ހައްދުންމަތީގެ ސްކޫލް މަދަރުސާތަކަށް ހުޅުވާލައިގެން އަތޮޅު ކައުންސިލުން ކުރިޔަށް ގެންދާ 3ވަނަ ފުޓްބޯޅަ މުބާރާތުގެ ފައިނަލަށް ލ.އަތޮޅު ތަޢުލީމީ މަރުކާއި ލ.އަތޮޅު މަދަރުސާ ދަތުރުކޮށްފިއެވެ.
ދެ ގްރޫޕަކަށް ބަހާލައިގެން ކުޅުނު މި މުބާރާތުގައި އަތޮޅުގެ 11 ސްކޫލަކުން ވާދަކޮށްފައި ވެއެވެ. 5 ޓީމު ހިމެނޭ ގްރޫޕް1ގެ އެއްވަނަ ހޯދީ އަތޮޅު ތަޢުލީމީ މަރުކަޒެވެ.
އެ ޓީމު ވަނީ ފުރަތަމަ މެޗްގައި، އިންޓަރ ސްކޫލް ފުރަތަމަ ފުޓްބޯޅަ މުބާރާތުގެ ޗެމްޕިއަން ހަމަދު ސްކޫލް 2-0 ލަނޑުން ބަލިކޮށްފައެވެ. އަދި ދެވަނަ މެޗްގައި، އިންޓަރ ސްކޫލް ދެވަނަ ފުޓްބޯޅަ މުބާރާތުގެ ޗެމްޕިއަން މާމެންދޫ ސްކޫލް 1-0 ލަނޑުން ބަލިކޮށްފައެވެ. ތަޢުލީމީ މަރުކަޒު ސެމީ ފައިނަލަށް ދަތުރުކުރީ ކުޅުނު 4 މެޗުން މޮޅުވެ، 12 ޕޮއިންޓާއި ފައިދާ 12 ގޯލު ޖަހައިގެންނެވެ.
މި މުބާރާތުގެ ގްރޫޕް ސްޓޭޖްގައި އެ ޓީމު ކުޅުނު މެޗްތަކުގައި ބައިކޮޅަށް އެއްވެސް ގޯލެއް ވަދެފައެއް ނުވެއެވެ. ސެމީފައިނަލުގައި ތަޢުލީމީ މަރުކަޒު ބައްދަލުކުރީ، ކުޅުނު 5 މެޗްގެ ތެރެއިން 4 މެޗުން މޮޅުވެ 1 މެޗް އެއްވަރުކޮށްގެން ގްރޫޕް2ގެ ދެވަނަ ލިބުނު މާވަށު ސްކޫލާއެވެ. ސެމީފައިނަލުގައި ތަޢުލީމީ މަރުކަޒުން ކުރި ހޯދީ މެޗްގެ ފުރިހަމަ ވަގުތު ހަމަވިއިރު ދެ ޓީމު އެއްވަރުވެގެން ނަތީޖާ ނެރެން ޖެހި ޕެނަލްޓީގައި 5-4 ލަނޑުން މެޗް ކާމިޔާބު ކޮށްގެންނެވެ.
ލ.އަތޮޅު މަދަރުސާ ސެމީ ފައިނަލަށް ދަތުރުކުރީ ގްރޫޕް2ގައި އެ ޓީމު ކުޅުނު 5 މެޗްގެ ތެރެއިން 4 މެޗުން މޮޅުވެ 1 މެޗުން އެއްވަރު، ގްރޫޕް2ގެ އެއްވަނަ ޓީމުގެ ގޮތުގައެވެ. ސެމީ ފައިނަލުގައި އަތޮޅު މަދަރުސާ ބައްދަލުކުރީ ވޭތުވެ ދިޔަ ދެ މުބާރާތުގެ ފައިނަލުގައި ކުޅެފައިވާ ހަމަދު ސްކޫލާއެވެ. ސެމީފައިނަލް މެޗް އަތޮޅު މަދަރުސާއިން ކާމިޔާބު ކުރީ 1-0 ލަނޑުންނެވެ.
މިއީ ލާމަސީލު ލާމު އިންޓަރ ސްކޫލް ފުޓްބޯޅަ މުބާރާތުގައި މި ދެޓީމު ވެސް ކުޅޭ ފުރަތަމަ ފައިނަލެވެ. އަތޮޅަށް ނިސްބަތްވާ ބޮޑު ދެ ސްކޫލް ވާދަކުރާ ފައިނަލް މެޗް އޮންނާނީ އޮކްޓޯބަރ 16 ވާ އާދިއްތަ ދުވަހުގެ ހަވީރު 4:15ގައި ލ.ގަމު ޒޯން ސްޓޭޑިއަމްގައެވެ.