މީގެ 57 އަހަރު ކުރިން އަންހެނަކު މަރާލައި ރޭޕްކުރި މައްސަލައެއްގައި 92 އަހަރުގެ މީހަކާ މެދު ޔޫކޭގައި ދަޢުވާ އުފުލައިފިއެވެ.
75 އަހަރުގެ ލުއިސާ ޑަން މަރުވެފައި އޮއްވާ ފެނުނީ 1967 ވަނަ އަހަރުގެ ޖޫން މަހު އިނގިރޭސިވިލާތުގެ ދެކުނު ހުޅަނގު ސަރަހައްދުގައި އޮންނަ ބްރިސްޓޯލް ސިޓީގައި ހުރި އޭނާގެ ގޭގައެވެ. އޭނާގެ މަރުގެ ސަބަބަކަށް ރެކޯޑު ކުރެވިފައިވަނީ ކަރުގައި ހިފައި މަރާލުމާއި ނޭވާ ހާސްވުމެވެ.
މި މައްސަލަ 57 އަހަރު ވަންދެން ހައްލު ނުވެ އޮތުމަށްފަހު، އިނގިރޭސިވިލާތުގެ އިރުމަތީގައި އޮންނަ އިޕްސްވިޗްގައި ދިރިއުޅޭ 92 އަހަރުގެ ރައިލަންޑް ހެޑްލީ އަންގާރަ ދުވަހު ހައްޔަރުކޮށް އޭނާއާ މެދު ދަޢުވާ އުފުލާފައިވެއެވެ.
މި ހައްޔަރުކުރުން އައީ އެވޮން އެންޑް ސަމަރސެޓް ފުލުހުން މިދިޔަ އަހަރު މި މައްސަލަ އަލުން މުރާޖަޢާ ކުރަން ފެށުމަށްފަހުއެވެ. މީގެ ތެރޭގައި މި މައްސަލައާ ގުޅުންހުރި ތަކެތި އިތުރަށް ފޮރެންސިކް ތަހުލީލުކުރުން ހިމެނެއެވެ.
ފުލުހުންގެ ޑިޓެކްޓިވް އިންސްޕެކްޓަރ ޑޭވް މާޗަންޓް ބުނެފައިވަނީ މިއީ މި ތަހުގީގުގައި ވަރަށް މުހިންމު ކުރިއެރުމެއް ކަމަށެވެ. އަދި ލުއިސާގެ އާއިލާއަށް މި ދަޢުވާ އުފުލުމުގެ ނިންމުމުގެ މަޢުލޫމާތު ދީފައިވާ ކަމަށާއި، ކުރިއަށް އޮތް ދުވަސްތަކުގައި ޚާއްޞަ ލިއޭޒަން އޮފިސަރެއް އާއިލާއަށް އެހީތެރިކަން ފޯރުކޮށްދޭނެ ކަމަށެވެ.
ހެޑްލީ ބުދަ ދުވަހު ބްރިސްޓޯލްގެ ކޯޓެއްގައި ވީޑިއޯ ލިންކް މެދުވެރިކޮށް ހާޒިރުވެ، ބަންދުގައި ބެހެއްޓުމަށް އަމުރުކޮށްފައިވެއެވެ. އޭނާއާ މެދު އުފުލާފައިވާ ދެ ދަޢުވާއަށް އިޢުތިރާފުވުމަށް އަދި އެދިފައެއް ނުވެއެވެ.