އެމެރިކާގެ ކުރީގެ ރައީސް ޑޮނަލްޑް ޓްރަމްޕް 2024 ވަނަ އަހަރުގެ ރިޔާސީ އިންތިޚާބުގައި ކާމިިޔާބު ހޯދައިފިކަމަށް އިޢުލާންކޮށްފިއެވެ.
އިންތިހާބުގެ ނަތީޖާތަކުން ކުރީގައި އުޅެމުންދާ ކެނޑިޑޭޓު، ފްލޮރިޑާގައި ހުންނަވާ އާންމުންނާއި މުހާތަބުކޮށް ވިދާޅުވެފައިވަނީ މިއީ އެމެރިކާގެ ރައްޔިތުންނަށް ލިބުނު މަތިވެރި ކާމިޔާބީއެއް ކަމަށާއި، މިއާއެކު އެމެރިކާގެ އައު ރަންޒަމާނެއް ފެށިގެންދާނެ ކަމަށެވެ.
މި އިންތިހާބު ރަސްމީ ނަތީޖާތައް އަދި އިޢުލާންކޮށްފައެއް ނުވެއެވެ. ނަމަވެސް ބީބީސީގެ އެމެރިކާގެ ޕާޓްނަރު ސީބީއެސްގެ ޕްރޮޖެކްޝަންތަކުން ދައްކާގޮތުގައި، ޓްރަމްޕަށް ކާމިޔާބު ލިބުމަށް ދެން ބޭނުންވަނީ އެންމެ ސްޓޭޓެކެވެ.
އަނެއްކޮޅުން، ޑިމޮކްރެޓިކް ކެންޑިޑޭޓް ކަމަލާ ހެރިސް އަދި ވަކި އެއްޗެއް ވިދާޅުވެފައެއް ނުވެއެވެ. އެގްޒިޓް ޕޯލްތަކުން ދައްކާގޮތުގައި ހެރިސްއަށް އަންހެނުންގެ ތާއީދު ލިބިފައިވަނީ އުންމީދުކުރެވުނު ވަރަށްވުރެ ދަށް މިންވަރަކަށެވެ.
މި އިންތިޚާބަކީ 130 އަހަރަށްވުރެ ގިނަ ދުވަހުގެ ފަހުން ކުރީގެ ރައީސަކު ވައިޓް ހައުސްއަށް އެނބުރި އައުމުގެ ފުރުޞަތު އޮތް އިންތިޚާބެކެވެ.