މޮރޮކޯގެ ބަރުލަމާނީ އިންތިހާބުގައި އެންމެ ގިނަ ގޮނޑި ކާމިޔާބުކުރި އޮތެންޓިސިޓީ އެންޑް މޮޑާނިޓީ ޕާޓީގެ ފާތިމާ އެއްޒަހްރާ އެލް މަންސޫރީ، އެ ގައުމުގެ ފުރަތަމަ އަންހެން ބޮޑުވަޒީރުގެ މަގާމަށް ރަސްގެފާނު މުހައްމަދު ހަވަނަ އައްޔަންކުރައްވައިފިއެވެ.
އުމުރުން 50 އަހަރުގެ އެލް މަންސޫރީއަކީ ގާނޫނީ ވަކީލެއްގެ އިތުރުން މަރަކެޝްގެ ކުރީގެ މޭޔަރެވެ. އޭނާ ވަނީ ސަރުކާރުގެ އިސް މަގާމުތަކެއް ފުރުއްވާފައެވެ. އޭގެ ތެރޭގައި އަރބަން ޕްލޭނިންގއާ ބެހޭ ވަޒީރުކަން ވެސް ހިމެނެއެވެ.
އޭނާ މަރަކެޝްގެ ފުރަތަމަ އަންހެން މޭޔަރުގެ މަގާމާ ހަވާލުވެވަޑައިގަތީ 2009 ވަނަ އަހަރުގައެވެ. އަދި އޭގެ ފަހުން އޭނާ ވަނީ މޮރޮކޯގެ ސިޔާސީ މައިދާނުގައި ފާހަގަކޮށްލެވޭ އިސް ޝަޚްސިއްޔަތަކަށް ވެވަޑައިގެންފައެވެ.
މޮރޮކޯގެ ހައުސް އޮފް ރެޕްރެޒެންޓެޓިވްސްގެ 395 ގޮނޑީގެ ތެރެއިން އެލް މަންސޫރީގެ ޕާޓީން ވަނީ 97 ގޮނޑި ކާމިޔާބުކޮށްފައެވެ. އެހެންކަމުން ވެރިކަން ކުރާ ކޯލިޝަނެއް އެކުލަވާލުމަށްޓަކައި އެހެން ޕާޓީތަކާއެކު މަސައްކަތްކުރަން ޖެހޭނެއެވެ.
ވަޒީރުންގެ މަޖިލިސް އެކުލަވާލައި ސަރުކާރު އިއުލާނު ކުރުމުގެ ކުރިން، ސިޔާސީ ޕާޓީތަކާއެކު ކުރަންޖެހޭ މަޝްވަރާތައް އެލް މަންސޫރީ މިހާރު ފައްޓަވާނެ ކަމަށް ބެލެވެއެވެ.
އޭނާ މި މަގާމަށް އައްޔަންކުރައްވާފައި މިވަނީ، ސްޕެއިން އަދި ޕޯޗުގަލްއާއެކު މޮރޮކޯއިން ބާއްވާ 2030 ވަނަ އަހަރުގެ ފީފާ ވޯލްޑް ކަޕްގެ ތައްޔާރީތައް ހިމެނޭހެން، ގައުމީ ބޮޑެތި މަޝްރޫއުތަކަކަށް މޮރޮކޯއިން ތައްޔާރުވަމުންދާ ދަނޑިވަޅެއްގައެވެ.