ސައުދީ އަރަބިއްޔާގެ ވެރިރަށް ރިޔާޒުގައި ހުންނަ އެމެރިކާގެ އެމްބަސީއަށް ދެ ޑްރޯން ހަމަލާއެއް އަމާޒުވެފައިވާ ކަމަށް އެ ގައުމުގެ ކަމާބެހޭ ފަރާތްތަކުން ހާމަކޮށްފިއެވެ. މި ހަމަލާގެ ސަބަބުން އެމްބަސީގެ އިމާރާތަށް ކުދިކުދި ގެއްލުންތައް ލިބި، އެ ސަރަހައްދުގައި ކުޑަ އަލިފާނުގެ ހާދިސާއެއް ހިނގާފައިވާ ކަމަށް ރިޕޯޓުތައް ބުނެއެވެ.
މީގެ އިތުރުން، ބަހުރޭންގެ ޝެއިޚް އީސާ ސަރަހައްދުގައި އޮންނަ އެމެރިކާގެ އެއާ ބޭސްއަކަށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން ވަރުގަދަ ޑްރޯން އަދި މިސައިލް ހަމަލާތަކެއް ދީފައިވާ ކަމަށް އެ ޖަމާއަތުން ވަނީ ބުނެފައެވެ. މި ހަމަލާގައި 20 ޑްރޯން އާއި ތިން މިސައިލް ބޭނުންކޮށްފައިވާ ކަމަށާއި، އޭގެ ސަބަބުން އެއާ ބޭސްގެ މައި ކޮމާންޑް ސެންޓަރާއި ހެޑްކުއާޓާޒް ހަލާކުވެ، ތެޔޮ ރައްކާކުރާ ތަންތަނުގައި އަލިފާން ރޯވެފައިވާ ކަމަށް އީރާނުން ދައުވާ ކުރެއެވެ.
މި ހަމަލާއާ ގުޅިގެން ބަހުރޭން ސަރުކާރުން އަދި ރަސްމީކޮށް އެއްވެސް އެއްޗެއް ބުނެފައެއް ނުވެއެވެ.
މެދުއިރުމަތީގެ މަސްރަހު ހޫނުވެފައިވާ މި ދަނޑިވަޅުގައި، ލުބުނާނުގެ ހިޒްބުالله ޖަމާއަތުން ވެސް ވަނީ އިސްރާއީލުގެ އުތުރުގައި އޮންނަ ރާމަތު ޑޭވިޑް އެއާ ބޭސްއަށް ހަމަލާދީފައެވެ. މިއަދު ފަތިހުގެ ވަގުތެއްގައި ގިނަ އަދަދެއްގެ ޑްރޯން ބޭނުންކޮށްގެން ދިން މި ހަމަލާގައި އަމާޒުކޮށްފައިވަނީ އެ ބޭސްގެ ރާޑަރު ސައިޓްތަކާއި ކޮންޓްރޯލް ރޫމްތަކަށް ކަމަށް އެ ޖަމާއަތުން ބުނެއެވެ.
ހިޒްބުالله އިން ބުނި ގޮތުގައި މި ހަމަލާއަކީ އިސްރާއީލުން ލުބުނާނުގެ އެކި ސަރަހައްދުތަކަށް ދެމުންދާ ނުރައްކާތެރި ހަމަލާތަކުގެ ބަދަލުހިފުމުގެ ގޮތުން ދިން ހަމަލާއެކެވެ. ސަރަހައްދީ މަސްރަހު އިތުރަށް ގޯސްވަމުންދާއިރު، ކަމާބެހޭ ފަރާތްތަކުން ދަނީ މި ހާދިސާތައް ވަރަށް ގާތުން ބަލަމުންނެވެ.