ޑިމޮކްރެޓިކް ރިޕަބްލިކް އޮފް ކޮންގޯ (ޑީއާރުސީ) އަށް ގާތްގަނޑަކަށް އެއް ލައްކަ ޑޯޒްގެ އެމްޕޮކްސް ވެކްސިންގެ ފުރަތަމަ ޝިޕްމަންޓް އަންނަ ބުރާސްފަތި ދުވަހު ފޯރާނެ ކަމަށް ލަފާކޮށްފިއެވެ.
ގާތްގަނޑަކަށް 100 މިލިއަން މީހުންގެ އާބާދީއެއް އޮންނަ ސެންޓްރަލް އެފްރިކާގެ މި ގައުމަކީ ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން މިދިޔަ މަހު ދުނިޔޭގެ ސިއްހަތުގެ ކުއްލި ނުރައްކަލުގެ ހާލަތު އިއުލާނުކުރި އެމްޕޮކްސް ފެތުރެން ފެށި ގައުމެވެ.
ޑަބްލިއުއެޗްއޯގެ ޗީފް ޓެޑްރޯސް އަދަނޮމް ގެބްރިޔޭސުސް ވިދާޅުވީ ބަވޭރިއަން ނޯޑިކް އިން އުފެއްދި އަދި ޔޫރަޕިއަން ޔޫނިއަން އިން ހަދިޔާކުރި ޑޯޒްތައް އަންނަ ބުރާސްފަތި ދުވަހު އަންނާނެ ކޮންގޯއަށް ދާނެ ކަމަށެވެ.
ޑީއާރުސީގެ އެމްޕޮކްސް އައުޓްބްރޭކް ރެސްޕޮންސް ޗީފްގެ ހެޑް ކްރިސް ކަސީޓާ މީގެ ކުރިން ރޮއިޓާސް ނިއުސް އެޖެންސީއަށް މައުލޫމާތު ދެއްވަމުން ވަނީ ސެޕްޓެމްބަރު މަހުގެ ފަސް ވަނަ ދުވަހު ފުރަތަމަ ބެޗް އަދި ދެވަނަ ބެޗް ސެޕްޓެމްބަރު 7 ގައި ލިބޭނެކަމަށް ވިދާޅުވެފައެވެ.
އެފްރިކާ ސެންޓާ ފޯ ޑިޒީޒް ކޮންޓްރޯލް އެންޑް ޕްރިވެންޝަން (އެފްރިކާ ސީޑީސީ) އިން ބުނީ ބުރާސްފަތި ދުވަހު 99،000 އަށް ވުރެ ގިނަ ޑޯޒް އައުމަށް ހަމަޖެހިފައިވާ ކަމަށެވެ. އަދި ހަފްތާ ނިމުމުގެ ކުރިން އެ އަދަދަށް ވެކްސިން ހިފައިގެން އިތުރު ފްލައިޓެއް އައުމަށް ވަނީ ހަމަޖެހިފައެވެ.
ޑަބްލިއުއެޗްއޯގެ ތަފާސް ހިސާބުތައް ދައްކާ ގޮތުން މި އަހަރު ފެށުނު ފަހުން ޑީއާރުސީގައި 17،500 އަށް ވުރެ ގިނަ އެމްޕޮކްސް ކޭސް ފެނި، 629 މީހުން ވަނީ މަރުވެފަ އެވެ.
ޔުނިސެފުން ބުނީ މި ވައިރަހުގެ ނުރައްކާ އެންމެ ބޮޑީ ޑީއާރުސީ އާއި އަވަށްޓެރި ގައުމުތަކުގެ ކުޑަކުދިންނަށް ކަމަށެވެ.
އެފްރިކާ ސީޑީސީގެ އޮގަސްޓް މަހުގެ 27 ވަނަ ދުވަހު ނެރުނު އަޕްޑޭޓުގައިވާ ގޮތުން އެފްރިކާގެ މަދުވެގެން 13 ގައުމަކުން އެމްޕޮކްސް މިހާރު ވަނީ ފެނިފަ އެވެ.