އދ.ގެ ސަލާމަތީ މަޖިލީހުގެ ޒަމާންވީ އޮނިގަނޑު އިސްލާހުކޮށް އެފްރިކާއަށް ދާއިމީ ގޮނޑިއެއް ދިނުމަށް އދ.ގެ ޗީފް ގޮވާލައްވައިފިއެވެ.
މަތީ ފަންތީގެ ބަހުސްގައި ހޯމަ ދުވަހު ކައުންސިލާ މުހާތަބު ކުރައްވާ ސެކްރެޓަރީ ޖެނެރަލް އެންޓޯނިއޯ ގުޓަރޭޒް ވިދާޅުވީ ޔޫއެންއެސްސީގެ ކޮމްޕޮޒިޝަން ބަދަލުވަމުން އަންނަ ދުނިޔެއާ އެއްގޮތަށް ކުރިއަށް ނުގެންދެވިފައިވާ ކަމަށެވެ.
“ބިލިއަން މީހުންގެ އާބާދީއެއް އޮންނަ ކޮންޓިނެންޓަކަށް ދުނިޔޭގެ އެންމެ އިސް ސުލްހަ އާއި ސަލާމަތީ އިދާރާގައި ދާއިމީ އަޑެއް ނެތް ކަމަށް އަޅުގަނޑުމެންނަކަށް ގަބޫލެއް ނުކުރެވޭ… އަދި އެފްރިކާގެ ވިސްނުން، ސުލްހައާއި ސަލާމަތާ ބެހޭ ގޮތުން އުފެދިފައިވާ ސުވާލުތަކުގައި، ކޮންޓިނެންޓާއި ދުނިޔޭގެ އެކި ކަންކޮޅުތަކުގައި ވެސް ކުޑައަގެއް ދޭކަން އަޅުގަނޑުމެންނަކަށް ގަބޫލެއް ނުކުރެވޭ” އޭނާ ވިދާޅުވި އެވެ.
ޔޫއެންއެސްސީގެ 15 މެމްބަރުންގެ މައްޗަށް އެކުލެވޭ ޔޫއެންއެސްސީގައި ވީޓޯގެ ބާރު ލިބިފައިވާ ދާއިމީ ފަސް މެމްބަރުން ކަމަށްވާ ޗައިނާ، ފަރަންސޭސިވިލާތް، ރަޝިއާ، އެމެރިކާ އަދި އިނގިރޭސިވިލާތް ހިމެނޭއިރު ބާކީ 10 ގޮނޑި އަކީ ސަރަހައްދީ ގޮތުން ދޫކުރާ ގޮނޑިތަކެކެވެ.
އެ 10 ގޮނޑީގެ ތެރޭގައި އެފްރިކާގެ ސްޓޭޓްތަކަށް ތިން ގޮނޑި ހިމެނެ އެވެ. އެއީ އޭޝިއާ ޕެސިފިކް، ލެޓިން އެމެރިކާ އަދި ކެރީބިއަން އަދި ހުޅަނގު ޔޫރަޕާއި އެހެނިހެން ސްޓޭޓްތަކަށް ދެ ގައުމެވެ. އަދި އިރުމަތީ ޔޫރަޕަށް އެކަކެވެ.
ދުނިޔޭގެ ސަލާމަތާއި ތަރައްގީއަށް ހުރި ގޮންޖެހުންތައް ހައްލުކުރުމުގައި އެފްރިކާގެ ގައުމުތަކުގެ ދައުރު ހަރުދަނާ ކުރުމަށް ޔޫއެންއެސްސީން މިދިޔަ މެއި މަހު ވަނީ ގޮވާލައިފަ އެވެ.
އދ.ގެ އާންމު މަޖިލީހުގެ ރައީސް ޑެނިސް ފްރާންސިސް ބަހުސްގައި ވިދާޅުވީ އދ އިން ދުނިޔެ އޮތް ގޮތަށް ދައްކުވައިދޭން ޖެހޭ ކަމަށެވެ.