ޔޫކްރެއިންއިން ރޭ މޮސްކޯއަށް ދިން ބޮޑު ޑްރޯން ހަމަލާއަކާ ގުޅިގެން ރަޝިއާގެ ވައިގެ ދިފާއީ ނިޒާމުތައް ހަރަކާތްތެރިވެ، އެ ސިޓީގެ ހަތަރު އެއާޕޯޓްގެ ތެރެއިން ދެ އެއާޕޯޓެއް ވަގުތީ ގޮތުން ބަންދުކުރަން ޖެހިފައިވާ ކަމަށް ރަޝިއާގެ ކަމާބެހޭ ފަރާތްތަކުން ހޯމަ ދުވަހު ބުނެފިއެވެ. ރޮއިޓާސް ރިޕޯޓެއްގައިވާ ގޮތުން، މޮސްކޯގެ މޭޔަރު ސަރްގޭ ސޮބްޔާނިން ޓެލެގްރާމް މެސެޖިން އެޕްގައި ވިދާޅުވެފައިވަނީ، އާދިއްތަ ދުވަހުގެ ރޭ 10:00 ޖެހުމާއި ހަމައިން ފެށިގެން ފަސް ގަޑިއިރުގެ ތެރޭގައި ރަޝިއާގެ ދިފާއީ ޔުނިޓްތަކުން 28 ޑްރޯން ވައްޓާލާފައިވާ ކަމަށެވެ.
އަލްޖަޒީރާ ރިޕޯޓްކޮށްފައިވާ ގޮތުގައި، ޔޫކްރެއިންގެ ޑްރޯން ހަމަލާތަކުގައި ރަޝިއާގެ ބްރިޔާންސްކް ސަރަހައްދުގައި ދެ އާންމު މީހަކަށް އަނިޔާވެ ހޮސްޕިޓަލުގައި އެޑްމިޓްކުރެވިފައިވާ ކަމަށް އެ ސަރަހައްދުގެ ގަވަރުނަރު އެލެގްޒެންޑަރ ބޮގޮމާޒް ވިދާޅުވިއެވެ. އަދި ހުޅަނގުގެ ބެލްގޮރޮޑް ސަރަހައްދުގައި، ޔޫކްރެއިންގެ ޑްރޯން ހަމަލާތަކުގެ ސަބަބުން 16 މީހުންނަށް އަނިޔާވެފައިވާ ކަމަށް އެ ސަރަހައްދުގެ ގަވަރުނަރު ވިޔަޗެސްލާވް ގްލަޑްކޮވް ވިދާޅުވިއެވެ.
ރޮއިޓާސް ރިޕޯޓެއްގައިވާ ގޮތުން، ރަޝިއާގެ އެވިއޭޝަން އޮތޯރިޓީ، ރޮސަވިއޭޝިއާއިން ބުނެފައިވަނީ، ދަތުރުފަތުރުގެ ސަލާމަތްތެރިކަން ކަށަވަރުކުރުމަށްޓަކައި މުހިންމު ހަބެއް ކަމަށްވާ ޑޮމޮޑެޑޮވޯ އެއާޕޯޓާއި ކުޑަޒުކޮވްސްކީ އެއާޕޯޓް ވަގުތީ ގޮތުން ބަންދުކޮށްފައިވާ ކަމަށެވެ. ނަމަވެސް ގެއްލުމެއް ލިބިފައިވާ ކަމުގެ އެއްވެސް މައުލޫމާތެއް ލިބިފައެއް ނުވެއެވެ.
އަލްޖަޒީރާ ރިޕޯޓްކޮށްފައިވާ ގޮތުގައި، ރަޝިއާއިން އާދިއްތަ ދުވަހުގެ ރޭ ޔޫކްރެއިންއަށް 101 ޑްރޯން ހަމަލާ ދީފައިވާ ކަމަށް ޔޫކްރެއިންގެ ވައިގެ ސިފައިން ބުނެއެވެ. އޭގެ ތެރެއިން 90 ޑްރޯން ވައްޓާލާ ނިއުޓްރަލައިޒްކޮށްފައިވެއެވެ. ޔޫކްރެއިންގެ ހާރިޖީ ވަޒީރު އިހޯރ ކްލައިމެންކޯ އާދިއްތަ ދުވަހު ވިދާޅުވީ، ހަތް ކުޑަކުދިން ހިމެނޭ ގޮތަށް 29 މީހުންނަށް އަނިޔާވެފައިވާ ކަމަށެވެ. ރިޕޯޓްގައިވާ ގޮތުން، މަދުވެގެން މީހަކު މަރުވެފައިވާކަން އޮފިޝަލުން ކަށަވަރުކޮށްދިނެވެ.
މި ދެ ހަމަލާގެ އިތުރުން، ރަޝިއާގެ ރައީސް ވްލަޑިމިއަރ ޕޫޓިން އާދިއްތަ ދުވަހު ވިދާޅުވީ، ރަޝިއާގެ އާ ނިއުކްލިއަރ ބާރުގެ ބުރެވެސްޓްނިކް ކްރޫޒް މިސައިލްގެ ނިންމާލާ ތަޖުރިބާތައް މިހާރު ނިމިފައިވާ ކަމަށެވެ.
ޕޫޓިން ވަނީ މި ހަތިޔާރު ރަޝިއާގެ އަސްކަރީ ބާރުތަކުގެ ތެރޭގައި ހިމެނުމަށް ބޭނުންވާ އުމްރާނީ ތަރައްގީ ތައްޔާރުކުރުމަށް އަސްކަރިއްޔާއަށް އިރުޝާދު ދެއްވާފައެވެ. އޭނާ މި މިސައިލް ސިފަކުރެއްވީ، ދުނިޔޭގެ އެހެން އެއްވެސް ބަޔަކަށް ނެތް، ހާއްސަ އުފެއްދުމެއްގެ ގޮތުގައެވެ. އަދި ބުރެވެސްޓްނިކްއަކީ އިތުރު ނުކުރެވޭ ރޭންޖެއް ލިބިފައިވާ އެއްޗެއް ކަމަށް އޭނާ ފާހަގަކުރެއްވިއެވެ