އަންގާރަ ދުވަހުގެ ފަތިހު އިސްރާއީލުގެ އޮކިއުޕޭޝަން ބާރުތަކުން ޣައްޒާގެ ދެކުނު ހުޅަނގުގައިވާ ޚާން ޔޫނިސްގެ މަވާސީ ސަރަޙައްދުގައި ގެދޮރު ދޫކޮށްފައިވާ މީހުންގެ ޓެންޓު ސަރަޙައްދަށް ގަދަފަދަ ވައިގެ ޙަމަލާއެއް ދީ، ބޮޑު ޤަތުލުއާންމެއް ހިންގައިފި އެވެ.
މަވާސީ ސަރަޙައްދުގެ ކުރިމަތީގައިވާ ބްރިޓިޝް ހޮސްޕިޓަލް ކައިރީގައި ހިނގި މި އަނިޔާވެރި ޙަމަލާގައި ގިނަ އަދަދެއްގެ ކުޑަކުދިންނާއި އަންހެނުންގެ ތެރެއިން ވަނީ ޝަހީދުކޮށްލާފައެވެ. ގިނަ އަދަދެއްގެ މަދަނީ އެހީ ފޯރުކޮށްދޭ މީހުން ޝަހީދުވެ، އަނިޔާވެފައިވާ އިރު، ގިނަ އަދަދެއްގެ ރައްޔިތުންގެ ހަށިތައް އަދިވެސް ވަނީ ގެއްލިފައެވެ.
ސިއްހީ މާހިރުން ބުނާ ގޮތުގައި ޚާން ޔޫނިސްގެ މަވާސީގައި ހިނގި މި ޤަތުލުއާންމުގެ ޝިކާރައަކަށްވީ މީހުންގެ ހަށިތައް ނަގަން ހޭދަކުރި ތިން ގަޑިއިރުން 40 ޝަހީދުވެފައިވާ މީހުންނާއި 60 އަނިޔާވެފައިވާ މީހުން ފެނިފައިވާ ކަމަށެވެ.
ސިވިލް ޑިފެންސްއިން ބުނެފައިވަނީ ޣައްޒާއަށް އިސްރާއީލުން ފެށި އުދުވާނީ ޙަމަލާތައް ފެށުނީއްސުރެ މިހާރު ހިނގަމުން މިދަނީ އެންމެ އަނިޔާވެރި ޤަތުލުއާންމު ކަމަށެވެ.
ނޫސްވެރިންނާއި އެ ސަރަޙައްދުގެ މީހުން ބުނާ ގޮތުގައި މި ޙަމަލާގައި ފަސް މިސައިލް ބޭނުންކޮށްފައިވެއެވެ. މިކަމުގެ ސަބަބުން ޓެންޓުތައް މުޅިން ހަލާކުވެ، ބިމުގެ 9 މީޓަރު އަޑިއަށް ވަޅުގަނޑުތައް ހެދިފައިވާތީ، ސަލާމަތްކުރާ އަދި މެޑިކަލް ޓީމުތަކަށް މީހުންނާއި ހަމައަށް ވާސިލުވުމަށް އިތުރު ދަތިތަކާ ކުރިމަތިވެފައިވެއެވެ.
އެ ސަރަޙައްދުގައި މިހާރު ވަނީ ހަމަނުޖެހުން އުފެދިފައެވެ. އިސްރާއީލުގެ އުދުހޭ އުޅަނދުތައް އެ ސަރަޙައްދުގެ މަތީގައި ގިނައިން ދަތުރުކުރަމުންދާއިރު، ކަރަންޓު މުޅިން ކެނޑި، އަލިފާން ރޯވެފައިވެއެވެ.