ޗައިނާގެ އިރުމަތީ ސަރަޙައްދުގައި ހުރި ކޮލެޖެއްގައި ހިނގި މާރާމާރީއެއްގައި 8 މީހުން މަރުވެ، 17 މީހުންނަށް އަނިޔާވެއްޖެއެވެ. މި ހާދިސާ ހިނގާފައިވަނީ ހޮނިހިރު ދުވަހުގެ ހަވީރު 6:30 ހާއިރު، ޔިކްސިންގ ސިޓީގައި ހުންނަ ވުކްސީ ވޮކޭޝަނަލް އިންސްޓިޓިއުޓް އޮފް އާޓްސް އެންޑް ޓެކްނޮލޮޖީގައެވެ.
ފުލުހުން ބުނާ ގޮތުގައި މި ހަމަލާ ދިން މީހަކީ އެ ކޮލެޖުން ދާދިފަހުން ގްރެޖުއޭޓްވި ދަރިވަރެކެވެ. އޭނާ މިފަދަ ޢަމަލެއް ހިންގި ސަބަބަކީ އިމްތިހާނުން ފެއިލްވެ، ގްރެޖުއޭޝަން ސެޓްފިކެޓް ނުލިބި، އަދި އިންޓާންޝިޕްގެ މުސާރައާމެދު ހިތްހަމަނުޖެހުމެވެ. މި މައްސަލައިގެ ތަޙުޤީޤު ދަނީ ކުރިއަށެވެ.
ސީ.އެން.އެން އިން އާންމުކޮށްފައިވާ ވީޑިއޯއެއްގައި ދައްކާގޮތުން، ގިނަ ބަޔަކު ބިންމަތީގައި އޮއްވާ ފެނެއެވެ. އަދި އެ މަންޒަރު ބަލަން ތިބި މީހުންގެ އަޑުތަކާއި ހަޅޭއްލަވާ އަޑު އިވެއެވެ.
މި ހާދިސާއަކީ ފަހަކަށް އައިސް ޗައިނާގައި ހިނގަމުންދާ އަނިޔާވެރި ހާދިސާތަކުގެ ތެރެއިން އެންމެ ފަހުގެ ހާދިސާއެވެ. މީގެ ކުރިން މިދިޔަ ހަފްތާގައި، ޗައިނާގެ ދެކުނުގައި އޮންނަ ޖުހާއި ސިޓީގައި ކާރެއް މީހުންގެ މައްޗަށް އަރައި 35 މީހުން މަރުވެފައިވެއެވެ. އަދި 40 އަށްވުރެ ގިނަ މީހުންނަށް އަނިޔާވެފައިވެއެވެ.
ޗައިނާގައި މިފަދަ ހާދިސާތައް މަދުވީނަމަވެސް، ފަހަކަށް އައިސް މިފަދަ ހާދިސާތައް އިތުރުވަމުން އައުމާ ގުޅިގެން، ގިނަ ރައްޔިތުން ކަންބޮޑުވުން ފާޅުކުރަމުންދެއެވެ.