ޗައިނާގެ ޖަޒީރާ ޕްރޮވިންސް ކަމުގައިވާ ހައިނާންއަށް ސުޕަރ ޓައިފޫން ޔާގީ އަރައިފިކަމަށް ޗައިނާ ސަރުކާރުގެ މީޑިއާއިން ރިޕޯޓުކޮށްފިއެވެ. މި ވަރުގަދަ ވައިގަނޑު އެރުމުގެ ކުރިން 400،000 އަށްވުރެ ގިނަ މީހުން ރައްކާތެރި ސަރަހައްދުތަކަށް ވަނީ ބަދަލުކޮށްފައެވެ.
ހައިނާންގެ މޫސުމާބެހޭ ޚިދުމަތުން މަޢުލޫމާތު ދީފައިވާ ގޮތުގައި، ޔާގީގައި ގަޑިއަކު 152 މޭލުގެ ބާރުމިނުގައި ވައި ޖެހުނެވެ. މި ޓައިފޫން ހައިނާންގެ ވެންޗަންގ ސިޓީއަށް އެރީ ހުކުރު ދުވަހުގެ މެންދުރުފަހު 4:20 ހާއިރުއެވެ.
2024 ވަނަ އަހަރު ދުނިޔޭގައި އުފެދުނު ދެވަނައަށް އެންމެ ގަދަ ޓްރޮޕިކަލް ސައިކްލޯނަކީ ޔާގީއެވެ. އަދި ޕެސިފިކް ސަރަޙައްދުގައި އުފެދުނު އެންމެ ގަދަ ސައިކްލޯނަކީވެސް މިއީއެވެ. މީގެ ކުރިން އެޓްލާންޓިކް ކަނޑުގައި އުފެދުނު ކެޓަގަރީ 5 ގެ ހަރިކޭން ބެރިލް އަކީ މި އަހަރުއުފެދުނު އެންމެ ގަދަ ސައިކްލޯނެވެ.
ޗައިނާ ސަރުކާރުގެ ނޫސް އޭޖެންސީ ޝިންހުއާއިން ރިޕޯޓުކޮށްފައިވާ ގޮތުގައި، ޓޫރިސްޓުން ގިނައިން ޒިޔާރަތްކުރާ ތަނެއްކަމުގައިވާ ހައިނާންގެ މަދުވެގެން 419،367 ރައްޔިތުން ވަނީ ޔާގީ އެރުމުގެ ކުރިން އެހެން ތަންތަނަށް ބަދަލުކުރެވިފައެވެ.
މި ވަރުގަދަ ތޫފާނގައި ވަނީ މި ހަފްތާގެ ކުރީކޮޅު އުތުރު ފިލިޕީންސްގައި 16 މީހުން މަރުވެފައެވެ. އަދި މި ތޫފާން ހައިނާންގެ އެހެން ސަރަޙައްދުތަކާއި ގުއަންގްޑޮންގް ޕްރޮވިންސްއަށް ދިއުމަށްފަހު ބެއިބޫ ގަލްފަށް ދާނެކަމަށް ބެލެވެއެވެ.
ޗައިނާގެ އިމަޖެންސީ މެނޭޖްމަންޓް މިނިސްޓްރީން ވަނީ ހައިނާންގެ ރައްޔިތުންނަށް ނުރައްކާތެރިކަމުގެ އިންޒާރު ދީ، ރައްކާތެރިކަމުގެ ފިޔަވަޅުތައް އަޅަން އަންގާފައެވެ. އަދި ސަރުކާރުން ވަނީ ކާރިސާއާ ގުޅިގެން އިމަޖެންސީ ރެސްޕޮންސް ޕްލޭނެއް ތައްޔާރުކޮށްފައެވެ.