ވެނެޒުއެލާއަށް މިދިޔަ ބުދަ ދުވަހު އައި ބާރުގަދަ ދެ ބިންހެލުމުގައި މަރުވި މީހުންގެ އަދަދު 920 އަށް އަރާފައިވާ ކަމަށް އޭއެފްޕީ ނިއުސް އެޖެންސީން ރިޕޯޓްކޮށްފިއެވެ. މި ހާދިސާގައި 50,000 އަށްވުރެ ގިނަ މީހުން ގެއްލިފައިވާ ކަމަށް އދ. ގެ ހިއުމަނިޓޭރިއަން އެފެއާޒް ޗީފް ޓޮމް ފްލެޗަރ ވަނީ ވިދާޅުވެފައެވެ.
މި ބިންހެލުންތަކުގައި ޒަޚަމްވި މީހުންގެ އަދަދު 3,300 އަށް އަރާފައިވާ ކަމަށް ބީބީސީން ރިޕޯޓްކޮށްފައިވާއިރު، ގައުމުގެ އިންޓަރިމް ރައީސް ޑެލްސީ ރޮޑްރިގޭޒް ހުކުރު ދުވަހު ވިދާޅުވީ އެންމެ ބޮޑަށް ގެއްލުން ލިބިފައިވަނީ ވެރިރަށް ކަރަކާސްއާ ކައިރީގައި އޮންނަ ލާ ގުއައިރާ ސަރަހައްދަށް ކަމަށެވެ.
މެގްނިޓިއުޑް 7.2 އަދި 7.5 ގެ ބާރުމިނުގައި އައި މި ދެ ބިންހެލުމަކީ ވޭތުވެދިޔަ 126 އަހަރު ތެރޭގައި އެ ސަރަހައްދަށް އައި އެންމެ ބާރުގަދަ ބިންހެލުންތަކެވެ. މި ބިންހެލުންތަކުގެ ސަބަބުން ވެރިރަށް ކަރަކާސްގެ އެއާޕޯޓަށް ބޮޑެތި ގެއްލުންތަކެއް ލިބި، ގިނަ އިމާރާތްތަކެއް ވަނީ ބިމާ ހަމަވެފައެވެ. އިމާރާތްތަކުގެ ދަށުގައި ތާށިވެފައިވާ މީހުން ސަލާމަތްކުރުމުގެ މަސައްކަތް މިހާރުވެސް ދަނީ ކުރަމުންނެވެ.
ވެނެޒުއެލާ ސަރުކާރުން މިހާރު ވަނީ ކުއްލި ނުރައްކަލުގެ ހާލަތު އިއުލާނުކޮށްފައެވެ. ޔޫއެސް ޖިއޮލޮޖިކަލް ސާވޭއިން ބުނާ ގޮތުގައި ފުރަތަމަ ބިންހެލުން އައީ ބިމުގެ 22 ކިލޯމީޓަރު އަޑިންނެވެ. އޭގެ އެއް މިނެޓު ފަހުން އައި ދެވަނަ ބިންހެލުން އައީ ބިމުގެ 10 ކިލޯމީޓަރު އަޑިންނެވެ. ބިމުގެ ތިލަ ހިސާބުތަކަށް އަންނަ ބިންހެލުންތަކުގެ ސަބަބުން ލިބޭ ގެއްލުން ބޮޑުވާކަން ފާހަގަކުރެވެއެވެ.
މި ހިތާމަވެރި ދަނޑިވަޅުގައި ދުނިޔޭގެ އެކި ގައުމުތަކުން ދަނީ ވެނެޒުއެލާއަށް އެހީތެރިކަން ފޯރުކޮށްދެމުންނެވެ. އެގޮތުން ސްޕެއިން، އެލްސަލްވަޑޯ، ސްވިޒަލޭންޑް، ކޮލަމްބިއާ އަދި މެކްސިކޯގެ ރެސްކިއު ޓީމުތައް މިހާރު ދަނީ އެ ގައުމުގައި ހަރަކާތްތެރިވަމުންނެވެ. އިންޑިއާއިން ވަނީ 35 ޓަނުގެ އެހީގެ ސާމާނާއި މެޑިކަލް އިކުއިޕްމަންޓްތަކާއެކު އަސްކަރީ ދެ މަތިންދާބޯޓު ފޮނުވާފައެވެ.
މީގެ އިތުރުން އެމެރިކާއިން ވަނީ 150 މިލިއަން ޑޮލަރުގެ އެހީގެ އިތުރުން، މީހުން ހޯދުމާއި ސަލާމަތްކުރުމުގެ މަސައްކަތަށް ހާއްސަ ޓީމެއް ފޮނުވާފައެވެ. އެމެރިކާގެ އަސްކަރިއްޔާގެ އިސް އޮފިސަރަކު މިހާރު ވަނީ އެހީގެ މަސައްކަތްތައް ބެލެހެއްޓުމަށް ކަރަކާސްއަށް ވަޑައިގެންފައެވެ.