އިސްރާއީލުން ޣައްޒާއަށް ދެމުންދާ އަނިޔާވެރި ހަމަލާތަކުގައި މިހާތަނަށް ޝަހީދުކޮށްލި މީހުންގެ އަދަދު 52,495 އަށް އަރައިފިކަމަށް ޣައްޒާގެ ސިއްހީ ވުޒާރާއިން ހޮނިހިރު ދުވަހު ހާމަކޮށްފިއެވެ.
ސިއްހީ ވުޒާރާގެ ބަޔާނުގައި ބުނެފައިވާ ގޮތުން، ވޭތުވެދިޔަ 48 ގަޑިއިރުގެ ތެރޭގައި އިސްރާއީލުގެ ހަމަލާތަކުގައި 77 ފަލަސްތީނު ރައްޔިތުން ޝަހީދުކޮށްލާފައިވެއެވެ. އަދި 275 މީހުން ޒަހަމްވެފައިވާ ކަމަށް ބަޔާނުގައި ބުނެފައިވެއެވެ. މިހާތަނަށް ޒަހަމްވި މީހުންގެ އަދަދު 118,366 އަށް އަރާފައިވެއެވެ.
“ގިނަ ޝަހީދުންގެ ހަށިތައް އަދިވެސް ވަނީ ސަލާމަތްނުކުރެވި، ސަލާމަތްކުރާ ފަރާތްތަކަށް ވާސިލުނުވެވޭ ހިސާބުގައި،” ސިއްހީ ވުޒާރާއިން ބުނެފައިވެއެވެ.
އިސްރާއީލުން މާރިޗު 18 ގައި ހަމަލާތައް އަލުން ފެށުމަށްފަހު 2,396 މީހުން ޝަހީދުކޮށް، 6,325 މީހުން ޒަހަމްކޮށްފައިވެއެވެ. މިއީ ޖެނުއަރީ މަހު ވެވުނު ހުއްޓާލުމާއި ހައްޔަރީން ދޫކުރުމުގެ އެއްބަސްވުން ނިމުމަކަށް ގެނެސް، އަލުން ފެށި ހަމަލާތަކެވެ.
ފާއިތުވި ނޮވެމްބަރު މަހު، އިންޓަނޭޝަނަލް ކްރިމިނަލް ކޯޓުން ވަނީ އިސްރާއީލުގެ ބޮޑުވަޒީރު ބެންޖަމިން ނެތަންޔާހޫ އާއި ކުރީގެ ދިފާއީ ވަޒީރު ޔޯވް ގަލަންޓްގެ މައްޗަށް ހަނގުރާމައިގެ ކުށްތަކާއި އިންސާނިއްޔަތާ ދެކޮޅު ކުށްތަކުގެ ތުހުމަތުގައި ހައްޔަރު ވޮރަންޓް ނެރެފައެވެ. މީގެ އިތުރުން އިސްރާއީލުގެ މައްޗަށް އިންޓަނޭޝަނަލް ކޯޓް އޮފް ޖަސްޓިސްގައި ނަސްލު ފޮހެލުމުގެ މައްސަލައެއްވެސް ހިނގަމުންދެއެވެ.