ޣައްޒާގައި އިންސާނީ އެހީ ހޯދުމަށް މަސައްކަތްކުރަމުންދިޔަ 71 ފަލަސްތީނު ރައްޔިތުން ބުދަ ދުވަހު އިސްރާއީލީ ސިފައިންގެ އަތުން ޝަހީދުވެއްޖެއެވެ. ސިއްހީ މަސްދަރުތަކުން މައުލޫމާތު ދޭ ގޮތުގައި މި މީހުންގެ ތެރެއިން ގިނަ ބަޔަކު މަރުވެފައިވަނީ އުތުރު ޣައްޒާގެ ޒިކިމް ކްރޮސިންގ ކައިރީގައެވެ. އަދި އަނެއްބައި މީހުން މަރުވެފައިވަނީ ދެކުނުގެ މޮރާގް ކޮރިޑޯ ސަރަހައްދުގައެވެ. މި ހާދިސާގައި 648 އަށް ވުރެ ގިނަ މީހުން ޒަޚަމްވެ، ސަރަހައްދުގެ އިންސާނީ ހާލަތު އިތުރަށް ގޯސްވެގެން ގޮސްފައިވެއެވެ.
ޣައްޒާގެ ހެލްތު މިނިސްޓްރީން ހާމަކުރި ގޮތުގައި ކާބޯތަކެތި ނުލިބުމުގެ ސަބަބުން މިހާތަނަށް 154 މީހުން މަރުވެފައިވެއެވެ. މީގެ ތެރޭގައި 89 ކުޑަކުދިން ހިމެނެއެވެ. އެހީދޭ އޭޖެންސީތަކުން ބުނާ ގޮތުގައި ޣައްޒާއަށް އެހީ ދިނުމަށް ހަތަރު ދުވަހުގެ ތެރޭގައި ވަދެފައިވަނީ އެންމެ 269 ޓްރަކެވެ. އެއީ އަސާސީ ބޭނުންތައް ފުއްދުމަށް ދުވާލަކަށް ބޭނުންވާ 500 އިން 600 އަށް ވުރެ މާ މަދު އަދަދެކެވެ.
އެމެރިކާ އާއި އިސްރާއީލުގެ އެހީތެރިކަމާއެކު ހިންގާ ޣައްޒާ ހިއުމެނިޓޭރިއަން ފައުންޑޭޝަން (ޖީއެޗްއެފް) އަށް އދ އާއި އެންޖީއޯތަކުން ފާޑުކިޔަމުންދަނީ އެކަށީގެންވާ އެހީ އާއި އެހީ ބަހާ ތަންތަނުގެ ރައްކާތެރިކަން ކަށަވަރު ނުކުރެވޭތީއެވެ. މޭ މަހުން ފެށިގެން ޖީއެޗްއެފްގެ ސައިޓުތަކުން އެހީ ހޯދަން އުޅުނު 1،000 އަށް ވުރެ ގިނަ މީހުން މަރުވެފައިވާ ކަމަށް ރިޕޯޓުކުރެވެއެވެ.
މި ދިމާވާ ހާދިސާތަކާއެކު، އިސްރާއީލުގެ އެއަރ ސްޓްރައިކްތައް ޣައްޒާގެ އެކި ސަރަހައްދުތަކުގައި ކުރިއަށްދާއިރު، އިތުރު 15 ފަލަސްތީނު ރައްޔިތުން މަރުވެފައިވެއެވެ. މީގެ ތެރޭގައި ނޫސްވެރިޔާ އިބްރާހިމް މަހުމޫދު ހައްޖާޖް ވެސް ހިމެނެއެވެ. ހަނގުރާމަ ފެށުނީއްސުރެ 60،000 އަށް ވުރެ ގިނަ ފަލަސްތީނުން މަރުވެ، ބަނޑުހައިހޫނުކަން ދުވަހެއް ދުވަހަކަށް އިތުރުވަމުންދާއިރު، ވަގުތުން ބައިނަލްއަޤްވާމީ އެހީތެރިކަމަށް ގޮވާލުންތައް އިތުރުވަމުންދެއެވެ.