މިއަހަރުގެ ހައްޖުގެ އަޅުކަމުގައި 550 ހައްޖުވެރިން މަރުވެފައިވަނީ ހޫނުގަދަވުމުގެ ސަބަބުން ދިމާވި މައްސަލަތަކުގެ ސަބަބުންކަމަށް ސައުދީ އަރަބިއްޔާގެ ޑިޕްލޮމެޓިކް މަސްދަރުތަކުން އަންގާރަ ދުވަހު ކަށަވަރުކޮށްދީފިއެވެ.
މިދިޔަ ހޯމަ ދުވަހު މައްކާގެ ހަރަމްފުޅުގެ ހޫނުމިން ވަނީ 51.8 ޑިގްރީ ސެލްސިއަސް އަށް އުފުލިފަ އެވެ. މަރުވި މީހުންގެ ތެރޭގައި ގިނައީ މިސްރުގެ ހައްޖުވެރިންގެ އިތުރުން އުރުދުންގެ 60 މީހަކާއި އީރާނުގެ ފަސް މީހެކެވެ.
މަރުވި މީހުންގެ ތެރެއިން 323 މީހުންނަކީ މިސްރުގެ ރައްޔިތުންނެވެ. އަދި ހައްޖުވެރިން މަރުވެފައިވަނީ ގަދަހޫނުގެ ސަބަބު ކަމަށް އޮފިޝަލުން ބުނެއެވެ.
ދާދި ފަހުން ޖާނަލް އޮފް ޓްރެވަލް އެންޑް މެޑިސިންއިން ނެރުނު ސައޫދީން ކުރި ދިރާސާއެއްގައި ވަނީ ހައްޖުގެ އަޅުކަން ކުރާ ސަރަހައްދުތަކުގެ ފިނިހޫނުމިން ކޮންމެ ދިހަވަރަކަށް އަހަރަކުން 0.4 ޑިގްރީ ސެލްސިއަސް އަށް މަޑުމަޑުން އިތުރުވެ، މޫސުމަށް އަންނަ ބަދަލުތަކުގެ ސަބަބުން ކުރާ ނޭދެވޭ އަސަރު ތައް ދައްކުވައިދީފަ އެވެ.
ހޯމަ ދުވަހު ފިނިހޫނުމިން 50 ޑިގްރީއިން މައްޗަށް ގޮސްފައިވާއިރު، މިސްރުގެ ޚާރިޖީ ވުޒާރާއިން ވަނީ ގެއްލުނު މިސްރުމީހުން ހޯދުމުގައި ސައުދީގެ ކަމާބެހޭ ފަރާތްތަކާ ގުޅިގެން މަސައްކަތްކޮށްފައިވާކަން ކަށަވަރުކޮށްދީފައިވީ ނަމަވެސް މަރުވި މީހުންގެ އަދަދު ހާމަކޮށްފައެއް ނުވެއެވެ.
ސައުދީގެ ކަމާބެހޭ ފަރާތްތަކުން ނިއުސް އެޖެންސީތަކަށް މައުލޫމާތު ދެމުން ބުނީ އާދީއްތަ ދުވަހުން ފެށިގެން މަރުވި މީހުންގެ އަދަދުގެ އެއްވެސް އަޕްޑޭޓެއް ލިބިފައި ނުވި ނަމަވެސް ހޫނު ގަދަވުމުގެ ސަބަބުން 2،000 އަށް ވުރެ ގިނަ ހައްޖުވެރިންނަށް ފަރުވާ ދީފައިވާ ކަމަށެވެ.
މިދިޔަ އަހަރު އެކި ގައުމުތަކުން ހައްޖަށް ދިޔަ މީހުންގެ ތެރެއިން މަދުވެގެން 240 މީހުން މަރުވެފައިވާ އިރު، އޭގެ ތެރޭގައި ގިނައީ އިންޑޮނޭޝިއާ މީހުންނެވެ.