ހުޅުމާލެ ފޭސް 3 ހިއްކުމުގެ މަސައްކަތް އަވަސްކުރުމަށްޓަކައި، އެއްފަހަރާ ދެ ޑްރެޖަރު ބޭނުންކޮށްގެން މަސައްކަތް ކުރަން ފަށައިފި އެވެ. މި މަސައްކަތުގެ ސްޕީޑު އަވަސްކުރުމަށް އިތުރު ޑްރެޖަރެއް ރާއްޖެ އައިސްފައިވާއިރު، މިހާރު ދެ ޑްރެޖަރު ބޭނުންކޮށްގެން ފޭސް ތިނެއް ހިއްކުމުގެ މަސައްކަތް ވަނީ ރަސްމީކޮށް ފަށާފަ އެވެ. ހުޅުމާލެ ފޭސް 3 ގެ މަސައްކަތްތައް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ހަވާލުކޮށްފައި ވަނީ ކެޕިޓަލް މެރީން އެންޑް ސިވިލް ކޮންސްޓްރަކްޝަން ކޮމްޕެނީ ލިމިޓަޑް (ސީއެމްސީ) އަށެވެ. އަދި ބިން ހިއްކުމުގެ އަމަލީ މަސައްކަތް ކުރަމުން ދަނީ ބޮސްކާލިސް ކުންފުނިންނެވެ.
ހުޅުމާލެ ފޭސް 3 ގެ ދަށުން ޖުމްލަ 63 ހެކްޓަރުގެ ބިން ހިއްކުމަށް ސަރުކާރުން ނިންމާފައިވާއިރު، މިހާރު ބާކީ އޮތީ 35 ހެކްޓަރުގެ ބިމެވެ. މި މަސައްކަތް އަވަސްކޮށްފައި މިވަނީ، އަންނަ މަސް ނިމުމުގެ ކުރިން ފޭސް 3 ހިއްކުމުގެ މަސައްކަތް ނިންމާލެވޭނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެފައިވާ ދަނޑިވަޅެއްގަ އެވެ. ދެ ޑްރެޖަރު ބޭނުންކުރުމުގެ ސަބަބުން މި މަސައްކަތް ކަނޑައެޅިފައިވާ މުއްދަތަށް ނިންމުމަށް ބޮޑު އެހީއަކަށް ވާނެ ކަމަށް ބެލެވެ އެވެ.
ރައީސް މުއިއްޒު ވިދާޅުވި ގޮތުގައި، ހުޅުމާލެ ފޭސް 3 ހިއްކުމުގެ މަސައްކަތް ނިމުމާއެކު މި ދެ ޑްރެޖަރު ވަގުތުން ގިރާވަރުފަޅު ހިއްކުމުގެ މަސައްކަތަށް ފޮނުވާނެ އެވެ. އަދި ގިރާވަރުފަޅު ހިއްކުމުގެ މަސައްކަތް ފަށާތާ ދެތިން މަސްތެރޭ އެ މަސައްކަތްވެސް ނިންމާލެވޭނެ ކަމަށް ރައީސް ވަނީ ޔަގީންކަން ދެއްވާފަ އެވެ. މިއީ މާލޭ ސަރަހައްދުގެ ބޯހިޔާވަހިކަމުގެ ދަތިކަން ހައްލުކުރުމަށް ސަރުކާރުން ކުރާ މުހިންމު މަސައްކަތެކެވެ.
ގިރާވަރުފަޅު ހިއްކުމުގެ މަޝްރޫއަށް ބަލާއިރު، ކުރިން 169 ހެކްޓަރު ހިއްކަން ހަވާލުކޮށްފައި އޮތް ނަމަވެސް، އިތުރު 50 ހެކްޓަރު އިތުރުކުރުމަށް ނިންމުމާއެކު ޖުމްލަ 219 ހެކްޓަރުގެ ބިން ހިއްކާނެ އެވެ. މިހާތަނަށް ގިރާވަރުފަޅުން 90 ހެކްޓަރުގެ ބިން ވަނީ ހިއްކާ ނިމިފަ އެވެ.