އެމެރިކާގެ ރައީސް ޑޮނަލްޑް ޓްރަމްޕް އީރާނަށް ދޭން ރާވާފައިވާ ވަރުގަދަ ހަމަލާތައް ދެ ހަފްތާގެ މުއްދަތަށް މަޑުޖައްސާލުމަށް އެއްބަސްވެއްޖެއެވެ. މި ނިންމެވުން ނިންމާފައިވަނީ އީރާނުން ހޯރްމުޒް ކަނޑުއޮޅި އަލުން ހުޅުވާލުމަށް އެއްބަސްވުމާ ގުޅިގެންނެވެ.
އަންގާރަ ދުވަހުގެ ރޭ، ހަމަލާ ދިނުމަށް ކަނޑައަޅާފައިވާ ވަގުތުގެ ކުޑަވަގުތުކޮޅެއް ކުރިން ޓްރަމްޕްގެ ސޯޝަލް މީޑިއާ ޕްލެޓްފޯމް ‘ޓްރުތް ސޯޝަލް’ ގައި ވިދާޅުވީ، ޕާކިސްތާނުގެ ބޮޑުވަޒީރު ޝެހްބާޒް ޝަރީފާއި ފީލްޑް މާޝަލް އާސިމް މުނީރު މެދުވެރިވެވަޑައިގެން ކުރެއްވި މަސައްކަތުން މި އެއްބަސްވުމަށް އާދެވިފައިވާ ކަމަށެވެ. ޓްރަމްޕް ވިދާޅުވި ގޮތުގައި، އީރާނުން ހޯރްމުޒް ކަނޑުއޮޅި ވަގުތުން އަދި ރައްކާތެރިކަމާއެކު ހުޅުވާލުމަށް އެއްބަސްވުމުން، ދެ ހަފްތާގެ މުއްދަތަށް ހަމަލާތައް މެދުކަނޑާލުމަށް އޭނާ ވަނީ ނިންމަވާފައެވެ.
މި އެއްބަސްވުމާ ގުޅިގެން އީރާނުގެ ފޮރިން މިނިސްޓަރު އައްބާސް އަރަގްޗީ ވިދާޅުވީ، އީރާނަށް ދޭ ހަމަލާތައް ހުއްޓާލައިފިނަމަ، އެ ގައުމުގެ ސިފައިންގެ ދިފާއީ ހަރަކާތްތައްވެސް މެދުކަނޑާލާނެ ކަމަށެވެ. އަދި ކުރިއަށް އޮތް ދެ ހަފްތާގެ ތެރޭގައި އީރާނުގެ ސިފައިންގެ އިރުޝާދުގެ ދަށުން ހޯރްމުޒް ކަނޑުއޮޅިން ދަތުރުފަތުރު ކުރުމުގެ ފުރުސަތު އޮންނާނެ ކަމަށް އޭނާ ކަށަވަރުކޮށްދެއްވިއެވެ.
އީރާނުގެ ސުޕްރީމް ނޭޝަނަލް ސެކިއުރިޓީ ކައުންސިލުން ނެރުނު ބަޔާނެއްގައި ބުނެފައިވަނީ، ކުރިއަށް އޮތް މަޝްވަރާތައް ކާމިޔާބުކަމާއެކު ކުރިއަށްދާނަމަ، މިހާރު ކަނޑައަޅާފައިވާ ދެ ހަފްތާގެ މުއްދަތު އިތުރުކުރުމުގެ ފުރުސަތު އޮތް ކަމަށެވެ. މި މައްސަލައިގައި އިތުރު މަޝްވަރާތައް ކުރިއަށް އޮތް ހަފްތާތަކުގައި ޕާކިސްތާނުގެ އިސްލާމްއާބާދުގައި ބޭއްވުމަށް ވަނީ ހަމަޖެހިފައެވެ.
އެމެރިކާ އާއި އީރާނާ ދެމެދު ދެ ހަފުތާގެ މުއްދަތަށް ހަމަލާ ބަދަލުކުރުން ހުއްޓާލުމަށާއި، ދުނިޔޭގެ އިގްތިސާދަށް މުހިންމު ހޯރްމުޒް ކަނޑުއޮޅި އަލުން ހުޅުވާލުމަށް އެއްބަސްވުމާ ގުޅިގެން ދުނިޔޭގެ ބާޒާރުގައި ތެލުގެ އަގު ވަރަށް ބޮޑަށް ދަށަށް ގޮސް، ހިއްސާގެ ބާޒާރުތަކަށް ބޮޑު ކުރިއެރުމެއް ވަނީ ލިބިފައެވެ.
މި އެއްބަސްވުމާއެކު ބްރެންޓް ކްރޫޑްގެ އަގު 13 އިންސައްތަ ދަށަށް ގޮސް، ފީފާއެއްގެ އަގު 94.80 ޑޮލަރަށް ވަނީ ތިރިވެފައެވެ. އަދި އެމެރިކާގެ ތެލުގެ އަގު 15 އިންސައްތައަށް ވުރެ ބޮޑަށް ދަށަށް ގޮސް، ފީފާއެއްގެ އަގު ވަނީ 95.75 ޑޮލަރަށް ތިރިވެފައެވެ. ނަމަވެސް، ފެބްރުއަރީ 28 ގައި ހަމަނުޖެހުންތައް ފެށުމުގެ ކުރިން ތެޔޮ ފީފާއެއް 70 ޑޮލަރަށް ހުރި އަގަށް ވުރެ އަދިވެސް މިހާރުގެ އަގުތައް ހުރީ މަތީގައެވެ.
މި އެއްބަސްވުމަކީ ދެ ގައުމުގެ ދެމެދުގައި އުފެދިފައިވާ ނުތަނަވަސްކަން ކުޑަކުރުމަށް ލިބުނު މުހިންމު ފުރުސަތެއްގެ ގޮތުގައި މަސްރަހު ދިރާސާކުރާ ފަރާތްތަކުން ދެކެއެވެ. ޓްރަމްޕް މީގެ ކުރިން އިންޒާރު ދެއްވާފައިވަނީ އީރާނުން އެމެރިކާގެ ޝަރުތުތަކަށް އެއްބަސްނުވެއްޖެނަމަ، ވަރުގަދަ ހަމަލާތަކެއް ދޭނެ ކަމަށެވެ.