ސަރުކާރުގެ މުވައްޒަފުންގެ ތެރެއިން ވިހެއުމާ ގުޅިގެން ލިބޭ ޗުއްޓީ ނިންމައި ވަޒީފާއަށް ނުކުންނަ މުވައްޒަފުންނަށް، ދަރިފުޅުގެ ކަންކަން ބެލެހެއްޓުމަށްޓަކައި ދޭ ހުސްވަގުތު ދެ އަހަރު ވަންދެން ލިބޭ ގޮތަށް ވަޒީފާއާ ބެހޭ ގާނޫނު އިސްލާހުކުރުމަށް ރައްޔިތުންގެ މަޖިލީހުން މިއަދު ފާސްކޮށްފިއެވެ. މަޑަވެލި ދާއިރާގެ މެންބަރު މުހައްމަދު ޝަމީޒް ހުށަހެޅުއްވި މި އިސްލާހު ފާސްވީ މަޖިލީހުގެ 62 މެންބަރުންގެ އަގުލަބިއްޔަތުންނެވެ. މި ބިލާ ދެކޮޅަށް އެއްވެސް މެންބަރަކު ވޯޓު ދެއްވާފައެއް ނުވެއެވެ.
މި އިސްލާހުގެ ދަށުން، މުވައްޒަފަކު ވިހެއުމުގެ ޗުއްޓީއަށްފަހު ވަޒީފާއަށް ނުކުންނަ ދުވަހުން ފެށިގެން، ދަރިފުޅަށް 2 އަހަރު ފުރެންދެން ކޮންމެ ދުވަހަކު 30 މިނެޓުގެ ދެ ހުސްވަގުތުކޮޅު ލިބޭނެއެވެ. މިއީ މުސާރައިން އެއްވެސް އުނިކުރުމެއް ނެތި ލިބޭނެ ވަގުތުކޮޅެކެވެ. ގާނޫނުގައި މިހާރު އޮންނަ ގޮތުން މި ލުއި ލިބެނީ ކުއްޖާއަށް އެއް އަހަރު ފުރެންދެން ކަމަށްވީ ނަމަވެސް، އާ އިސްލާހާއެކު އެ މުއްދަތު މިވަނީ އިތުރުކުރެވިފައެވެ.
މިއަދުގެ ޖަލްސާގައި ތޮއްޑޫ ދާއިރާގެ މެންބަރު ހުސައިން ސަމީރު ވަނީ އެ ވަގުތުކޮޅު 45 މިނެޓަށް އިތުރުކުރުމަށް އިސްލާހެއް ހުށަހަޅުއްވާފައެވެ. ނަމަވެސް، އެ އިސްލާހަށް ތާއީދު ލިބުނީ އެންމެ 7 މެންބަރުންގެ ކިބައިން ކަމަށްވާތީ، އެ ބަދަލު ފާސްވެފައެއް ނުވެއެވެ. މަޖިލީހުން ބިލު ފާސްކުރީ ގައުމީ ތަރައްގީ އާއި ތަރިކަ ކޮމިޓީން އެއްވެސް ބަދަލެއް ނުގެނެސް، ސަރުކާރުން ހުށަހެޅި ގޮތަށް ފޮނުވި ރިޕޯޓާ އެއްގޮތަށެވެ.
މި ބިލުގައި ހިމެނޭ އާ އުސޫލުތަކަށް އަމަލުކުރަން ފަށާނީ، ރައްޔިތުންގެ މަޖިލީހުން ފާސްކޮށް، ރައީސުލްޖުމްހޫރިއްޔާ އެ ބިލު ތަސްދީގު ކުރައްވައި ސަރުކާރުގެ ގެޒެޓުގައި ޝާއިއުކުރާ ދުވަހުން ފެށިގެންނެވެ. މިއީ ވަޒީފާ އަދާކުރާ މައިންބަފައިންނަށް ދަރިން ބެލެހެއްޓުމުގައި އިތުރު ލުއިތަކެއް ހޯދައިދިނުމަށް ސަރުކާރުން ގެނައި މުހިންމު ބަދަލެކެވެ.