ޔުނިސެފް (ޔުނައިޓެޑް ނޭޝަންސް ޗިލްޑްރަންސް ފަންޑް) އިން ގަވީ ވެކްސިން އެލަޔަންސް، އެފްރިކާ ސީޑީސީ އަދި ވާރލްޑް ހެލްތު އޯގަނައިޒޭޝަނާ ގުޅިގެން ކުއްލި ހާލަތުގައިވާ ޤައުމުތަކަށް އެމްޕޮކްސް ވެކްސިން ހޯދުމަށް ކުއްލި ޓެންޑަރެއް ހުޅުވާލައިފިއެވެ. މިކަން މި ޖަމްޢިއްޔާތަކުން ހާމަކޮށްފައި ވަނީ ހޮނިހިރު ދުވަހު ނެރުނު ބަޔާނެއްގަ އެވެ.
ވެކްސިން އުފައްދާ ފަރާތްތަކުގެ އުފެއްދުންތެރިކަމުގެ މައްޗަށް ބެލުމަށްފަހު، 2025 ވަނަ އަހަރާ ހަމައަށް 12 މިލިއަން ޑޯޒަށް ވުރެ ގިނަ ނުވާ ގޮތަށް އެއްބަސްވުންތަކެއް ހެދިދާނެ ކަމަށް މި ބަޔާނުގައި ބުނެފައިވެއެވެ. މި ޓެންޑަރުގެ ދަށުން، ޔުނިސެފުން ވެކްސިން އުފައްދާ ފަރާތްތަކާއެކު ޝަރުތުތަކަކާއެކު ސަޕްލައި އެއްބަސްވުންތަކެއް އެކުލަވާލާނެ ކަމަށް ބަޔާނުގައި ބުނެފައިވެއެވެ.
މިކަމުގެ ސަބަބުން، ފައިނޭންސިންގ، ޑިމާންޑް، ރެޑީނަސް އަދި ރެގިއުލޭޓަރީ ޝަރުތުތައް ކަށަވަރުވުމާއެކު، ލަސްވުމެއް ނެތި ވެކްސިން ގަނެ އަދި ފޮނުވުމުގެ ފުރުޞަތު ޔުނިސެފަށް ލިބިގެންދާނެއެވެ.
މި އެއްބާރުލުމުގެ ތެރޭގައި ވެކްސިން އެލަޔަންސް އަދި ޕޭން އެމެރިކަން ހެލްތު އޯގަނައިޒޭޝަނާއެކު މަސައްކަތްކުރުމުގެ އިތުރުން ގަވީ، އެފްރިކާ ސެންޓަރ ފޯ ޑިޒީޒް ކޮންޓްރޯލް އެންޑް ޕްރިވެންޝަން އަދި ޑަބްލިއުއެޗްއޯއާ ގުޅިގެން މަސައްކަތްކުރުން ހިމެނެއެވެ. މިކަމުގެ ސަބަބުން މުއްސަނދި ޤައުމުތަކުގައި ހުރި ވެކްސިންގެ ސްޓޮކްތަކުން ހަދިޔާކުރުމަށް ފަސޭހަވެގެންދާނެއެވެ.
މި ބަޔާނުގައި އިތުރަށް ވަނީ އޯގަސްޓް 23 ގައި ވެކްސިން އުފައްދާ ފަރާތްތަކުން ހުށަހަޅާފައިވާ މަޢުލޫމާތު ޑަބްލިއުއެޗްއޯއިން މިހާރު ދަނީ މުރާޖަޢާކުރަމުންދާކަމަށް ބުނެފައެވެ. އަދި ކުއްލި ހާލަތުގައި ބޭނުންކުރުމަށް ހުއްދަ ދިނުމަށް ކުރާ މުރާޖަޢާ ސެޕްޓެމްބަރު މެދުތެރޭގައި ނިމޭނެ ކަމަށް ލަފާކުރެވޭކަމަށް ބުނެފައިވެއެވެ.
ޑަބްލިއުއެޗްއޯއިން މިހާރު ދަނީ ބަވޭރިއަން ނޯޑިކް އަދި ޖަޕާނުގެ ކޭއެމް ބަޔޮލޮޖިކްސްއިން އުފައްދާފައިވާ ދެ ވެކްސިނަށް ކުއްލި ހާލަތުގައި ބޭނުންކުރުމުގެ ލައިސަންސް ދިނުމަށް ހުށަހަޅާފައިވާ އެޕްލިކޭޝަންތައް މުރާޖަޢާކުރަމުންނެވެ.
މީގެ ކުރިން އޯގަސްޓް މަހުގައި، ޑިމޮކްރެޓިކް ރިޕަބްލިކް އޮފް ކޮންގޯގައި ފެތުރުނު އެމްޕޮކްސްގެ ބަލިމަޑުކަން އެ ޤައުމާ އިންވެގެންވާ ޤައުމުތަކަށް ފެތުރުމާ ގުޅިގެން، ޑަބްލިއުއެޗްއޯއިން ވަނީ އެމްޕޮކްސްއަކީ ދުނިޔޭގެ ޢާންމު ޞިއްޙަތަށް ނުރައްކާވެފައިވާ ކުއްލި ހާލަތެއްގެ ގޮތުގައި އިޢުލާނުކޮށްފައެވެ.