ލުބްނާނުގައި އިސްރާއީލުން ދެމުންދާ ބޮމުގެ ހަމަލާތައް ވަރުގަދަވަމުން ދިޔުމާއެކު، ދިހަ ހާހަށްވުރެ ގިނަ ލުބްނާނު ރައްޔިތުން ގެދޮރު ދޫކޮށް ފިލައިފިކަމަށް އދ. އިން ބުނެފިއެވެ.
މި ހަފްތާގައި ފެށި މި ހަމަލާތަކުގައި 500 އާ ގާތްކުރާ އަދަދެއްގެ މީހުން މަރުވެ، އެތައް ހާސް މީހުންނަށް އަނިޔާވުމަށްފަހު، އިސްރާއީލުން އަންގާރަ ދުވަހުވެސް ވަނީ ބޮޑެތި ޖައްވީ ޙަމަލާތައް ދީފައެވެ. މި ޙަމަލާތަކާ ގުޅިގެން ލުބްނާނުގެ އާންމު ރައްޔިތުން އެ ޤައުމުގެ ދެކުނުން ފިލަން މަސައްކަތް ކުރަމުންދާއިރު، ޤައުމުގެ އެކި ސަރަޙައްދުތަކަށްވެސް ޙަމަލާތައް އަމާޒުވެފައިވެއެވެ.
“އިހަށްދުވަހު ފެނުނު ޙަމަލާތަކުގެ ނުރައްކާތެރި އިތުރުވުމާ މެދު އަޅުގަނޑުމެން ވަރަށް ކަންބޮޑުވޭ،” އދ. ގެ ރެފިއުޖީ އެޖެންސީގެ ޚަބަރު ފަތުރާ މެތިއު ސޯލްޓްމާޝް އަންގާރަ ދުވަހު ޖެނީވާގައި ނޫސްވެރިންނަށް ބުންޏެވެ.
ލުބްނާނުގެ ޞިއްޙަތާބެހޭ މިނިސްޓްރީގެ މަޢުލޫމާތު ދައްކާ ގޮތުން، ހޯމަ ދުވަހު އިސްރާއީލުގެ ޖައްވީ ޙަމަލާތަކުގެ ސަބަބުން މަދުވެގެން 492 މީހުން މަރުވެފައިވެއެވެ. އޭގެ ތެރޭގައި 35 ކުޑަކުދިން ހިމެނެއެވެ. މިއީ ގާތްގަނޑަކަށް ފާއިތުވި ދެ ޤަރުނުގެ ތެރޭގައި އެ ޤައުމަށް ދެވުނު އެންމެ މަރު ގިނަ ބޮމުގެ ހަމަލާތަކެވެ.
ގިނަ ދުވަސްތަކެއް ވަންދެން ދެބަސްވެފައިވާ ޙިޒްބުﷲ އާއި އިސްރާއީލު ދަނީ އޮކްޓޯބަރު 7 2023 ގައި ފަލަސްޠީނުގެ ޙަމާސް ޖަމާޢަތުން އިސްރާއީލަށް ދިން ޙަމަލާއަށްފަހު، ކޮންމެ ދުވަހަކުހެން ބޯޑަރު ހުރަސްކޮށް އެއްބަޔަކު އަނެއްބަޔަކަށް ރައްދު ދެމުންނެވެ.
ނަމަވެސް މިހާރު އިސްރާއީލުން އޭގެ ޢަމަލިއްޔާތުތައް އިތުރުކޮށްފައިވާއިރު، ހޯމަ ދުވަހުގެ ބޮމުގެ ހަމަލާއަކީ 2006 ވަނަ އަހަރުގެ ހޫނު މޫސުމުގައި އިސްރާއީލާއި އީރާނުގެ އެހީތެރިކަން ލިބޭ ޙިޒްބުﷲ އާ ދެމެދު ހިނގި ފުރިހަމަ ހަނގުރާމައަށްފަހު، ލުބްނާނަށް ދިން އެންމެ ބޮޑު ހަމަލާއެވެ.