ދިއްފުށި ކައުންސިލުން އިންތިޒާމުކޮށްގެން ބޭއްވި “ދިއްފުށި ކައުންސިލް ފުޓްސަލް ފިއެސްޓާ 2024” ގެ ފިރިހެން ޑިވިޝަންގެ ޗެމްޕިއަންކަން ވާނުވާ އެފްޓީއިން ހޯދައިފިއެވެ. މި މުބާރާތުގެ ފައިނަލް މެޗުގައި ސްޓެލްކޯ އަތުން ވާނުވާ އެފްޓީ މޮޅުވެފައިވަނީ 3-1 ގެ ނަތީޖާއިންނެވެ.
މި މެޗުގެ ފުރަތަމަ ގޯލު ޖަހާފައިވަނީ ސްޓެލްކޯއިންނެވެ. އެޓީމަށް ގޯލުޖަހައިދިނީ ޖޯޒީ ނަމްބަރު 4، ހުސެއިން ރަޝީދެވެ. މިއީ މި މެޗުގައިވެސް ސްޓެލްކޯއަށް ލިބުނު ހަމައެކަނި ގޯލެވެ.
މެޗުގައި އެފްޓީގެ ފުރަތަމަ ގޯލު ހޯދައިދިނީ ޖާޒީ ނަމްބަރު 13، އިބްރާހިމް ޝިނާޒެވެ. އެފްޓީގެ ދެވަނަ ގޯލު ޖާޒީ ނަމްބަރު 11، ޒައިން ޒަފަރު ހޯދާފައި ވަނީ ސްޓެލްކޯގެ ހުސެއިން ރަޝީދު ކުރި ފައުލަކުންނެވެ. އެފްޓީގެ ތިންވަނަ ގޯލުވެސް ހޯދައިދީފައިވަނީ ޒައިންއެވެ.
މިއާއެކު އެފްޓީން ވަނީ “ދިއްފުށި ކައުންސިލް ފުޓްސަލް ފިއެސްޓާ 2024” ގެ ފިރިހެން ޑިވިޝަންގެ ޗެމްޕިއަންކަން ހޯދާފައެވެ. މި މުބާރާތުގެ ރަނަރަޕް ޓީމަކަށް ދިޔައީ ސްޓެލްކޯއެވެ.
މި މުބާރާތުގައި އެފްޓީން ދައްކާލާފައިވަނީ ވަރަށް ފާހަގަކޮށްލެވޭ މޮޅުކުޅުމެކެވެ. ޚާއްޞަކޮށް ޒައިން ޒަފަރު ވަނީ އެ ޓީމަށް ގިނަ ގޯލުތަކެއް ހޯދައިދީ ދެ މެޗެއްގައި ހެޓްރިކްވެސް ހަދާފައެވެ.
މި މުބާރާތް ފެށިފައިވަނީ މިމަހުގެ 4 ވަނަ ދުވަހުއެވެ. މި މުބާރާތުގައި ކޮންމެ ޑިވިޝަނެއްގެ ޗެމްޕިއަން ޓީމަށް ވަނީ 30,000 ރުފިޔާގެ ފައިސާގެ އިނާމާއި، ރަނަރަޕް ޓީމަށް 10,000 ރުފިޔާގެ ފައިސާގެ އިނާމު ހަވާލުކޮށްފައެވެ.