އިސްރާއީލުން ލުބުނާނުގެ އެކި ސަރަޙައްދުތަކަށް ހުކުރު ދުވަހުގެ ރޭ ދިން ވައިގެ ޙަމަލާތަކުގައި 13 މީހުން ޝަހީދުވެފައިވާ ކަމަށް ލުބުނާނުގެ މީޑިއާތަކުން ރިޕޯޓްކޮށްފިއެވެ. ޝަހީދުވި މީހުންގެ ތެރޭގައި ގިނައީ އަންހެނުންނާއި ކުޑަކުދިންނެވެ.
ލުބުނާނުގެ ބިޤާޢު ވާދީގެ ނަބީ ޗިޓް އަވަށަށް ދިން ޙަމަލާތަކުގައި ހަތަރު މީހަކު ޝަހީދުވެފައިވާއިރު، ދެކުނު ލުބުނާނުގެ މަޖްދަލް ސެލްމް އަވަށުގެ ގެއަކަށް އަމާޒުކޮށް ދިން ޙަމަލާއެއްގައި ނުވަ މީހަކު ވަނީ ޝަހީދުވެފައެވެ. މި ޙަމަލާތަކުގައި ގިނަ ބަޔަކަށް އެކިވަރުގެ އަނިޔާތައް ލިބިފައިވާ ކަމަށްވެސް ރިޕޯޓްތައް ބުނެއެވެ.
ލުބުނާނުގެ މިނިސްޓްރީ އޮފް ޕަބްލިކް ހެލްތުން ހާމަކޮށްފައިވާ ގޮތުގައި، ސައިދާ ސިޓީން ތިން މީހަކާއި، ބައިރޫތުގެ ބިރު ޙަސަން ސަރަޙައްދުން އެކަކު އަދި ބައިރޫތުގެ ދެކުނު ސަރަޙައްދުތަކަށް ދިން ޙަމަލާތަކުގައި އިތުރު މީހަކު ވަނީ ޝަހީދުވެފައެވެ.
އިސްރާއީލުގެ ހަނގުރާމަމަތީ ބޯޓުތަކުން ބައިރޫތުގެ ދެކުނު ސަރަޙައްދުތަކަށް 10 އަށްވުރެ ގިނަ ވައިގެ ޙަމަލާ ދީފައިވާއިރު، މި ޙަމަލާތަކުގައި ގިނަ ޢިމާރާތްތަކަކާއި އިންފްރާސްޓްރަކްޗަރ ވަނީ ސުންނާފަތިވެފައެވެ. މީގެ އިތުރުން ސައިދާ އާއި ޓަޔަރ ސިޓީގެ އިތުރުން ދެކުނު ލުބުނާނުގެ ގިނަ އަވަށްތަކަކަށްވެސް ވަނީ ޙަމަލާތައް އަމާޒުވެފައެވެ.
އިސްރާއީލުން ޙަމަލާދީފައިވާ އަވަށްތަކުގެ ތެރޭގައި ހަނިއްޔާ، ބިންތު ޖުބައިލް، ވަޒާނީ، އަލް-ޚަޟަރު، ސަރީފާ، ތައިރު ފަލްސޭ، އަދި ތަބްނީން ހިމެނެއެވެ. އަދި ބިޤާޢު ސަރަޙައްދުގެ ބޫދާއި އާއި ސަރީން އަލް-ތަޙްތާ ފަދަ ރަށްތަކަށްވެސް ވަރުގަދަ ޙަމަލާތަކެއް ވަނީ ދީފައެވެ.