ޕްރިންސެސް އޮފް ވޭލްސް ކެތަރިންއަށް ކެންސަރު ޖެހިފައިވާ ކަމަށާއި ފަރުވާގެ “ފުރަތަމަ މަރުހަލާގައި” ހުންނެވިކަން އިއުލާން ކުރައްވައިފިއެވެ.
ކޭޓްގެ ނަމުން މަޝްހޫރުވެފައިވާ ޕްރިންސަސް ހުކުރު ދުވަހު ވަނީ އޭނާގެ ބަލި ދެނެގަތުމަކީ ވަރަށް ބޮޑު ޝޮކެއްގެ ގޮތުގައި ސޯޝަލް މީޑިއާގައި އާންމުކުރި ވީޑިއޯ ސްޓޭޓްމަންޓެއްގައި ސިފަކޮށްފަ އެވެ. މިކަން ހާމަކޮށްފައި މިވަނީ އެކަމަނާ ވަގުތީ ގޮތުން އާންމު ދިރިއުޅުމާ ދުރަށް ވަޑައިގެންނެވިތާ ދެ މަސް ފަހުން ނެވެ. ކެންސިންޓަން ޕެލަސްއިން އޭރު ބުނި ގޮތުގައި އެކަމަނާ ވަނީ ކެންސަރު ނެތް ބަނޑުގެ ބައްޔެއްގެ ސާޖަރީއެއް ހައްދަވާފައެވެ.
“ޖެނުއަރީ މަހުގެ ތެރޭގައި ލަންޑަނުގައި ބަނޑުގެ ބޮޑު އޮޕަރޭޝަނެއް ކުރިއިރު، އޭރު ހީކުރެވުނީ އަހަރެންގެ ބައްޔަކީ ކެންސަރު ނޫން ކަމަށް،” އިނގިރޭސި ރަސްގެފާނުގެ ވާރިސު ޕްރިންސް ވިލިއަމްއާ ކައިވެނި ކޮށްގެން އުޅޭ ކޭޓް، 42، ވިދާޅުވިއެވެ.
“ސާޖަރީ ކާމިޔާބުވީ ނަމަވެސް އޮޕަރޭޝަނަށް ފަހު ހެދި ޓެސްޓުތަކުން ކެންސަރު ހުރިކަން އެނގުނު. އެހެންކަމުން އަޅުގަނޑުގެ މެޑިކަލް ޓީމުން ލަފާދިނީ ޕްރިވެންޓިވް ކީމޯތެރަޕީ ހަދަން ޖެހޭ ކަމަށް. މިހާރު އަހަރެން ހުރީ އެ ފަރުވާގެ ފުރަތަމަ މަރުހަލާގައި” ކޭޓް ވިދާޅުވިއެވެ.
ކޭޓް އިތުރަށް ބުނީ ޕްރިންސް ވިލިއަމް އާއި އޭނާގެ ޒުވާން އާއިލާއަށްޓަކައި ޕްރައިވެޓްކޮށް މިކަން ޕްރޮސެސްކޮށް މެނޭޖް ކުރުމަށް ކުރެވެން ހުރި ހުރިހާ މަސައްކަތެއް ކުރަމުން އަންނަ ކަމަށެވެ..
އަދި ހީކުރާ ފަދައިން މިކަމަށް ވަގުތު ނަގާފައިވާ ކަމަށެވެ. ފުރަތަމަ ފަރުވާ ފެށުމަށްޓަކައި ބޮޑު ސާޖަރީއަކުން ރަނގަޅުވާން ވަގުތު ނެގިކަމަށާއި، އެކަމަކު އެންމެ މުހިންމު ކަމަކީ ޖޯޖް، ޗާލޮޓް އަދި ލުއީއަށް ހުރިހާ ކަމެއް ވެސް އެމީހުންނަށް އެކަށީގެންވާ ގޮތަކަށް ކިޔައިދީ، އަދި ކޭޓް ރަނގަޅުވާނެ ކަމުގެ ޔަގީންކަން ދޭން ނެގި ވަގުތުކަމަށް ވިދާޅުވެފައިވެއެވެ.
ޕްރިންސް ވިލިއަމް އެކަމަނާގެ އަރިހުގައި ހުންނެވުމަކީ ވަރަށް ބޮޑު ހިތްހަމަޖެހުމެއްކަން ފާހަގަކޮށް އެކަމަނާ ވަނީ ޕްރިންސް ވިލިއަމްއަށް ތައުރީފު ކުރައްވާފައެވެ.
