މާތްވެގެންވާ ގެފުޅުގެ ބެލެހެއްޓުންތެރިޔާ، ޝެއިޚް ސާލިހް އަލް ޝައިބީ ގިނަ ދުވަސްތަކެއް ވަންދެން އާލާސްކަންފުޅާއި އުޅުއްވުމަށްފަހު މިއަދު އަވަހާރަވެއްޖެ އެވެ.
ޝައިޚް ޞާލިޙް އަލް ޝައިބީއަކީ ކައުބާގެ ތަޅުދަނޑި އެންމެ ފުރަތަމަ ޙަވާލުކުރެއްވި ރަސޫލާ މުޙައްމަދު ޞައްލަالله ޢަލައިހި ވަސައްލަމަގެ އަރިހުގައި ހުންނެވި ޢުޘްމާން ބިން ތަލްހާގެ އަރިހުގައިވާ ސަފުގެ 109 ވަނަ ބޭކަލެވެ.
އަލް ޝައިބީ ފަސްދާނުލައްވާފައި ވަނީ މަސްޖިދުލް ޙަރަމްގައި ކަށުނަމާދު ކުރުމަށްފަހު، މައްކާގެ އަލް މުޢައްލާ ގަބުރުސްތާނުގައެވެ.
2013 ވަނަ އަހަރު ގެފުޅު ބަލަހައްޓާ ފަރާތުގެ މަގާމާ ހަވާލުވެވަޑައިގެންނެވި އަލް ޝައިބީ އަކީ އޭނާގެ އާއިލާގެ 77 ވަނަ މެމްބަރެވެ.
ގެފުޅު ބެލެހެއްޓުމުގެ ޢާއިލާގެ މަސްއޫލިއްޔަތުތަކުގެ ތެރޭގައި ގެފުޅުގެ ކަންކަން ބެލެހެއްޓުމާއި، ސާފުކުރުމާއި، އެތަނުގެ ކިސްވާ (ކަވަރު) މަރާމާތުކުރުމާއި، ޒިޔާރަތްކުރާ މީހުންނަށް މެހެމާންދާރީ އަދާކުރުމާއި، އެކަމާ ގުޅުންހުރި އެންމެހާ މަސައްކަތްތައް ބެލެހެއްޓުން ހިމެނެއެވެ.
އަލްޝައިބީ އަކީ އިސްލާމީ ޢިލްމުގެ ރޮނގުން ޑޮކްޓަރޭޓް ހާސިލްކުރައްވާފައިވާ ބޭފުޅެކެވެ. އަދި ދީނާއި ތާރީޚާ ބެހޭ ގޮތުން ގިނަ ފޮތްތަކެއް ލިޔުއްވައި، ރޫޙާނީ އަދި ޢިލްމީގޮތުން މުޖުތަމަޢަށް ވަރަށް ބޮޑު އެހީތެރިކަމެއް ދެއްވި ބޭފުޅެކެވެ.
އަލް ޝައިބީ އަވަހާރަވުމާ ގުޅިގެން ސައުދީ ރަސްގެފާނު ސަލްމާން ބިން އަބްދުލް އަޒީޒާއި ވަލީއަހުދު މުހައްމަދު ބިން ސަލްމާން ވަނީ ހިތާމަ ފާޅުކުރައްވާފައެވެ.