ސްކޫލެއްގެ ތެރޭގައި 12 އަހަރުގެ ކުއްޖަކު 6 ކުދިންނަށް ވަޅިން ހަމަލާދީ ޒަޚަމްކޮށްލައިފިއެވެ.
ޕޯޗުގަލްގެ ޤައުމީ ފުލުހުން ބުނި ގޮތުގައި ލިސްބަން ކައިރީގައިވާ އަޒަމްބުޖާގެ ސްކޫލެއްގައި ހިނގި މި ހާދިސާގައި ޒަޚަމްވި ކުދިންނަކީ 11 އަހަރާއި 14 އަހަރާ ދެމެދުގެ ކުދިންނެވެ.
އަޒަމްބުޖާގެ މޭޔަރު ސިލްވީނޯ ލޫސިއޯ ވިދާޅުވި ގޮތުގައިމި ހާދިސާގައި އެއް ފިރިހެން ކުއްޖެއްގެ ވަނީ މޭމަތިން ބޮޑަށް ޒަޚަމްވެފައެވެ. ނަމަވެސް އޭނާގެ ފުރާނައަކަށް ނުރައްކަލެއް ނުވާކަމަށާއި، އެ ކުއްޖާ ލިސްބަންގެ ހޮސްޕިޓަލަކަށް ގެންގޮސްފައިވާކަމަށް ބުނެފައި ވެއެވެ.
މޭޔަރު ވިދާޅުވި ގޮތުގައި އަނެއް 5 އަންހެން ކުދިންގެ އަތަށް ވަނީ ކުދި ޒަޚަމްތަކެއް ވެފައެވެ.
ފުލުހުން ބުނި ގޮތުގައި ހަމަލާދިން ކުއްޖާ ވަނީ ހައްޔަރުކޮށްފައެވެ. މި ހަމަލާ ދިން ސަބަބެއް އަދި ހާމަކޮށްފައެއް ނުވެއެވެ.
ޕޯޗުގަލްގެ ބޮޑުވަޒީރު ލުއިސް މޮންޓެނެގްރޯ ވަނީ މި ހަމަލާ ކުށްވެރިކުރައްވައި، ޒަޚަމްވި ކުދިން އަވަހަށް ރަނގަޅުވުމަށް އެދިވަޑައިގެން އެކްސް ގައި މެސެޖެއް ޕޯސްޓްކުރައްވާފައެވެ. އޭނާ މިއީ “އެކަހެރި ހަމަލާއެއް” ކަމަށާއި، އޭނާގެ ޤައުމުގައި މިފަދަ ކަންކަން ހިނގުމަކީ ވަރަށް ނާދިރު ކަމެއް ކަމަށް ވިދާޅުވިއެވެ.
“މިއީ އެކަހެރި ޢަމަލެއް އަދި ޕޯޗުގީޒު މުޖުތަމަޢުގައި ނާދިރު ހާދިސާއެއް، ނަމަވެސް މިއީ ޢާންމު ދާއިރާގައި މަސައްކަތްކުރާ އެންމެން ޒިންމާދާރުކަމާއެކު ވިސްނަންޖެހޭ ކަމެއް،” މޮންޓެނެގްރޯ ޕޯޗުގީޒް ބަހުން ލިޔުއްވިއެވެ.