އިންޑިޔާގެ އުއްތަރު ޕްރަދޭޝްގައި ދެ ފާރެއް ވެއްޓި ހިނގި ހާދިސާގައި މަރުވި މީހުންގެ އަދަދު 10 އަކަށް އަރާފައިވާކަމަށް އޮފިޝަލުން ބުނެފި އެވެ.
މި ދެފާރު ވެއްޓެން ދިމާވީ މިހާރު އެ ޤައުމަށް ކުރަމުންދާ ގަދަ ވިއްސާރައިގެ ސަބަބުންނެވެ. އެގޮތުން ފާއިތުވި ތިން ދުވަހު އުއްތަރު ޕްރަދޭޝް ސަރަހައްދަށް ވާރޭ ވެހޭ މިންވަރުވަނީ އިތުރު ވެފައެވެ.
އުއްތަރު ޕްރަދޭޝްގެ އުޓަވާގެ އިތުރުން ފީރޯޒަބާދާއި ބަލްރަމްޕޫރުން ވެސް ވަނީ ވިއްސާރަެިގެ ސަބަބުން ހިނގި ހަދިސާތަކުގައި މީހުން މަރުވެފައިވާ ކަމަށް ރިޕޯޓުކޮށްފަ އެވެ. މޫސުމާ ބެހޭ އިދާރާއިން ވަނީ ކުރިއަށް އޮތް ދެތިން ދުވަހުވެސް މި ސަރަހައްދުތަކަށް ބޯކޮށް ވާރޭ ވެހޭނެކަމަށް ލަފާކޮށްފަ އެވެ.
އުއްތަރު ޕްރަދޭޝްގެ އޮފިޝަލުން މިހާރު ދަނީ ވިއްސާރައިގެ ސަބަބުން ހާލުގައި ޖެހިފައި ތިބި އާއިލާތަކަށް އެހީ ފޯރުކޮށްދިނުމުގެ މަސައްކަތް ކުރަމުންނެވެ.