ރަޝިޔާއިން ޔުކްރެއިނަށް އަނެއްކާވެސް ހަމަލާތަކެއް ދީފިއެވެ. މި ހަމަލާ ދީފައިވަނީ އެ ޤައުމުން މި ހަނގުރާމައިގައި ދިން އެންމެ ބޮޑެތި ވައިގެ ހަމަލާތަކުގެ ތެރެއިން އެއް ހަމަލާ ދިން ދުވަހާއި ޖެހިގެން އައި ދުވަހެވެ.
އެގޮތުން އަންގާރަ ދުވަހުގެ ހެނދުނު ވަނީ މިސައިލް އާއި ގިނަ އަދަދެއްގެ ޑްރޯން ހަމަލާތަކެއްވެސް ދީފައެވެ. ޔުކްރެއިނުގެ ވައިގެ ދިފާޢީ ބާރުތަކުން ބުނެފައިވަނީ މުޅި ޤައުމަށް ބެލިސްޓިކް ހަތިޔާރުގެ ހަމަލާގެ ނުރައްކާ އޮތް ކަމަށެވެ.
ރަޝިޔާގެ ދިފާޢީ މިނިސްޓްރީގެ ބަޔާނެއްގައި ބުނެފައިވަނީ ދުރު ދުރުން ދަތުރުކުރާ ވައިގެ އަދި ކަނޑުގެ ޕްރެސިޝަން ހަތިޔާރުތައް ބޭނުންކޮށްގެން ޔުކްރެއިނުގެ އެކި ސަރަޙައްދުތަކުގައި ހުރި ކަރަންޓު ސްޓޭޝަންތަކާއި އެއާ ގުޅުންހުރި އިންފްރާސްޓްރަކްޗަރތަކަށް ހަމަލާދީފައިވާ ކަމަށެވެ. މީގެ ތެރޭގައި ކީވް، ލްވިވް، ހާކިވް އަދި އޮޑެސާ ސަރަޙައްދުތައް ހިމެނެއެވެ.
އާދީއްތަ ދުވަހުގެ ރޭ އިން ހޯމަ ދުވަހުގެ ހެނދުނާ ހަމައަށް މަދުވެގެން 6 މީހުން މަރުވެފައިވެއެވެ. އަދި ގިނަ އަދަދެއްގެ މީހުންނަށް ޒަޚަމްވެފައިވެއެވެ. ޔުކްރެއިނުގެ ދެބައިކުޅަ އެއްބަޔަށްވުރެ ގިނަ ސަރަޙައްދުތަކަށް ޑްރޯންތަކާއި މިސައިލްތަކުން ހަމަލާދިނުމުގެ ސަބަބުން ގިނަ ސިޓީތަކުގައި ކަރަންޓު ކެނޑި ފެނުގެ ޚިދުމަތަށްވެސް އަސަރުކުރިއެވެ.
އެމެރިކާގެ ރައީސް ޖޯ ބައިޑެން ވަނީ މި ހަމަލާތައް “އަނިޔާވެރި” ކަމަށް ބުނެ، ޔުކްރެއިނުގެ ހަކަތައިގެ ވިއުގައަށް އެހީތެރިވުމަށް ވޮޝިންގްޓަނުން ކުރިއަށް ގެންދާނެ ކަމަށް ބުނެފައެވެ.