ހޮރުމުޒް ކަނޑުއޮޅި އަލުން ހުޅުވާލުމާ ގުޅޭގޮތުން ހުށަހަޅާފައިވާ ހުށަހެޅުމަކާ ބެހޭގޮތުން މަޝްވަރާކުރެއްވުމަށް އީރާނުގެ ޚާރިޖީ ވަޒީރު އައްބާސް އަރަގްޗީ ނިއުޔޯކުގައި ގަތަރުގެ މެދުވެރިންނާ ބައްދަލުކުރައްވައިފިއެވެ. މި ބައްދަލުކުރެއްވުން ބާއްވާފައި މިވަނީ އެމެރިކާގެ އޮފިޝަލަކު ތެހެރާންގެ ނިއުކްލިއާ ޕްރޮގްރާމަށް ހައްލެއް ނުލިބެނީސް ހަނގުރާމަ ނިންމުމުގެ އެއްބަސްވުމަކަށް ނާދެވޭނެ ށް ބުނެފައިވަނިކޮށެވެ.
އީރާނުގެ ދައުލަތުގެ މީޑިއާއަށް މައުލޫމާތު ދެއްވަމުން އަރަގްޗީ ވިދާޅުވީ، ބައްދަލުވުމުގައި މަޝްވަރާކުރެވުނު ޚިޔާލުތައް ގަތަރުގެ މެދުވެރިން އެމެރިކާއަށް ހުށަހަޅާނެ ކަމަށާއި، އަންގާރަ ދުވަހުގެ ނިޔަލަށް ވޮޝިންޓަންގެ ފަހުގެ ޖަވާބެއް ލިބޭނެ ކަމަށް އުންމީދުކުރައްވާ ކަމަށެވެ. އަދި އީރާނުގެ ޝަރުތުތައް ފުރިހަމަކުރުމަށް ހައްލުތައް ހޯދުމާ ގުޅޭގޮތުން ފުޅާ ދާއިރާއެއްގައި ވާހަކަދެކެވުނު ކަމަށް އޭނާ ވިދާޅުވިއެވެ.
ޖަވާބު ލިބެންދެން ނިއުޔޯކުގައި މަޑުކުރައްވާނަންތޯ ސުވާލުކުރުމުން އަރަގްޗީ ވިދާޅުވީ މަދު ގަޑިއިރުކޮޅެއްގެ ތެރޭގައި ތެހެރާނަށް ފުރާވަޑައިގަންނަވާނެ ކަމަށެވެ. އަދި “ގަތަރުގެ ފަރާތްތަކަށް ޖަވާބެއް ލިބުމުން، އަޅުގަނޑުމެންނަށް އެ މައުލޫމާތު ފޯރުކޮށްދޭނެ ގޮތް އެނގޭނެ،” ކަމަށްވެސް އޭނާ ވިދާޅުވިއެވެ.
އަރަގްޗީ ސިފަކުރެއްވި ގޮތުގައި މި ބައްދަލުވުންތަކަކީ ގަތަރާއި ޕާކިސްތާނުގެ މެދުވެރިން މެދުވެރިކޮށް މެސެޖު ބަދަލުކުރުމަށް ކުރިއަށްދާ މަސައްކަތްތަކުގެ ބައެކެވެ. އަދި އީރާނުން މި ހުށަހެޅުން ހުށަހެޅި ފަހުން މި ވާހަކަތައް އިތުރަށް ސީރިއަސް ވެފައިވާ ކަމަށް އޭނާ ފާހަގަކުރެއްވިއެވެ.
އދ. ގެ އާންމު މަޖިލީހުގައި ހުކުރު ދުވަހު އިއުލާނުކުރި މި ޕްލޭނުގައި އެމެރިކާއަށް ގޮވާލާފައިވަނީ ފްރީޒްކޮށްފައިވާ އީރާނުގެ ފައިސާތައް ދޫކޮށްލުމަށާއި، ދަތިކުރުމުގެ ފިޔަވަޅުތައް އުވާލުމަށާއި، އީރާނުގެ ބަނދަރުތަކަށް އަޅާފައިވާ ކަނޑުމަގުގެ ބްލޮކޭޑް ނިމުމަކަށް ގެނައުމަށެވެ. އަރަގްޗީ ވިދާޅުވި ގޮތުގައި މި ފިޔަވަޅުތައް 4 ނުވަތަ 5 ދުވަހުގެ ތެރޭގައި ނިންމާލެވިއްޖެނަމަ، ހޮރުމުޒް ކަނޑުއޮޅި އަލުން ހުޅުވާލެވި، ނިއުކްލިއާ ޕްރޮގްރާމް ހިމެނޭހެން އެންމެ ފަހުގެ އެއްބަސްވުމަކާ ހަމައަށް ދިއުމުގެ މަޝްވަރާތައް 7 ވަނަ ދުވަހާ ހަމައަށް ފެށިދާނެއެވެ.