ބަންގްލަދޭޝްގެ ވަގުތީ ސަރުކާރުން އައު އިންތިޚާބެއްގެ ތާވަލެއް އަދި ހާމަކޮށްފައި ނުވާތީ، ނެޝަނަލިސްޓް ޕާޓީ (ބީއެންޕީ) ގެ އެތައް ހާސް އެކްޓިވިސްޓުންނާއި ލީޑަރުން އަންގާރަ ދުވަހު ގައުމުގެ ވެރިރަށުގައި ބޮޑު އެއްވުމެއް ބާއްވައި، ޑިމޮކްރެޓިކް ބަދަލަކަށް އިންތިޚާބެއް ބޭއްވުމަށް ގޮވާލައިފިއެވެ.
އެގޮތުން ބީއެންޕީގެ މައި އޮފީސް ކުރިމަތީގައި އެއްވި ތާއީދުކުރާ ފަރާތްތަކުން އައު އިންތިޚާބަކަށް ގޮވާލައި އަޑުގަދަކޮށްފައި ވެއެވެ.
ނޯބަލް އިނާމު ލިބިވަޑައިގެންފައިވާ މުހައްމަދު ޔޫނުސް އިސްކޮށް ހުންނަވައިގެން ހިންގާ ވަގުތީ ސަރުކާރުން އިލެކްޝަން ކޮމިޝަނުން ފެށިގެން މާލީ އިދާރާތަކާ ހަމައަށް ގައުމުގެ އެކި ދާއިރާތައް އިސްލާހުކުރުމަށް ގިނަ ރޭވުންތަކެއް ކުރިއަށް ގެންގޮސްފައިވެއެވެ. ނަމަވެސް ކުރީގެ ބޮޑުވަޒީރު ޚާލިދާ ޒިޔާ އިސްކޮށް ހުންނަވާ ބީއެންޕީ ހިމެނޭ ގޮތަށް މައިގަނޑު ސިޔާސީ ޕާޓީތަކުން ބޭނުންވަނީ އައު އިންތިޚާބެއް އަވަހަށް ބޭއްވުމެވެ.
ކުރީގެ ބޮޑުވަޒީރު ޝެއިޚް ހަސީނާ ވޭތުވެދިޔަ މަހު ހިނގި ހަމަނުޖެހުންތަކާއި ގުޅިގެން ގައުމުން ފިލައިވަޑައިގަތުމާއެކު، 15 އަހަރުގެ ވެރިކަމެއް ނިމުމަކަށް އައިސް، ޔޫނުސް ވަނީ ވެރިކަމަށް އަރާވަޑައިގެންފައެވެ.
ހަސީނާ މިހާރު ދިރިއުޅުއްވަމުން ގެންދަވަނީ އިންޑިއާގައެވެ.
ޔޫނުސް އޭނާގެ ފަހުގެ ތަޤްރީރުތަކުގައި އައު ޤައުމީ އިންތިޚާބެއް ބާއްވާނެ ތާރީޚެއް ހާމަކުރައްވާފައެއް ނުވެއެވެ. އަދި ރައްޔިތުން ބޭނުންވާހާ ހިނދަކު އެމީހުން ވެރިކަމުގައި ތިބޭނެ ކަމަށް ވިދާޅުވެފައިވެއެވެ.