ގާޒާއަށް އެހީ ހިފައިގެން ދަތުރުކުރި 50 އަށްވުރެ ގިނަ އުޅަނދު ހިމެނޭ “ގްލޯބަލް ސުމޫދު ފްލޮޓިލާ” (ޖީ.އެސް.އެފް) ސައިޕްރަސްގެ ހުޅަނގުން ބައިނަލްއަގުވާމީ ކަނޑުގެ ސަރަހައްދުން އިސްރާއީލު ސިފައިން ހުއްޓުވައިފިއެވެ. އެކްޓިވިސްޓުން ބުނާ ގޮތުގައި ހަތިޔާރު އެޅި ކޮމާންޑޯ އިން ވަނީ މި ފްލޮޓިލާގައި ހިމެނޭ ބައެއް އުޅަނދުފަހަރަށް އަރާފައެވެ.
މި ހާދިސާއާ ގުޅިގެން އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވަނީ، މިއީ ގާޒާގައި ތިބި ހަމާސްގެ ހަނގުރާމަވެރިން އެކަހެރިކުރުމަށް އަޅާފައިވާ ފިޔަވަޅުތައް މުގުރާލުމަށް ރޭވި ނުބައި ރޭވުމެއް ނާކާމިޔާބު ކޮށްލުން ކަމަށް ބުނެފައެވެ. ނަމަވެސް ފްލޮޓިލާގެ އިންތިޒާމުވެރިން ބުނަނީ މިއީ ބައިނަލްއަގުވާމީ ކަނޑުގެ ސަރަހައްދުގައި ހިންގި ކަނޑުފޭރުމުގެ އަމަލެއް ކަމަށެވެ.
މި ފްލޮޓިލާގައި 45 ގައުމަކުން 460 އަށްވުރެ ގިނަ އެކްޓިވިސްޓުން ބައިވެރިވެއެވެ. އޭގެ ތެރޭގައި އަޔަލޭންޑުގެ ރައީސްގެ ކޮއްކޮ ކެތަރިން ކޮނޮލީ ވެސް ހިމެނޭ ކަމަށް ރިޕޯޓުތައް ބުނެއެވެ. ތުރުކީގެ ޚާރިޖީ ވުޒާރާއިން ވަނީ ބައިނަލްއަގުވާމީ ކަނޑުގެ ސަރަހައްދުގައި އިސްރާއީލުން ހިންގި މި އަމަލު ހަރުކަށި އިބާރާތުން ކުށްވެރިކޮށްފައެވެ.
އިސްރާއީލުގެ ޚާރިޖީ ވުޒާރާއިން ބުނާ ގޮތުގައި މި ފްލޮޓިލާއަކީ އެއްވެސް އިންސާނީ އެހީއެއް ނެތް، ހަމައެކަނި ހަމަނުޖެހުން އުފެއްދުމަށް ކުރާ ކަމެކެވެ. ނަމަވެސް އެކްޓިވިސްޓުން ބުނަނީ އެމީހުން އުޅަނދުތަކުގައި ގާޒާގެ ރައްޔިތުންނަށް ބޭނުންވާ ކާބޯތަކެއްޗާއި، ތުއްތު ކުދިންގެ ކާނާ އަދި ބޭސްފަރުވާގެ ސާމާނު ހުންނާނެ ކަމަށެވެ.
މިދިޔަ މަހުވެސް މި ފްލޮޓިލާގެ 22 އުޅަނދެއް ކްރީޓް ކައިރިން އިސްރާއީލުން ހުއްޓުވައި، އޭގައި ތިބި 181 އެކްޓިވިސްޓުން ހައްޔަރުކުރިއެވެ. އޭގެ ތެރެއިން ގިނަ ބަޔަކު ފަހުން ދޫކޮށްލި ނަމަވެސް، ދެ މީހަކު އިސްރާއީލަށް ގެންގޮސް ސުވާލުކުރުމަށްފަހު ވަނީ ޑީޕޯޓްކޮށްލާފައެވެ.
އދ. އިން ހާމަކޮށްފައިވާ ގޮތުގައި ގާޒާގައި ހާލުގައި ޖެހިފައިވާ އާއިލާތަކަށް ސާފު ބޯފެނާއި ސިއްހީ ހިދުމަތްތައް ލިބުމުގައި ބޮޑެތި ހުރަސްތަކެއް އެބަހުއްޓެވެ. އިސްރާއީލުން ގާޒާ ބަންދުކޮށްފައި އޮތުމުގެ ސަބަބުން އިންސާނީ އެހީ ފޯރުކޮށްދިނުމަށް ވަނީ ވަރަށް ބޮޑަށް ދަތިވެފައެވެ.