުގައި ވާނުވާ ކްއީންސް ވަނީ ވިކްޓްރީ ވައިޕަރސް އާ ދެކޮޅަށް ކުޅެ 3-0 ގެ ނަތީޖާއިން މޮޅުވެފައެވެ.
މި މެޗުގެ ފުރަތަމަ ލަނޑު ޖެހީ މެޗު ފެށިގެން ދެވަނަ މިނެޓުގައި ވާނުވާ ކްއީންސްގެ ޖާޒީ ނަންބަރު 6، ފާތިމަތު ޝާލިޔާއެވެ. ދެވަނަ ލަނޑު ޖަހާފައިވަނީ ހަމަ އެ ޓީމުގެ ޖާޒީ ނަންބަރު 17، ރަހުމާ ރުޝްދީއެވެ. މި ދެ ލަނޑުވެސް އެ ޓީމުން ހޯދީ މެޗުގެ ފުރަތަމަ ހާފުގައެވެ.
މެޗުގެ ދެވަނަ ހާފުގައި ވާނުވާ ކްއީންސް އިން ވަނީ އިތުރު ލަނޑެއް ހޯދާފައެވެ. ޓީމުގެ ތިންވަނަ ލަނޑުވެސް ކާމިޔާބުކޮށްދީފައިވަނީ ރަހުމާ ރުޝްދީއެވެ.
މި ތިން ގޯލާއެކު ވާނުވާ ކްއީންސް އިން ވަނީ “ދިއްފުށި ކައުންސިލް ފުޓްސަލް ފިއެސްޓާ 2024” ގެ އަންހެން ޑިވިޝަންގެ ޗެމްޕިއަންކަން ހޯދާފައެވެ. އަދި އަންހެން ޑިވިޝަންގެ ރަނަރަޕް ޓީމަކަށް ހޮވިފައިވަނީ ވިކްޓްރީ ވައިޕަރއެވެ.
މި މުބާރާތް ފެށިފައިވަނީ މިމަހުގެ 4 ވަނަ ދުވަހުއެވެ. މި މުބާރާތުގައި ކޮންމެ ޑިވިޝަނެއްގެ ޗެމްޕިއަން ޓީމަށް ވަނީ 30,000 ރުފިޔާގެ ފައިސާގެ އިނާމާއި، ރަނަރަޕް ޓީމަށް 10,000 ރުފިޔާގެ ފައިސާގެ ހަވާލުކޮށްފައެވެ.