ރޭ އިންޑިއާއިން ޕާކިސްތާނަށް ދިން ހަމަލާތަކާއި ގުޅިގެން ޕާކިސްތާނުގެ އޮތޯރިޓީތަކުން އެ ގައުމުގެ އެއަރ ސްޕޭސް 48 ގަޑިއިރަށް ވަގުތީ ގޮތުން ބަންދުކޮށް، ލާހޯރު، ކަރާޗީ، ފައިސަލްއާބާދު، ސިޔާލްކޯޓް އަދި ކުއެޓާ ހިމެނޭ ގޮތަށް ހުރިހާ އެއަރޕޯޓުތަކެއްގެ އެތެރޭގެ އަދި ބޭރުގެ ފްލައިޓްތައް ހުއްޓާލައިފިއެވެ.
އެގޮތުން އިސްލާމާބާދު އިންޓަނޭޝަނަލް އެއަރޕޯޓް ވަނީ ހުރިހާ ފްލައިޓް އޮޕަރޭޝަންތަކަކަށް ބަންދުކޮށް، އެއަރޕޯޓަށް އަންނަ އަދި ފުރާ ހުރިހާ ފްލައިޓްތަކެއް ކަރާޗީ އެއަރޕޯޓަށް ބަދަލުކޮށްފައެވެ. މީގެ ތެރޭގައި އިސްލާމާބާދަށް ދަތުރުކުރަން ހަމަޖެހިފައިވާ ސަޢޫދީ އެއަރލައިންސްގެ އެސްވީ-726 ފްލައިޓްވެސް ހިމެނެއެވެ.
ޕާކިސްތާނުގެ ސިވިލް އޭވިއޭޝަން އޮތޯރިޓީން ވަނީ ފަސިންޖަރުން އެއަރޕޯޓަށް ނައުމަށާއި ގެއަށް އެނބުރި ދިއުމަށް އިރުޝާދު ދީފައެވެ. އަދި ހާލަތު އާންމު ވުމުން އާންމު ފްލައިޓް އޮޕަރޭޝަންތައް އަލުން ފެށޭނެ ކަމަށް ބުނެފައިވެއެވެ.
ޕާކިސްތާން އިންޓަނޭޝަނަލް އެއަރލައިންސް (ޕީއައިއޭ) އިން ވަނީ މިވަގުތު ކުރިމަތިވެފައިވާ ސަލާމަތީ ހާލަތާ ގުޅިގެން އޮޕަރޭޝަނަލް ސަބަބުތަކަށްޓަކައި ކުރިއަށް އޮތް 12 ގަޑިއިރަށް އެ އެއަރލައިންގެ ހުރިހާ ފްލައިޓްތަކެއް ކެންސަލްކޮށްފައެވެ. އަދި ޕީއައިއޭގެ ތަރުޖަމާނު ވަނީ ފަސިންޖަރުން އެމީހުންގެ ފްލައިޓްތަކާ ބެހޭ އަޕްޑޭޓްތައް ހޯދުމަށް ޕީއައިއޭގެ ކޯލް ސެންޓަރުތަކާ ގުޅުމުގައި ދެމިތިބުމަށް ބުނެފައެވެ.
މީގެ އިތުރުން، އިންޑިއާގެ ގިނަ އެއަރލައިންތަކުން ވަނީ އިންޑިއާ ބާރުގެ ދަށުގައިވާ ކަޝްމީރަށާއި ރާޖަސްތާން އަދި ޕަންޖާބު ފަދަ ބޯޑަރު ސްޓޭޓްތަކުގެ ބައެއް ސިޓީތަކަށް ކުރާ ދަތުރުތައްވެސް ކެންސަލްކޮށްފައެވެ. މީގެ ތެރޭގައި ސްޕައިސްޖެޓް، އިންޑިގޯ އެއަރލައިންސް އަދި އެއަރ އިންޑިއާ ހިމެނެއެވެ.
ޕާކިސްތާނުގެ ވައިގެ މަގާއި އެއާޕޯޓުތައް ބަންދުކޮށްފައި މިވަނީ ރޭ އިންޑިއާއިން އެ ޤައުމަށް މިސައިލް ހަމަލާތަކެއް ދިނުމާއި ގުޅިގެންނެވެ.
މި ދެ ނިއުކްލިއަރ ހަތިޔާރު އެކުލެވޭ ގައުމުގެ މެދުގައި ހަމަލާތައް ދީފައިވަނީ، ވޭތުވެދިޔަ މަހު އިންޑިއާ ބެލުމުގެ ދަށުގައިވާ ކަޝްމީރުގައި ފަތުރުވެރިންނަށް ދިން ނިރުބުވެރި ހަމަލާއަކާ ގުޅިގެން ދެ ގައުމުގެ ދެމެދުގައި އުފެދިފައިވާ ހަމަނުޖެހުންތައް އިތުރުވަމުން ދަނިކޮށެވެ. އިންޑިއާއިން މި ހަމަލާގެ ޒިންމާ ޕާކިސްތާނާ ގުޅުވާފައިވާއިރު، ޕާކިސްތާނުން ވަނީ މިކަމުގައި އެއްވެސް ދައުރެއް އޮތްކަމަށް ދެކޮޅު ހަދާފައެވެ.