އިންޑޮނޭޝިއާގެ ޕާލަމެންޓް މެންބަރުންނަށް ލިބޭ މާލީ އިނާޔަތްތަކާ ދެކޮޅަށް ފެށުނު މުޒާހަރާތަކުގައި 6 މީހަކު މަރުވުމާ ގުޅިގެން، އެ ގައުމުގެ ސަލާމަތީ ބާރުތައް ވަރުގަދަ ކޮށްފިއެވެ. މި މުޒާހަރާތަކުގެ ސަބަބުން ރައީސް ޕްރަބޯވޯ ސުބިއާންޓޯ ވަނީ އިނާޔަތްތަކާ ގުޅޭ ނިންމުން އަނބުރާ ގެންދަން މަޖުބޫރުވެފައެވެ.
މުޒާހަރާތައް ފެށުނީ ސުލްހަވެރިކަމާއެކު ނަމަވެސް، ޕެރަމިލިޓަރީ ފުލުހުންގެ ޔުނިޓަކުން 21 އަހަރުގެ ޑެލިވަރީ ޑްރައިވަރެއް ކަމުގައިވާ އައްފާން ކުރުނިއަވާންގެ ގައިމައްޗަށް އުޅަނދެއް އަރާ މަންޒަރު ދައްކުވައިދޭ ވީޑިއޯއެއް ހާމަވުމާ ގުޅިގެން، މުޒާހަރާތައް ވަނީ އަނިޔާވެރި ގޮތަކަށް ބަދަލުވެފައެވެ.
ވެރިކަން ހަވާލުވުމަށްފަހު ރައީސް ޕްރަބޯވޯގެ ވެރިކަމުގައި ދިމާވި އެންމެ ބޮޑު ހަމަނުޖެހުން ކަމުގައިވާ މި މުޒާހަރާތައް ވަނީ ވެރިރަށް ޖަކާޓާއިން ފެށިގެން ޔޮގްޔަކާޓާ، ބަންޑުންގް، ސެމަރަންގް، ސުރަބަޔާ އަދި އުތުރު ސުމަޓްރާގެ މެޑާން ފަދަ ބޮޑެތި ސިޓީތަކަށް ފެތުރިފައެވެ.
މި ހަފްތާގެ ތެރޭގައި ޗައިނާގައި ބޭއްވުމަށް ހަމަޖެހިފައިވާ ދެވަނަ ބޮޑު ހަނގުރާމައިގެ ނިމުން ފާހަގަކުރުމުގެ ގޮތުން ބާއްވާ އަސްކަރީ ޕަރޭޑަށް ރައީސް ޕްރަބޯވޯ ދިއުން ވަނީ މި ހަމަނުޖެހުންތަކާ ގުޅިގެން ކެންސަލްކޮށްފައެވެ. އަދި އެމަނިކުފާނުގެ ގާތް އެކުވެރިއެއް ކަމަށްވާ ދިފާއީ ވަޒީރު ޝަފްރީ ޝަމްސުއްދީން ވަނީ ހަމަނުޖެހުން އުފައްދާ މީހުންނާއި ވައްކަންކުރާ މީހުންނާ މެދު ހަރުކަށި ފިޔަވަޅު އަޅާނެ ކަމަށް އިންޒާރުދީފައެވެ.
ފުލުހުން ވަނީ ޖަކާޓާގެ އެކި ސަރަހައްދުތަކުގައި ޗެކްޕޮއިންޓްތައް ޤާއިމްކޮށް، ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި ދަތުރުތައް ކުރަމުންދާ ކަމަށް ފުލުހުންގެ ތަރުޖަމާނެއް މައުލޫމާތު ދީފައިވެއެވެ.