ކުރީގެ ރައީސުން އޮފީސް ހިންގުމަށް ދައުލަތުން ދޭ ފައިސާ އުނިކޮށް، ކުރީގެ ނައިބުންނަށް އިނާޔަތެއް ދޭ ގޮތަށް ޤާނޫނު އިސްލާހު ކުރުމަށް ހުށަހަޅައިފިއެވެ. ސަރުކާރުގެ ފަރާތުން މި އިސްލާހުތައް ހުށަހެޅުއްވީ ހުޅުދޫ ދާއިރާގެ މެންބަރު މުޙައްމަދު ޝާހިދުއެވެ.
ސަރުކާރުގެ ފަރާތުން މެންބަރު ޝާހިދު ހުށަހެޅުއްވީ ކުރީގެ ރައީސުންނަށް ދޭ ޚާއްޞަ އިނާޔާތްތަކުގެ ތެރެއިން އޮފީސް ހިންގުމުގެ ޚަރަދަށްދޭ 175،000 ރުފިޔާ އުނިކުރުމަށެވެ.
ޤާނޫނު މިހާރު އޮންނަ ގޮތުން އެއް ދައުރު އަދާކުރައްވާ ކުރީގެ ރައީސުންނަށް ޖުމްލަ 275،000 ރުފިޔާ ލިބެއެވެ. އެއީ މާލީ އިނާޔަތުގެ ގޮތުގައި 50،000 ރުފިޔާ އާއި ދިރިއުޅޭނެ ތަނުގެ ޚަރަދުގެ ގޮތުގައި 50،000 ރުފިޔާ އަދި އޮފީސް ހިންގުމުގެ ޚަރަދުގެ 175،000 ރުފިޔާ އެވެ.
މީގެ އިތުރުން ރައީސްކަން ކުރެއްވި ބޭފުޅަކު ދެވަނަ ދައުރަކަށް އިންތިޚާބުވެއްޖަނަމަ އެ ދައުރެއްގައި އަދި ދައުލަތުގެ އެ ނޫންވެސް މަޤާމަކަށް އައްޔަން ކުރެވިއްޖެނަމަ އެ މަޤާމެއްގެ މުއްދަތުގައި ޤާނޫނުން އެ ބޭފުޅަކަށް ދޭ އިނާޔަތްތައް މެދުކަނޑާލަންޖެހޭނެ ކަމަށްވެސް ވަނީ ބަޔާންކޮށްފައެވެ. މިހާރު ޤާނޫނު އޮތްގޮތުން އިނާޔަތް މެދުކަނޑާލަން ޖެހޭނީ ދެވަނަ ދައުރަކަށް އިންތިޚާބުވުމުން އެކަންޏެވެ.
ރައީސްކަން ކުރައްވާފައިވާ ބޭފުޅުންގެ އިނާޔަތްތަކަށް ބަދަލު ގެނައުމުގެ އިތުރުން ނައިބު ރައީސްކަން ކުރައްވާފައިވާ ބޭފުޅުންނަށް އިނާޔަތް ދިނުމަށްވެސް މި ބިލުގައި ވަނީ ހިމަނުއްވާފައެވެ. އަދި މި ދެ ބަދަލާއެކު ޚަރަދަށް އަންނާނެ ބަދަލުތަކުގެ އެސްޓިމޭޓެއްވެސް ވަނީ ހުށަހަޅުއްވާފައެވެ.
ދައުރު ފުރިހަމަކުރައްވާ ނައިބު ރައީސުންނަށް ދޭން ހުށަހެޅީ 25،000 ރުފިޔާއެވެ. އޭގެ އިތުރުން ނައިބު ރައީސުންނަށް ރާއްޖެއިންނާއި ރާއްޖެއިން ބޭރުން ދައުލަތުގެ ޚަރަދުގައި ޞިއްޙީ ޚިދުމަތް ދިނުން ވެސް އިޞްލާޙުގައި ހިމަނާފައިވެއެވެ.
ކުރީގެ ނައިބު ރައީސުންނަށް ދައުލަތުން އިނާޔަތްތަކެއް ދިނުމަށް ގާނޫނަށް ހުށަހެޅުނު އިސްލާހު ރައްޔިތުންގެ މަޖިލީހުން ފާސްވެއްޖެނަމަ، އެ އިނާޔަތަށް ޝަރުތު ހަމަވަނީ ނިމިދިޔަ އެމްޑީޕީ ސަރުކާރުގައި ނައިބު ރައީސްކަން ކުރެއްވި ފައިސަލް ނަސީމަށް އެކަންޏެވެ. އެހެން އެއްވެސް ބޭފުޅަކަށް ނައިބު ރައީސްކަމުގެ މަގާމުގައި ފަސް އަހަރުގެ ދައުރެއް ފުރިހަމަ ކުރެއްވިފައެއް ނުވެއެވެ.