“އަޅުގަނޑުމެން އުންމީދު ކުރަން، ތިޔަބޭފުޅުންނަށް ވިސްނޭނެ ކަމަށް، އާއިލާއެއްގެ ހައިސިއްޔަތުން، އަޅުގަނޑު ގެ ފަރުވާ ނިންމާއިރު، އަޅުގަނޑުމެންނަށް މިހާރު ވަގުތު، ޖާގަ އަދި ޕްރައިވެސީ ބޭނުންވޭ. އަޅުގަނޑު އުންމީދު ކުރަނީ އަޅުގަނޑަށް ރަނގަޅުވެ އެނބުރި އާދެވޭނެކަމަށް އެކަމަކު މިވަގުތަށް އަޅުގަނޑު ސަމާލުކަން ދޭން ޖެހޭނީ ފުލް ރިކަވަރީއަކަށް،” ޕްރިންސަސް ވިދާޅުވި އެވެ.
މި މެސެޖު ނިންމަވާލައްވަމުން ކޭޓް ވަނީ ކެންސަރުގެ އަސަރު ކޮށްފައިވާ އެންމެންނާއެކުގައި ވެސް ވާކަމަށް ވިދާޅުވެފައެވެ.
އެނގިފައިވާގޮތުގައި ޕްރިންސް އާއި ޕްރިންސެސް އޮފް ވޭލްސް ބޭނުންވީ އެކަން އިއުލާނު ކުރުމުގެ ކުރިން އެމީހުންގެ ކުޑަ ކުދިން އީސްޓާ ޗުއްޓީއަށް ސްކޫލަށް ނުކުންނާނެ އިރަކަށް އިންތިޒާރު ކުރުމަށެވެ. އަދި ޕްރިންސް ވިލިއަމް ގެންދަވަނީ އެމަނިކުފާނުގެ އަނބިކަނބަލުންނާއި ދަރިންނަށް އެއްބާރުލުން ދެއްވަމުން، އާންމުންގެ މެދުގައި އުފެދިފައިވާ މަސްއޫލިއްޔަތުތައް އަދާކޮށް ބެލެންސް ކުރައްވަމުން ކަމަށާއި އެކަން ކުރިއަށް ގެންދަވާނެ ކަމަށް ޝާހީ މަސްދަރަކުން ބުނެއެވެ.
ކޭޓްގެ ޕްރިވެންޓިވް ކީމޯތެރަޕީ ފެށީ ފެބްރުއަރީ މަހުގެ ފަހުކޮޅުއެވެ. އީސްޓާއަށް ފަހު ކޭޓް އެނބުރި ރަސްމީ ޑިއުޓީއަށް އަންނާނެ ކަމަށް ބެލެވުނު ނަމަވެސް މިހާރު އޭނާގެ މެޑިކަލް ޓީމުން އެކަމަށް ހުއްދަ ލިބެންދެން އިތުރު މަސައްކަތްތައް ފަސްކުރާނެ ކަމަށް މައުލޫމާތު ލިބެއެވެ.
ކެންސިންޓަން ޕެލަސްއިން ކެންސަރުގެ ބާވަތް އަދި ކޮން މަރުހަލާއެއްކަން ފަދަ އިތުރު މެޑިކަލް ތަފްސީލެއް ހާމައެއް ނުކުރެއެވެ.
މިދިޔަ ފެބްރުއަރީ މަހުގެ ކުރީކޮޅު ބަކިންހަމް ޕެލަސްއިން ވަނީ ރަސްގެފާނު ޗާލްސް ތިންވަނަ ކެންސަރު ބައްޔަށް ގެންދަވާކަން ވެސް އިއުލާންކުރައްވާފަ އެވެ.
ރަސްގެފާނު ޗާލްސް ހުކުރު ދުވަހުގެ ރޭ ވިދާޅުވީ، ކެންސަރު ބަލީގެ އަލާމާތްތައް ދެނެގަތުމުގައި އޭނާގެ ދަނބިދަރިކަލުން ކެތަރިން ދެއްކެވި ހިތްވަރާ މެދު ފަޚުރުވެރިވާ ކަމަށެވެ.