ގާހިރާގައި ބޭއްވުނު އަރަބި ލީގުގެ ކުއްލި ބައްދަލުވުމުގައި، ހަނގުރާމައިގެ ސަބަބުން ވީރާނާވެފައިވާ ޣައްޒާ އަލުން އާރާސްތުކުރުމަށް މިސުރުން ހުށަހެޅި ޕްލޭނަށް އަރަބި ލީޑަރުން ވަނީ ތާއީދުކޮށްފައެވެ.
މިސުރުގެ ރައީސް އަބްދުލް ފައްތާހު އައް-ސީސީ ވިދާޅުވި ގޮތުގައި، ފަސް އަހަރުގެ މުއްދަތަށް ރޭވިފައިވާ މި ޕްލޭނަށް 53 ބިލިއަން ޑޮލަރު (50.5 ބިލިއަން ޔޫރޯ) ޚަރަދުވާނެ ކަމަށް ލަފާކުރެވެއެވެ. މި ޕްލޭންގެ މަޤްޞަދަކީ ފަލަސްތީނުގެ ރައްޔިތުން އެމީހުންގެ ބިމުގައި ދެމިތިބުމަށް މަގުފަހިކޮށްދިނުމެވެ.
ޕްލޭންގެ ތަފްސީލުތަކަށް ބަލާއިރު، ފުރަތަމަ 6 މަސްދުވަހުގެ ތެރޭގައި ހަލާކުވެފައިވާ ޢިމާރާތައް ނެގުމާއި ވަގުތީ ބޯހިޔާވަހިކަން ޤާއިމުކުރުމަށް 3 ބިލިއަން ޑޮލަރު ޚަރަދުކުރެވޭނެއެވެ. އޭގެ ފަހުން ކުރިއަށްދާ ދެ މަރުހަލާގައި ޖުމްލަ 400,000 ގޯތިގެދޮރު އިމާރާތްކުރެވޭނެއެވެ.
ނަމަވެސް އިސްރާއީލްގެ ފޮރިން މިނިސްޓްރީން ބުނެފައިވަނީ، ގާހިރާގައި ކުރެވުނު މަޝްވަރާތަކާއި ނިންމުންތަކުގައި 2023 ވަނަ އަހަރުގެ އޮކްޓޯބަރު 7 ގައި ހަމާސްއިން އިސްރާއީލަށް ދިން ހަމަލާއަށްފަހު އުފެދިފައިވާ ހާލަތަށް ރިޢާޔަތްކޮށްފައި ނުވާ ކަމަށެވެ.
އެމެރިކާގެ ނެޝަނަލް ސެކިއުރިޓީ ކައުންސިލްގެ ސްޕޯކްސްމަން ބްރަޔަން ހިއުޒް ވިދާޅުވެފައިވަނީ، އަރަބި ގައުމުތަކުގެ ހުށަހެޅުންތަކަށް މަރުހަބާކިޔާ ކަމަށާއި، ނަމަވެސް ހަމާސްއަށް ޣައްޒާގެ ވެރިކަމުގައި ދެމިނުހުރެވޭނެ ކަމަށެވެ.