“ޑިޓްވާ” ސައިކްލޯންގ ސްރީ ލަންކާގައި ފެންބޮޑުވުމުގެ ސަބަބުން ހާލުގައިޖެހިފައިވާ އެތައް ސަތޭކައަށްވުރެ ގިނަ މީހުން ސަލާމަތް ކުރުމަށް ސިފައިންނާއި ރެސްކިއު ޓީމުތައް ހަރަކާތްތެރިވަމުންދާ އިރު، މޫސުމާ ގުޅިގެން މަރުވި މީހުންގެ އަދަދު 69 އަށް އަރައި، އިތުރު 34 މީހުން ގެއްލިގެން ހޯދަމުންދާ ކަމަށް ރިޕޯޓްތައް ބުނެފިއެވެ.
ހެލިކޮޕްޓަރުތަކާއި ނޭވީގެ ބޯޓުތައް ބޭނުންކޮށްގެން ސަލާމަތީ އޮޕަރޭޝަންތައް ކުރިއަށްދާއިރު، ގިނަ ބަޔަކު ވަނީ ގަސްތަކުގެ މައްޗާއި، ފުރާޅުތަކުގެ މަތިން އަދި ފެންބޮޑުވެ އެކަހެރިވެފައިވާ ރަށްތަކުން ސަލާމަތްކޮށްފައެވެ.
ލަންކާގެ ޑިޒާސްޓަރ މެނޭޖްމަންޓް ސެންޓަރ (ޑީއެމްސީ) އިން ބުނި ގޮތުގައި، އެންމެ ބޮޑަށް ގެއްލުންވި މެދުތެރޭގެ ސަރަހައްދުތަކުން އިތުރު ހަށިތައް ފެނުމާއެކު މަރުވި މީހުންގެ އަދަދު ވަނީ އިތުރުވެފައެވެ. މި ސަރަހައްދުތަކުގައި ގިނަ އަދަދެއްގެ މީހުން ވަނީ މި ހަފްތާގައި ބިންގަނޑު ކަނޑައިގެން ދިއުމުގެ ސަބަބުން ދިރިތިއްބައި ވަޅުލެވިފައެވެ. ޑީއެމްސީން ބުނީ ފާއިތުވި 24 ގަޑިއިރުގެ ތެރޭގައި ބައެއް ސަރަހައްދުތަކަށް 360 މިލިމީޓަރުގެ ވާރޭ ވެހިފައިވާ ކަމަށެވެ. މީގެ އިތުރުން، ވެރިރަށް ކޮލޮމްބޯ ކައިރިން އިންޑިއާ ކަނޑަށް ގުޅޭ ކެލާނީ ކޯރު ވަނީ ހުކުރު ދުވަހު ކަނޑައިގެން ގޮސްފައެވެ.
ބިންގަނޑު ކަނޑައިގެން ދިއުމާއި ފެންބޮޑުވުމުގެ ސަބަބުން 3,000 އަށްވުރެ ގިނަ ގެއަށް ގެއްލުން ވެފައިވާއިރު، 18,000 އަށްވުރެ ގިނަ މީހުން ވަގުތީ ހިޔާވަހިކަމަށް ބަދަލުކޮށްފައިވެއެވެ. އަދި އުތުރުގެ އަނޫރާދަޕޫރާ ޑިސްޓްރިކްޓްގައި، ފެން ބޮޑުވުމުން ސަލާމަތްވުމަށްޓަކައި ރުކެއްގެ މައްޗަށް އަރާފައިވާ މީހަކު ވަނީ ބެލް 212 ހެލިކޮޕްޓަރެއް ބޭނުންކޮށްގެން ސަލާމަތްކޮށްފައެވެ. ޑީއެމްސީން ބުނީ އިތުރު ވާރޭ ވެހޭނެ ކަމަށް ލަފާކުރެވޭ ކަމަށާއި، ސައިކްލޯން ޑިޓްވާހް އަންނަ އާދީއްތަ ދުވަހުގެ ނިޔަލަށް އުތުރުން ދެކުނުގެ އިންޑިއާގެ ތަމިލް ނާޑޫއާ ދިމާލަށް ދަތުރުކުރާނެ ކަމަށެވެ.
ސައިކްލޯން ޑިޓްވާއަކީ މިދިޔަ އަހަރުގެ ޖޫން މަހު ބޯކޮށް ވާރޭވެހުމުގެ ސަބަބުން 26 މީހުން މަރުވި ފަހުން އެޤައުމުގައި އެންމެ ގިނަ މީހުން މަރުވި ހާދިސާއެވެ.