އޮސްޓްރޭލިއާގެ މަޖިލިސް މެމްބަރެއް ކަމަށްވާ ޕޯލިން ހެންސަން، މުސްލިމް އަންހެނުންގެ ހެދުމެއް ކަމަށްވާ މޫނުބުރުގާ މަނާކުރުމަށް ގޮވާލައި އެ ހެދުން އަޅައިގެން މަޖިލީހަށް ވަނުމުގެ ސަބަބުން ހަފްތާއެއްގެ މުއްދަތަށް ސަސްޕެންޑްކޮށް، އެކަން ރަސްމީކޮށް ކުށްވެރިކޮށްފިއެވެ. ހޯމަ ދުވަހު އޭނާ ކުރި މި ޢަމަލާ ގުޅިގެން އެހެން މެމްބަރުން ވަނީ އެކަން ކުށްވެރިކޮށްފައެވެ. އެއް މެމްބަރަކު އޭނާގެ ޢަމަލު ސިފަކޮށްފައިވަނީ ފާޅުކަން ބޮޑު ނަސްލީ ތަފާތުކުރުމެއްގެ ގޮތުގައެވެ.
އެންޓި-އިމިގްރޭޝަން ޕާޓީ ކަމަށްވާ ވަން ނޭޝަންގެ ކުއީންސްލޭންޑް ސެނެޓަރު ހެންސަން މިހެން ޢަމަލު ކުރީ، މޫނުބުރުގާ އާންމު ތަންތަނުގައި މަނާކުރުމުގެ ބިލެއް ހުށަހެޅުމަށް މަސައްކަތްކުރުމުގެ ގޮތުންނެވެ. އެހެން މެންބަރުން ބިލު ހުށަހެޅުން ހުއްޓުވުމާއެކު، އޭނާ ވަނީ ކަޅު މޫނުބުރުގާއެއް އަޅައިގެން އެނބުރި މަޖިލީހަށް އައިސްފައެވެ. މިއީ އޭނާ މަޖިލީހުގައި މި ހެދުން އެޅި ދެވަނަ ފަހަރެވެ. ހެންސަން ބުނެފައިވަނީ އޭނާގެ ބިލު މަޖިލީހުން ބަލައިނުގަތުމާ ގުޅިގެން އިޙްތިޖާޖު ކުރުމުގެ ގޮތުން މިކަން ކުރީ ކަމަށެވެ.
މުސްލިމް ގްރީންސް މެމްބަރު މެހްރީން ފާރޫޤީ ވިދާޅުވީ، މިއީ ފާޅުކަން ބޮޑު ނަސްލީ ތަފާތުކުރުން ދައްކާ މެމްބަރެއް ކަމަށެވެ. މެހްރީން ފާރޫޤީއަކީ މީގެ ކުރިން ނަސްލީ ތަފާތުކުރުމުގެ ޝިކާރައަކަށް ހެންސަންގެ ފަރާތުން ވެފައިވާކަމަށް ފެޑެރަލް ކޯޓުން ނިންމާފައިވާ މީހެކެވެ. ހެންސަންގެ މި ޢަމަލު ވެސްޓަރން އޮސްޓްރޭލިއާގެ އިންޑިޕެންޑެންޓް ސެނެޓަރު ފާތިމާ ޕޭމަން ސިފަކުރެއްވީ ލަދުވެތި ޢަމަލެއްގެ ގޮތުގައެވެ.
ބަންޑާރަ ނައިބު ޕެނީ ވޮންގް ވަނީ ހެންސަން ކުށްވެރިކުރުމުގެ ޕެޓިޝަނެއް ހުށަހަޅާފައެވެ. ވޮންގް ވިދާޅުވީ ހެންސަން ގެންދަނީ ދިހަވަރަކަށް އަހަރު ވަންދެން ނަސްލީ ތަފާތުކުރުން އިޙްތިޖާޖެއްގެ ގޮތުގައި ދައްކަމުން ކަމަށާއި، އޭނާ އަކީ އޮސްޓްރޭލިއާގެ މަޖިލީހުގެ މެންބަރަކަށް ވުމަށް އެކަށީގެންވާ މީހެއް ނޫން ކަމަށެވެ. މި ޕެޓިޝަން ވަނީ 55 ވޯޓުން ފަސް ވޯޓާ އެކު ފާސްކޮށްފައެވެ. މި ޕެޓިޝަންގައި ބުނެފައިވަނީ ހެންސަންގެ ޢަމަލަކީ ދީނުގެ މައްޗަށް ބިނާކޮށް މީހުންނަށް ފުރައްސާރަކުރުމާއި ނިކަމެތިކުރުމުގެ ނިޔަތުގައި ކުރި ކަމެއް ކަމަށާއި، އަދި މުސްލިމް އޮސްޓްރޭލިއާގެ ރައްޔިތުންނަށް އިހުތިރާމް ކުޑަކުރި ކުރުމެއް ކަމަށެވެ.
ހެންސަން ވަނީ ފޭސްބުކްގައި ލިޔެފައިވާ ޕޯސްޓެއްގައި، “އެމީހުން އަހަރެން ބުރުގާ އެޅުން ނޭދޭނަމަ – ބުރުގާ މަނާކުރާށެވެ،” މިހެން ބުނެފައެވެ. އޭނާ 2017 ވަނަ އަހަރު ވެސް ވަނީ ޕާލިމެންޓަށް ބުރުގާ އަޅައިގެން ވަދެ، އެ ހެދުން މަނާކުރުމަށް ގޮވާލާފައެވެ.