އިޒްރޭލުން ޣައްޒާގައި ހިންގަމުންދާ ހަނގުރާމައިގައި ޝަހީދުކޮށްލި 5 އަހަރުގެ ފަލަސްތީނު އަންހެން ކުއްޖެއްގެ ވާހަކަ ކިޔައިދޭ ޑޮކިއުމެންޓަރީ ޑްރާމާ “ދަ ވޮއިސް އޮފް ހިންދް ރަޖަބް” އަށް ވެނިސް ފިލްމު ފެސްޓިވަލްގެ ސިލްވަރ ލަޔަންގެ އެވޯޑް ލިބިއްޖެއެވެ.
ފްރެންޗް-ޓިއުނީޝިއަން ޑައިރެކްޓަރު ކައުތަރު ބެން ހަނިއާ ހަދާފައިވާ މި ފިލްމަށް ދެވަނަ އެވޯޑް ލިބުނީ އެމެރިކާގެ އިންޑީ ޑައިރެކްޓަރު ޖިމް ޖާމުޝްގެ “ފާދަރ މަދަރ ސިސްޓަރ ބްރަދަރ” އަށް ފަހުގައެވެ. މި ފިލްމުގައި ދައްކަނީ ހިންދް ރަޖަބް އާއި އޭނާގެ އާއިލާ ޣައްޒާ ނުކުންނަށް ސަލާމަތްވުމަށް މަސައްކަތްކުރި ވަގުތު އިޒްރޭލުގެ ބާރުތަކުން އެ ކުޑަކުއްޖާ މަރާލި މައްސަލައިގެ ހަޤީޤީ ވާހަކައެވެ.
މި ފިލްމުގައި ބޭނުންކޮށްފައިވަނީ ހިންދް ރަޖަބް ފަލަސްތީނު ރެޑް ކްރެސެންޓް ސޮސައިޓީއަށް ގުޅި އޯޑިއޯއެވެ. އޭނާގެ މާމަ، ބޮޑުބޭބެ އަދި ތިން ބޭބެ މަރުވެފައި އޮތް ވަޒަން ޖަހާފައިވާ ކާރެއްގައި ހިންދް އޮށޯޗެގެން އޮތް ވަގުތު ރެސްކިއު މަސައްކަތްތެރިން އޭނާއަށް ހިތްވަރުދިން މަންޒަރުތައް މި ފިލްމުގައި ހިމަނާފައިވެއެވެ. އެއަށްފަހު އެ ކުޑަކުއްޖާ ވެސް މަރާލައި، އޭނާ ސަލާމަތްކުރަން ދިޔަ ދެ އެމްބިއުލެންސް މަސައްކަތްތެރިން ވެސް މަރާލާފައިވެއެވެ.
މި އެވޯޑް ބަލައިގަންނަމުން ބެން ހަނިއާ ވިދާޅުވީ ހިންދްގެ ވާހަކައަކީ އެންމެ ކުޑަކުއްޖެއްގެ ވާހަކައެއް ނޫން ކަމަށާއި، ނުރައްކާތެރި ގޮތެއްގައި މުޅި ޤައުމެއްގެ ނަސްލު ހަލާކުކޮށްލުމުގެ ވާހަކަ ކަމަށެވެ. “ސިނަމާއަށް ހިންދް އަނބުރާ ގެނެވޭކަށް ނެތް، އަދި އޭނާއާ ދެކޮޅަށް ހިންގި އަނިޔާވެރިކަން ފޮހެލެވޭކަށް ވެސް ނެތް. ގެއްލުނު އެއްޗެއް އަނބުރާ ގެނެވޭކަށް ނެތް. އެކަމަކު ސިނަމާއަށް އޭނާގެ އަޑު ރައްކާކޮށް، އެ އަޑު ބޯޑަރުތަކުން އަނެއް ފަރާތަށް ފޯރުކޮށްދެވޭނެ،” ޑައިރެކްޓަރު ވިދާޅުވިއެވެ.
64,000 އަށް ވުރެ ގިނަ ފަލަސްތީނުން، އޭގެ ތެރޭގައި 18,000 އަށް ވުރެ ގިނަ ކުޑަކުދިން މަރާލާފައިވާ އިޒްރޭލުގެ ގާޒާގެ ހަނގުރާމައިގެ ހިޔަނި މި އަހަރުގެ ފެސްޓިވަލްގައި ވަރަށް ބޮޑަށް ފެނިގެން ދިޔައެވެ. ގޯލްޑަން ލަޔަންއެވޯޑް ހާސިލުކުރި ޖާމުޝް ވެސް އިޒްރޭލުން ޣައްޒާގައި ހިންގަމުންދާ ހަނގުރާމައާ ދެކޮޅު ކަމުގެ ނިޝާނެއްގެ ގޮތުން “އެނަފް” ލިޔެފައިވާ ބެޖެއް އެވޯޑް ދިނުމުގެ ރަސްމިއްޔާތުގައި ހެއްދެވިއެވެ.