ސްރީ ލަންކާގެ ކަނޑުގެ ސަރަހައްދުން ދަތުރުކުރަމުންދިޔަ އީރާނުގެ މަނަވަރަކަށް އެމެރިކާގެ ސަބްމެރިންއަކުން ހަމަލާދީ ފައްތާލައިފި އެވެ. މި ހާދިސާއާ ގުޅިގެން އެމެރިކާގެ ޕެންޓަގަންގައި ބޭއްވި ނޫސްވެރިންގެ ބައްދަލުވުމެއްގައި ދިފާއީ ވަޒީރު ޕީޓް ހެގްސެތު ވަނީ މި ހަމަލާގެ ޒިންމާ އުފުލާފަ އެވެ.
ދިފާއީ ވަޒީރު ހެގްސެތު ވިދާޅުވި ގޮތުގައި، މިއީ ދެވަނަ ބޮޑު ހަނގުރާމައަށް ފަހު ޓޯޕެޑޯއަކުން ހަމަލާދީ މަނަވަރެއް ފައްތާލި ފުރަތަމަ ފަހަރެވެ. މި ހަމަލާގައި ފެތުނު މަނަވަރުގެ ނަން އެމެރިކާއިން ހާމަކޮށްފައި ނުވި ނަމަވެސް، ސްރީ ލަންކާގެ ކަނޑުގެ ސިފައިން ބުނާ ގޮތުގައި އެއީ އީރާނުގެ “އައިއާރުއައިއެސް ދޭނާ” އެވެ.
މި ހާދިސާ ހިނގިއިރު މަނަވަރުގައި 180 ފަޅުވެރިން ތިބި ކަމަށް ރިޕޯޓްތައް ބުނެ އެވެ. އޭގެ ތެރެއިން 32 މީހަކު ސްރީ ލަންކާގެ ކޯސްޓް ގާޑުން ވަނީ ސަލާމަތްކޮށްފަ އެވެ. ނަމަވެސް ބާކީ ތިބި ގާތްގަނޑަކަށް 140 ފަޅުވެރިން ވަނީ ގެއްލިފަ އެވެ.
ނޫސްވެރިންގެ ބައްދަލުވުމުގައި ވާހަކަދައްކަވަމުން ހެގްސެތު ވަނީ އީރާނަށް ވަރުގަދަ އިންޒާރުތަކެއް ދެއްވާފަ އެވެ. އޭނާ ވިދާޅުވީ އީރާނުން ގަބޫލުކުރީ ބައިނަލްއަގުވާމީ ކަނޑުގެ ސަރަހައްދުގައި އެ ގައުމުގެ މަނަވަރުތަކަށް ރައްކާތެރިކަމާއެކު ދަތުރުކުރެވިދާނެ ކަމަށް ކަމަށާއި، ނަމަވެސް ދާދި އަވަހަށް މުޅި އީރާން އެމެރިކާގެ ކޮންޓްރޯލްގެ ދަށަށް ގެންނާނެ ކަމަށެވެ. ހެގްސެތުގެ ވާހަކަތަކުން ދޭހަވާ ގޮތުގައި އީރާނަށް މިހާރު އޮތް ހަމައެކަނި ގޮތަކީ އަމާންދިނުމެވެ.
މީގެ އިތުރުން، އެމެރިކާއިން ބުނީ އީރާނުގެ ލީޑަޝިޕްގެ ގިނަ ބަޔަކު މިހާރު އަވަހާރަކޮށްލެވި، އެ ގައުމުގެ ލީޑަޝިޕް ނައްތާލެވިފައިވާ ކަމަށެވެ. އަދި އީރާނުގެ ވައިގެ ސަރަހައްދު މިހާރު އޮތީ އެމެރިކާ އާއި އިޒްރޭލުގެ ފުރިހަމަ ކޮންޓްރޯލްގެ ދަށުގައި ކަމަށް ވެސް ޕެންޓަގަންއިން ސިފަކުރެ އެވެ.
އެމެރިކާގެ ދިފާއީ އިދާރާއިން އިތުރަށް ފާހަގަކުރި ގޮތުގައި، އީރާނުން މިސައިލާއި ޑްރޯން ހަމަލާތައް ފޮނުވަމުންދިޔަ ނަމަވެސް، އެ ގައުމުގެ އަސްކަރީ ގާބިލުކަން މިހާރު ވަނީ ހަނގުރާމަ ފެށުނުއިރަށް ވުރެ ބޮޑުތަނުން ދަށްވެފަ އެވެ.