އެމެރިކާގެ ހޯމްލޭންޑް ސެކިއުރިޓީ ޑިޕާޓްމަންޓާއި އެ ގައުމުގެ އިމިގްރޭޝަން އެންޑް ކަސްޓަމްސް އެންފޯސްމަންޓް (އައި.ސީ.އީ) އާއެކު ގޫގުލްއިން ބާއްވަމުންދާ ގުޅުންތައް ވަގުތުން ހުއްޓާލުމަށް ގޮވާލައި އެ ކުންފުނީގެ 1،000 އެއްހާ މުވައްޒަފުން ސޮއިކޮށް އޯޕަން ލެޓަރއެއް ނެރެފިއެވެ. މުވައްޒަފުން ތުހުމަތުކުރާ ގޮތުގައި ގޫގުލްގެ ޓެކްނޮލޮޖީ ބޭނުންކުރަމުންދަނީ ދައުލަތުގެ ފަރާތުން ހިންގާ އަނިޔާވެރި އަމަލުތަކާއި މީހުން ހިފާ ހައްޔަރުކުރުން ފަދަ ކަންކަމަށެވެ.
މި ޕެޓިޝަންގައި ބަޔާންކޮށްފައިވާ ގޮތުގައި، ގޫގުލްގެ ކްލައުޑް ސިސްޓަމްތަކާއި ޖެނެރޭޓިވް އޭ.އައި ޓެކްނޮލޮޖީ ބޭނުންކޮށްގެން ބޯޑަރުތަކުގައި މީހުން މޮނިޓަރކުރުމާއި، ހިޖުރަކުރާ މީހުން ޓްރެކްކުރުމުގެ މަސައްކަތް އައި.ސީ.އީ އާއި ސީ.ބީ.ޕީ އިން ދަނީ ކުރަމުންނެވެ. މީގެ އިތުރުން ޔޫޓިއުބް މެދުވެރިކޮށް އައި.ސީ.އީ އަށް މީހުން ރެކްރޫޓްކުރުމުގެ އިޝްތިހާރުތައް ފަތުރަމުންދާ ކަމަށްވެސް މުވައްޒަފުން ބުނެފައިވެއެވެ.
“އަޅުގަނޑުމެންނަކީ ގޫގުލްގެ ލީޑަރޝިޕުން އަޅުގަނޑުމެންގެ އަގުތަކާއި އުސޫލުތަކާ ހިލާފުވަމުންދާތީ އެކަމާ ދެކޮޅަށް ތެދުވެ ތިބި މުވައްޒަފުންނެވެ. ދައުލަތުގެ ފަރާތުން ހިންގާ އަނިޔާވެރިކަމަށް އެހީތެރިވުމަށް އަޅުގަނޑުމެން އުފައްދާ ޓެކްނޮލޮޖީ ބޭނުންކުރުމަކީ ބަލައިގަނެވޭނެ ކަމެއް ނޫން،” މުވައްޒަފުންގެ ސިޓީގައި ބަޔާންކޮށްފައިވެއެވެ.
މުވައްޒަފުން ވަނީ މިކަމާ ގުޅޭގޮތުން ކުންފުނީގެ މެނޭޖްމަންޓާއެކު ސުވާލާއި ޖަވާބުގެ ސެޝަނެއް ވަގުތުން ބޭއްވުމަށް ގޮވާލާފައެވެ. އަދި ހޯމްލޭންޑް ސެކިއުރިޓީއާއެކު ވެފައިވާ ހުރިހާ އެއްބަސްވުންތަކެއް ހާމަކުރުމަށާއި، މިފަދަ އިދާރާތަކާއެކު މަސައްކަތް ކުރުމުގައި ކުންފުނިން ގެންގުޅޭ “ރެޑް ލައިން” ތަކަކީ ކޮބައިކަން ސާފުކޮށްދިނުމަށްވެސް ވަނީ އެދިފައެވެ.
މި ޕެޓިޝަންގައި އިތުރު މުވައްޒަފުން ސޮއިކުރުމަށް ބާރުއަޅަމުންދާއިރު، އެކަށީގެންވާ އަދަދަކަށް ސޮއި ހަމަވުމުން ކުންފުނީގެ އިސްވެރިންނަށް ރަސްމީކޮށް މި ހުށަހެޅުން ހުށަހަޅާނެ ކަމަށް މުވައްޒަފުން ބުނެއެވެ. މިއީ ގޫގުލްގެ މުވައްޒަފުން ކުންފުނީގެ އަހްލާގީ މިންގަނޑުތަކާ ގުޅޭގޮތުން އިސްވެރިންނާ ދެކޮޅަށް ތެދުވި ފުރަތަމަ ފަހަރެއް ނޫނެވެ.