އިސްރާއީލުގެ ބާރުތަކުން ހޯމަ ދުވަހު ޣައްޒާގެ އެކި ސަރަހައްދުތަކަށް ދިން ޖައްވީ ހަމަލާތަކުގައި މާބަނޑު އަންހެނަކާއި އޭނާގެ ބަނޑުގައި އޮތް ދަރިފުޅާއި އަދި އެހެން ކުޑަކުދިން ހިމެނޭ ގޮތަށް ގިނަ އަދަދެއްގެ އާންމު ރައްޔިތުން ޝަހީދުވެއްޖެއެވެ.
އަލް-ޝިފާ ހޮސްޕިޓަލުގެ މެޑިކަލް ވަސީލަތްތަކުން މައުލޫމާތު ދިން ގޮތުގައި، ޣައްޒާ ސިޓީގެ ހުޅަނގު ފަރާތުގައި އޮންނަ އަލް-ޝާޓީ ރެފިއުޖީ ކޭމްޕް ކައިރީގައި ހުރި ގެއަކަށް ދިން ހަމަލާއެއްގައި މާބަނޑު އަންހެނަކާއި އޭނާގެ ބަނޑުގައި އޮތް ކުއްޖަކާއި އަދި އެހެން ކުއްޖަކު ޝަހީދުވެފައިވެއެވެ. މީގެ އިތުރުން، ސިޓީގެ ހުޅަނގު ފަރާތުގައި އޮންނަ އަލް-ނަސްރު މަގުމަތީގައި ހުރި ހިޖުރަކުރި މީހުންގެ ޓެންޓަކަށް ދިން ހަމަލާއެއްގައި ދެ ފިރިހެން ކުއްޖަކު ޝަހީދުވެފައިވެއެވެ.
ޣައްޒާގެ ދެކުނުގައި، އަލް-ސަބްރާ ސަރަހައްދުގައި ތިބި އާންމު ރައްޔިތުންގެ ބަޔަކަށް އިސްރާއީލީ ބާރުތަކުން އަމާޒުކޮށް ދިން ހަމަލާއެއްގައި އެކަކު މީހަކު ޝަހީދުވެ، އެތައް ބަޔަކު ބޮޑެތި އަނިޔާތަކާއެކު އަލް-އަހްލީ ބެޕްޓިސްޓް ހޮސްޕިޓަލަށް ގެންގޮސްފައިވެއެވެ.
މެދު ޣައްޒާގައި، ދެއިރު އަލް-ބަލަހުގައި ހުންނަ އަލް-އަޤްސާ ޝަހީދުންގެ ހޮސްޕިޓަލުން ކަށަވަރުކޮށްދިން ގޮތުގައި، ސިޓީގެ އިރުމަތީގައި އޮންނަ އަލް-މަޒްރަޢާ ސްކޫލުގައި ތިބި އާންމު ރައްޔިތުންގެ ބަޔަކަށް އިސްރާއީލުން ދިން ހަމަލާއެއްގައި އެއް ފިރިހެނަކު ޝަހީދުވެ، އެހެން ބަޔަކަށް އަނިޔާވެފައިވެއެވެ.
2023 ވަނަ އަހަރުގެ އޮކްޓޯބަރު މަހުން ފެށިގެން ޣައްޒާއަށް އިސްރާއީލުން ދެމުންދާ އަނިޔާވެރި ހަމަލާތަކުގައި މިހާތަނަށް މަދުވެގެން 63,557 ފަލަސްތީނު ރައްޔިތުން ޝަހީދުވެފައިވާ ކަމަށް ލިޔެކިޔުންތަކުން ދައްކައެވެ. އަދި 160,660 އަށްވުރެ ގިނަ މީހުންނަށް އަނިޔާވެފައިވެއެވެ.